1Ngang eman aramas mi küna riaföü ren än Kot apwüngüei.
2A asüeila o föri pwe üpwe fetal lon rochopwak, ia esap wor saram ie.
3Ellet, a wichikisiei iteiten rän, nge esap tongeei.
4A föri pwe inisi a kichüchüla o ünüchei a pwachela. A kupi chüi.
5A senätä o apwelifeili ünüki weires me riaföü.
6A föri pwe üpwe nonom lon rochopwak, usun chök ekewe sotup mi mäla me lomlom.
7A tiela ünüki pwe üsap tongeni süla. A föti ngeniei sein mi chou.
8Üa resin leüömong le siö ngeni Kot pwe epwe alisiei, nge esap aüselinga ai iotek.
9A pineela ai kewe al ren fau mi watte o apora ai kewe lenien fetal.
10A operiei usun chök eman pear, a mweteriei usun chök eman laion.
11A etekinieila seni alei o atatakisiei, mürin a likitiei.
12A emmeia an likapich o föri pwe ngang üpwe eu lenien ännen fän iten an föün esefich.
13A atowu an kewe föün esefich seni lenier o posurelong leuti.
14Ngang üa uretakir me ren aramas meinisin, ra atolongaei lon ar kölün turunufas fansoun meinisin.
15A auraei ren riaföü watte o aünü ngeniei koluk mi maras.
16A foira mesei lon pwül o kupi ngii ren fau.
17Esap chüen wor kinamwe lon manauei, üsap chüen sile pwapwa.
18Iei mine üa üra, “Esap chüen wor ai pöchökül, esap pwal chüen wor ai apilükülük won ewe Samol mi Lapalap.”
19Üa chechemeni ai riaföü me ai siamü, iei och mi maras o kipwin ngeniei.
20Üa fokun chechemeniir fansoun meinisin, ngüni a letipengau me loi.
21Nge apilükülüköch a toriei, lupwen üa chechemeni ei:
22Än ewe Samol mi Lapalap tong ellet esap fokun ükütiu, an ümöümöch esap fokun wesila.
23Ra fö iteiten lesosor, an allükülük a fokun lapalap.
24Üa apasa, “Ewe Samol mi Lapalap i wisei, iei mine üpwe eäni apilükülük.”
25Ewe Samol mi Lapalap a öch ngeni chokewe mi eäni i apilükülük, ngeni chokewe mi kütta i.
26A mürina pwe aramas repwe witiwit fän mosonoson, pwe ewe Samol mi Lapalap epwe amanaueer.
27A mürina ngeni eman mwän pwe epwe mwärelong fän weires lealüalün.
28Epwe akaleman le mot fän mosonoson, lupwen Kot a anomu ei weires won.
29Epwe chapetiu lepwül, pun eli epwe chüen wor apilükülüköch fän itan.
30Epwe aselei sapan ngeni ewe chon pösapei o mwärelong fän chomong turunufas.
31Pun ewe Samol esap pöütala eman tori feilfeilachök.
32Inamwo are a atoto riaföü, nge epwe eäni ümöümöch lon an tong ellet mi fokun lapalap.
33Pun esap turun tipen Kot an epwe ariaföüü ika aweiresi aramas won fanüfan.
34Ewe Samol a silei, lupwen aramas ra puri fän pecher ekewe chon fötek meinisin lon ewe fanü,
35a silei, lupwen ra amwöchü seni eman aramas an pwüng püsin i a ngeni,
36a silei, lupwen ra sorei mine a pwüng lon kapwüng.
37Iö a tongeni kapas, nge a fisitä ika ewe Samol esap tipeeu ngeni?
38Ifa usun, feiöch me feiengau resap fis fän alon Ewe mi Unusen Tekia?
39Pwota eman aramas epwe lal, lupwen a küna apwüng fän iten an tipis?
40Ousipwe sotuni o atittina ach kewe föför o kulsefäliti ewe Samol mi Lapalap.
41Ousipwe suki lelukach ngeni Kot lon läng o iotek ngeni,
42“Äm aia tipis o ü ngonuk, nge en kosap amusala äm tipis.
43Ka tapwerikem o nikem. Om ümöümöch a pwölüla ren om song.
44Om lingeringer a usun chök eu kuchu mi malül pwe äm iotek esap toruk.
45Ka föri pwe äm aia limengau me anioput me ren chon ekewe mwü.
46Chon oputem meinisin ra kapasen turunufas me ämängau ngenikem.
47Kata me tatakis a torikem, aia nom lon feiengau me niuokus watte.
48Chönün mesei a pupu usun pupun eu chanpupu pokiten feiengauen nei aramas.
49Chönün mesei epwe pupu, nge esap ükütiu, esap pwal mola,
50tori ewe Samol mi Lapalap epwe netiu seni läng o künakem.
51Lelukei a letipeta, lupwen üa küna mine a fis ngeni fin ai telinimw meinisin.
52Chokewe mi oputaei, nge esap wor popun, ra eseichiei usun aramas ra eseichi machang.
53Ra aturumanaueeitiu lon eu pwang o pineela ewe pwang ren eföü fau.
54Üa kokotiu lon koluk pwe üa ekieki pwe üpwe le mäla.
55Ai Samol mi Lapalap, üa kökköri itom seni epin ewe pwang.
56Lupwen üa tüngor ngonuk pwe kopwe aüselinga ai siö, en ka rongorong.
57En ka arap ngeniei, lupwen üa kökköruk, ka apasa, ‘Kosap niuokus.’
58Ai Samol, en ka angasaei o amanauaei.
59Ai Samol mi Lapalap, en ka küna ekewe föför mi mwäl ra föri ngeniei. Kopwe eäni kapwüng o afata ai pwüng.
60Ka küna usun ar oputaei pwal usun ar rawangauaei.
61Ai Samol mi Lapalap, ka rongorong ar kewe tunoämängau, ka pwal silei usun ar rawangauaei.
62Ekewe chon ü ngeniei ra ngününgünüei o tunopweliei fansoun meinisin.
63Kopwe nenengeni pwe lupwen ar mot me ar ütä ra chök atolonga itei lon ar kewe kölün ämängau.
64Ai Samol mi Lapalap, kopwe ukun ngeniir won ükükün mine ra föri.
65Kopwe anümamaueer o aura leluker ren apilükingau.
66Ai Samol mi Lapalap, kopwe tapweriir fän song o aroserela seni won fanüfan.”
