1Amori ŋic jaŋere ŋicwofuŋfâc Jordaŋ ŋifecnao ʒoaŋ huhunaopec jumbiŋ â Kanaaŋ ŋic jaŋere ŋicwofuŋfâc hâwec heririŋko jumbiŋ jaŋe sasawa Wofuŋzi Jordaŋ opâ mume kereŋkeme Israe ŋic jaŋe furu jaha fotâcnembiŋ i manarâ maŋjeŋic goroŋkewec. Ehuc Israe ŋic jaŋere hâwic‐jopame hâbi gogoroŋ embiŋ.
2Dameŋ ira Wofuŋzi Josua âzâcnerâ muwec: “Sesera qânâzi sâqe barâ Israe ŋic sahac tofa‐jeŋicko mocwâc ma bajarezemec.”
3Irec Josua e qânâzi sâqe barâ Gibea‐Aralo, ma bapa tiki hâcne, ira Israe ŋic sahac‐jeŋicko ma bawec.
4Josuazi fuŋne ʒiŋucte ma bacjopawec: Ʒikare ŋic sasawa Aigita mâreŋkonec wefumbiŋ jaŋe hahata juhuc mâreŋ sawao hâmo‐fârembiŋ.
5Ŋic sasawa Aigita mâreŋkonec wefumbiŋ jaŋe ma bacjopakicne, â hahata juhuc mâreŋ sawao fuambiŋ jaŋe ine mi ejarembiŋ.
6Eme Israe ŋic jaŋe mâreŋ sawao jara 40 juhapie Aigita mâreŋkonec ʒikare ŋic wefumbiŋ jaŋe Wofuŋte dâŋ mi mana ʒakiembiŋte omae‐fârembiŋ. Jaŋe Wofuŋzi mâreŋ guec sâkohec nâreocte mimiŋnefâc‐nâŋec mupaŋke‐jarewec ira mi raʒiniŋte musanaŋkewec hâcne.
7Irec jaŋere ɋâricfâc fuambiŋ jaŋe Josuazi ma bacjopawec. Jaŋe hahata juhuc ma mi bacjopambiŋte iŋuc hâcne ejarewec.
8Ŋic sasawa sahac‐jeŋicko ma bapie tara‐fâreme wicjeŋic somieocte teuŋkoa woŋec jumbiŋ.
9Eme Wofuŋzi Josua ʒiŋuc âzâcnewec: “No ʒoaŋ ʒira hâcne Aigita mâreŋkonec mimizi fai‐ŋeŋicko fewec foekac i bârâriekopac.” Eme mâreŋ ŋondeŋ irec ʒâŋe Giligali mumbiŋ i dameŋ ʒiŋuczia mueŋgopieŋ jaha.
10Eme Israe ŋic jaŋe Giligali haeo, Jeriko wâneŋ‐ticnao hâcne, teuŋ âterâ ŋehapie mosa irec ʒoaŋ gie bapa 14 ewec, ehame ŋafe ira aakic hombaŋ ŋembiŋ.
11Hombaŋ ŋepie hae fureme mâreŋ ira wiac fuarâ fowec irecnec rorâ poroŋ goreŋ tâmiric â jacgoŋ wiac ʒoc uucko râepie qafafaŋkeme nâmbiŋ.
12Mâreŋ irec wiac i fuŋkerâ nahapie manazi wâc arictac ewec. Ehame Israe ŋic jaŋe mana mocwâc mi nâhuc jara ira Kanaaŋ mâreŋte nânâ wiac fowec i nâmbiŋ hâcne.
13Eme Josua e Jeriko hae heririŋko juhuc ʒâŋe firâ ŋic moc becsahac‐ticnaonec sâqe unuckerâ badomaha honewec. Honerâ erao rarâ wiocnerâ muwec: “Go nâŋere âgo me râsifâc‐nâŋec jaŋere âgo?”
14Eme eki muwec: “Aricne, no Wofuŋte momori guru jaŋere micne juekopaczi warekopac.” Eme Josua e waha ʒâŋe mai‐ticne mâreŋko hetutuckerâ araŋ bacnehuc muwec: “Bomboŋ‐nane, go kiŋaŋŋicge no dâŋ weniŋuc nazazo mukomec?”
15Mume Wofuŋte momori guru jaŋere micnezi Josua ʒiŋuc âzâcnewec: “Go kikehuhuge hetarac. Mâreŋ domakomec i tiri.” Mume Josua e iŋuc ewec.
