1Josefe mârâc fuafua‐ticne Manase ere gurufâc jaŋe mâreŋ rukec qajarembiŋ. Manase mârâc ŋokâ‐ticne Mariki, Gilaedere mamac, e ʒikatac juwecte Gileade â Basaŋ mâreŋ rocjofawec.
2Eme Abieʒe, Heleki, Asiriele, Sekem, Hefere â Semida jaŋe Manasere guru nâfocne irec garikiŋfâc jumbiŋzi mâreŋ rombiŋ wâc. Jaŋe hâcne Josefe mârâc ŋokâ‐ticne Manase ere garikiŋfâc.
3Hefere ŋokâ‐ticne Zelofeha, Gileade ŋosa‐ticne hâcne, e Makirire apa, â apa qaja qaja‐ticne ine Manase, e ŋokâ moc mi fuacnembiŋ, otâ sawa fuacnembiŋ. Otâfâc‐ticne jaŋere ʒâŋe biri ine ʒiŋuc: Mala, Noa, Hogela, Milika â Tiriza.
4Eme jaŋe hâcne taha bapa Eleaʒa â Nuŋte ŋokâ Josua erâ micne jaŋerao fuarâ mumbiŋ: “Wofuŋ e seŋfâc‐nâŋec jaŋehec mâreŋ moc nâreme ro rauc enaŋte Mose mutâcnecnewec.” Eme Josua e Wofuŋzi muwec irec sâcko qomâfâc‐jeŋic jaŋehec mâmâc mâreŋ ro rauc eniŋte jarewec.
5Iŋuc ehame Jordaŋ ŋifecnao mâreŋ jajahec fokopirec: Gileade â Basaŋ, ira ʒuhuckerâ Manasere guru jaŋe mâreŋ dâkâne 10 rauckembiŋ.
6I Manasere otâfâc jaŋe ŋokâ‐fâcne jaŋehec mâmâc mâreŋ dâkâne rombiŋte iŋuc fuawec. Eme Gileade mâreŋ i Manasere guru dâkâne gâcne jaŋe jaha jarembiŋ.
7Eme Manasere mâreŋzi Ase jaŋere mâreŋkonec raku Sikem hae maickerâ Mikimeta haeo fisiwec. Erâ ma izi juwicpec raku Eŋ‐Tapua hae mâreŋte ŋecjucfâc jaŋerao fisiwec.
8Tapua mâreŋ i Manasere. Mâc, Tapua hae i sawa ine Eferaim ɋâricfâc‐ticne jaŋere ewec. Erâ i Manase guru jaŋere mâreŋ mao ŋewec.
9Eme mazi Kana opâo huwec. Opâ irec juwicnao Manasere hae ŋerawec irec ŋondeŋnao Eferaimte hae gâcne ŋerawec wâc. Â Manasere mazi ine opâ irec faicnao fotâcnerâ raku hâwecko fisiwec.
10Mâreŋ juwicpec i Eferaimte â faic mâreŋ ine Manasere. Ehame hâweczi majekic ewec. Eme faicpec izi ine Asere mâreŋ mao fisiwec â ʒoaŋ wewefuopec ine Isasare mâreŋ bâfuawec.
11Eme Isasa â Ase jaŋere mâreŋko Manasezi Bete‐Seaŋ â hae boze‐ticne gâcne, â Ibeleam â hae boze‐ticne gâcne, erâ Doro haere ŋecjucfâc â hae boze‐ticne gâcne â Eŋdoro haere ŋecjucfâc â hae boze‐ticne gâcne, erâ Tanaki haere ŋecjucfâc â hae boze‐ticne gâcne, â Megido haere ŋecjucfâc â hae boze‐ticne gâcne i sasawa rofârewec. Eme mâreŋ dâkâne moc Nafata i iŋuc jaha ere ewec.
12Erâ Manasere ɋâricfâc jaŋe hae i biac ro rauc eniŋte eipiehapie Kanaaŋ ŋic jaŋe mâreŋ ira ʒuhuckerâ jumbiŋ.
13Eme ʒâhec Israe ŋic jaŋe fua sawec ehuc tâpirihec erâ Kanaaŋ ŋic bawahac‐jopahuc jaŋacne mic sâcko juniŋte mujarembiŋ, â jopa jâpec ine mi ejarembiŋ.
14Eme Josefere guru jaŋe Josua ʒiŋuc âzâcnembiŋ: “Wemocte mâreŋ dâkâne mocjaha sawa nâremeŋ? Wofuŋzi raŋɋa raŋɋa jambuŋ‐nâpoekacte nâŋe ŋic guru sâko juŋgopeneŋ.”
15Mupie Josuazi ʒiŋuc jazawec: “Ŋoŋe ŋic guru sâko juŋgopieŋ â Eferaimte tiki mâreŋzi gâŋgâŋne boc ekac. Irec faic jâckâteo ferâ Periʒi ŋic â Refaim ŋic jaŋere mâreŋko ŋaŋacne mâreŋ qa emasaŋ enʒepieŋ.”
16Eme Josefere guru jaŋe mumbiŋ: “Tiki mâreŋ i sâcnâŋec wâc mi eocmu. Erâ wâc Kanaaŋ ŋic wâneŋko jueŋgopieŋ jaŋe keretac aeŋzi bakicne bajuŋgopieŋ, i Bete‐Seaŋ â hae boze gâcne, â Jesere wâneŋko juŋgopieŋ jaŋe hâcne iŋuc eeŋgopieŋ.”
17Eme Josuazi Josefere garikiŋ Eferaim â Manase jazarâ muwec: “Ŋoŋe ŋic guru sâko erâ tâpiri sâko foŋarekac. Ŋoŋe mâreŋ dâkâne mocjaha sawa ropie mi taraocmu.
18Tiki mâreŋ i ŋoŋere efâreocmu, jâckâte fokac i qa emasaŋ ehuc rauckepie raku qaŋeŋnao tarazejec. Kanaaŋ ŋic jaŋe tâpirihec, â keretac‐jeŋic aeŋzi bakicne ŋoŋe ine sifu jopa jâpec ejareniŋmu.”
