JOSUA 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Israe kikefuŋ jaŋe Silo haeo tumaŋne‐fârembiŋ. Ehuc tutumaŋte qoruc boze ira ŋeocte fârembiŋ. Â mâreŋ ine sakarepie jaŋere biŋe ewec.

²Eme Israe ŋic guru 7 jumbiŋ jaŋe mâreŋ biac mi jarembiŋ.

³Irec Josuazi Israe ŋic ʒiŋuc jazawec: “Apafâc‐ŋeŋic jaŋere Wofuŋ Anutuzi mâreŋ biŋe qaŋarewec i mo dameŋko ro rauc eniŋmu?

⁴Irec guru sâc irecnec ŋic jahec â moc sasawa bâfuac‐jopapie sorec‐jopape rarâ fec wahac ehuc mâreŋ hone‐fârerâ jaŋac mâreŋte sâc qâreŋkerâ norao bawarenʒepieŋ.

⁵Juda e ine mâreŋ‐ticne juwic rowec ijaha ʒuhuckerâ juzejec â Josefere garikiŋfâc jaŋe iŋuc jaha faicpec mâreŋ‐jeŋickoa ʒuhuckerâ junʒepieŋ. Ehame gâcne jaŋe mâreŋ bâfâuckepie dâkâne 7 ezejec.

⁶Eme jaŋe mâreŋ dâkâne 7 i hone tâcnerâ qâreŋkehuc norao bawarenʒepieŋ. Ehame no ʒira Wofuŋ Anutu‐nâŋecte maio kâdoc qaŋarepemu.

⁷Mâc, Lewire guru jaŋe ine Wofuŋte taha bapa giezi jaŋere biŋe ekacte ŋoŋerao ʒuhuckerâ mâreŋ dâkâne moc mi roŋgopieŋ. Gade, Rubeŋ â Manase guru dâkâne jaŋe ine Wofuŋte kiŋaŋŋic Mosezi ʒoaŋ wewefunaopec Jordaŋ ŋifecnao biac jarewec.”

⁸Eme ŋic jaŋe raniŋte faharembiŋ. Razo ehapie Josuazi mâreŋ sâcticne qâreŋkeniŋte ʒiŋuc jazawec: “Fec wahac ehuc mâreŋ sâcticne qâreŋke‐fârerâ norao mocwâc risienʒepieŋ. Eme no Silo haeo ʒira Wofuŋte maio ŋoŋere erâ kâdoc qaŋarepemu.”

⁹Eme ŋic jaŋe rarâ fec wahac ehuc hae ŋerawec sâc mâreŋ bâfâuckepie dâkâne 7 fuame papiao qâreŋkembiŋ. Ehuc Josuarao Silo teuŋko risiembiŋ.

¹⁰Eme Josuazi Silo haeo Wofuŋte maio Israe ŋic garikiŋ sâc mâreŋ bâtâc bajarewec.

¹¹Eme Benjamiŋ guru garikiŋ‐jeŋic sâc mâreŋ rukec qajarepie Judare guru â Josefere guru ŋondeŋ‐jeŋicko raʒiwec.

¹²Eme ma faicpec i Jordaŋko fuŋkewec. Erâ Jeriko hae qaŋeŋnao fisirâ tiki mâreŋ fotâcnerâ ʒoaŋ huhunaopec rawec. Raku Betaweŋ mâreŋ burocnao mickewec.

¹³Erâ irecnec juwicpec jaha raku Lusi (i Bete hâcne) hae qaŋeŋnao fisiwec. Erâ hurâ Ataroti‐Adari haeo fisirâ uruŋnao Bete‐Horoŋ hae irec juwicpec tiki ŋekac ira fisiwec.

¹⁴Erâ mazi irecnec ŋehasickerâ ʒoaŋ huhunaopec raku Bete‐Horoŋ juwicpec tiki ŋekac ira fisirâ raku Kiriati‐Baali, Kiriati‐Jearim hâcne, i Judare guru jaŋere hae moc, ira mickewec. Hae i jahe hâcne ʒoaŋ huhunaopec irec ma ekopirec.

¹⁵Â mâreŋ juwicpec irec mazi ine Kiriati‐Jearim hae qaŋeŋnao fuŋkewec. Erâ irecnec ʒoaŋ huhunaopec raku Nefitoa opâ ʒâŋenao fisiwec.

¹⁶Erâ irecnec hurâ Refaim wâneŋ faicnao Hinom ŋokâ‐ticnere wâneŋ fokac irec faicnao tiki ŋekac irec qaŋeŋnao fisiwec. Erâ mâreŋ juwicpec jaha raku Hinomte wâneŋ fotâcnerâ Jebusi tiki juwicpec fisirâ Enerogele haeopec rawec.

¹⁷Izi bâŋorierâ faicpec raku Eŋ‐Semesi haeo fisi fotâcnerâ Adumim heâŋ‐ticne ŋifecnao Geliloti hae ŋekac ira fisiwec. Erâ fotâcne hurâ Rubeŋ ŋokâ‐ticne Bohaŋ ere qânâ ŋewec ira fisiwec.

¹⁸Â faicpec ine feraku Bete‐Araba hae qaŋeŋnao fotâcne hurâ mâreŋ burocnao fisiwec.

¹⁹Ehuc ʒuhuckerâ raku Bete‐Hogela hae faicpec ira fisiwec. Erâ fotâcnerâ raku Jordaŋ micnao jâmbâŋ Hâwec Hâmocne raʒikicne faicpec fokac ira mickewec. Izi ine juwicpec irec ma ewec.

²⁰Eme Jordaŋ opâzi ine ʒoaŋ wewefunaopec irec ma ewec. Izi hâcne Benjamiŋte guru, garikiŋ‐jeŋic sâc mâreŋ ro rauc embiŋ irec ma.

²¹Benjamiŋte guru, garikiŋ‐jeŋic sâc jaŋere hae ine ʒiŋuc: Jeriko, BeteHogela, Em‐Kezi,

²²Bete‐Araba, Zemaraim, Bete.

²³Awim, Para, Ofira,

²⁴Kefari‐Amona, Ofini â Geba. Hae kâcɋene 12, erâ kâkâcɋene gâcne.

²⁵Erâ gâcne ʒiŋuc ŋerawec wâc: Gibeoŋ, Rama, Beroti,

²⁶Mizipe, Kefira, Moza

²⁷Rekem, Iripele, Tarala,

²⁸Zela, Elefa, Jebusi, Jerusalem hâcne, Gibea erâ Kiriati‐Jearim. Hae kâcɋene 14 â kâkâcɋene gâcne. Benjamiŋte guru jaŋe garikiŋ‐jeŋic sâc mâreŋ i hâcne ro rauc embiŋ.