1Eme Wofuŋzi Josua ʒiŋuc âzâcnewec: “Manabâc erâ boc mi hâwicguoc. Go faharerâ momori sasawa rocjopatec Ai haeo feniŋ. Manakic, no Ai haere ŋicwofuŋ, erâ ŋicfâcne â hae mâreŋ‐jeŋic i gore meo râec‐jopa‐fârekopac.
2Go Jeriko hae â ŋicwofuŋ‐ticne wiac ejactemeŋ irec sâc jaha Ai hae â ŋicwofuŋ‐ticne jaherao ezemec. Mâc bulimakao â wiac gâcne bâfuaniŋmu i ine ropie ŋaŋacne biŋe ezejec. Irec ferâ hae ocniŋucnao somâ râerâ ruc bahuc junʒepieŋ.”
3Eme Josua â momorifâcne jaŋe Ai haeo feniŋte faharembiŋ. Ehuc Josuazi momori ŋic tâpiri wânʒâŋhec 30 tauseŋ rowosâec‐joparâ ŋafeoa sorec‐jopawec.
4Ehuc jazarâ muwec: “Manaŋgopieŋ, hae jâururâ taicko mi rahuc ʒawie‐fârerâ hae mendâŋko somâ râerâ ruc bahuc woŋec junʒepieŋ.
5Ehame no â ŋic gâcne nâŋe ine hae maickehuc fanaŋmu. Iŋuc ehapene jaŋe mârâc embiŋ iŋuc mocwâc ehuc jâpec‐nâponiŋmuo ine wisenaŋmu.
6Eme jâpec‐nâpopie haeonec fârec‐joparâ ranaŋmu. Nâŋe wisepene jaŋe ʒiŋuc hâcne muniŋmu: ‘Jaŋe mârâc embiŋ iŋuc jaha eŋgopieŋ.’
7Iŋuc ehapie ŋoŋe quruŋ he ferâ hae ronʒepieŋ, Wofuŋ Anutu‐ŋeŋiczi hae i meŋeŋicko râeocmu hâcne.
8Haeo fefârerâ ine Wofuŋzi mutâcne‐nârewec irec sâcko ʒoczi turuŋkepie ʒazejec. No ŋaza mutâc eŋarekopac hâcne.”
9Eme Josuazi sorec‐jopame rambiŋ. Rarâ Ai hae ʒoaŋ huhunao, Bete â Ai hae ŋondeŋ‐jekicko ruc bahuc somâ râerâ fombiŋ. Josua e ine ŋafe ira ŋic gâcne qâtec‐jopame mâmâc fombiŋ.
10Eme Josua e furic araraŋte faharerâ ŋic biric‐joparâ e jahacne â Israe ŋic soŋaŋfâc‐jeŋic jaŋe bânie‐jarepie Ai haeopec rambiŋ.
11Ehuc momori sasawa e jahacnehec jumbiŋ jaŋe Ai hae bâqiŋkehuc faicpec teuŋ âterâ fombiŋ, â ŋoŋondeŋ‐jeŋicko ine uuruŋ moc fowec.
12Josua e ine ŋic 5 tauseŋ heririŋ rocjoparâ ʒoaŋ huhunao Bete â Ai hae ŋoŋondeŋ‐jekicko somâ barâ foniŋte râec‐jopawec.
13Momori guru sâko faicpec teuŋ âtekicne ira biric‐jopa‐fârembiŋ. Â jaŋere râpeo guru moc ine ʒoaŋ huhunaopec râec‐jopambiŋ. Josua e jahacne ŋafe ira wâneŋkoa fowec.
14Iŋuc epie Ai haere ŋicwofuŋzi honerâ e jahacne â ŋicfâc‐ticne sasawa jaŋe ʒocne fârone ehuc Israe ŋic jaŋehec qaqac eniŋte wâneŋkopec rambiŋ. E hae râpeo somâ râerâ fombiŋ i mi manawec.
15Eme Josua â Israe ŋic sasawa jaŋe dockerâ wiseŋgopieŋ hawari ehuc mâreŋ burocnaopec rambiŋ.
16Eme ŋic haeo jumbiŋ jaŋe sasawa faharerâ Josua â ŋicfacne jâpec‐jopaniŋte fânoc hejarembiŋ. Eme heâckerâ rahapie hae‐jeŋic mâc fowec.
17Ŋic moczi Ai me Bete haeo moc mi juhuŋgaŋkewec. Jaŋe hae behepie mâc foha Israe ŋic jâpec‐jopa rambiŋ hâcne.
18Ehame Wofuŋzi Josua âzâcnerâ muwec: “Go damuge badomakomec i haeopec sicnec. No hae i megao râekopac.” Mume Josuazi damu‐ticne haeopec sicnewec.
19Meticne fâretiŋnehame izia momori jaŋe somâ barâ fombiŋkonec fahare gasake ferâ haeo raʒimbiŋ. Ehuc picpac jaha hae i ʒoczi turuŋkepie ʒawec.
20Eme Ai hae rune jaŋe râpe‐jeŋicko fotikie firâ fic haere hosâc sawao feme honembiŋ. Ehame mâreŋ burocnaopec wisembiŋ jaŋe fotikierâ maic‐jopambiŋ. Iŋuc epie Ai hae rune jaŋe ira me ira wiseniŋte hata basambiŋ.
21Eme somâ bapa ŋic jaŋe hae rombiŋ â haere hosâczi sawao fehuc domawec i Josua â Israe ŋic jaŋe honerâ risie Aiŋic imac‐jopambiŋ.
22Eme bâbâni hae rombiŋ jaŋe wahambiŋ. Ehuc bune râpene ejarehuc fitac‐jopapie Israe ŋic jaŋere ŋondeŋko domambiŋ hâcne. Ehame Israe ŋic jaŋe imac‐jopakupie moczi moc mi wise‐jâmbâŋkewec.
23Â Ai haere ŋicwofuŋ e ine ɋâricne rorâ Josuarao barambiŋ.
24Eme Israe ŋic jaŋe Ai hae rune mâreŋ sawao ʒikazi jopaku jopa mizierâ Ai haeo risierâ ŋecjucfâc‐ticne iŋuc jaha ʒikazi ima samaki bacjopambiŋ.
25Eme ʒoaŋ ira Ai haere ŋic ŋokac sasawa jopambiŋ i ʒare‐jeŋic qâhâckepie 12 tauseŋ ewec.
26Josua e ine damu sicnerâ badomawec i mi fâre suruckeha Ai haere ŋecjucfâc ʒeŋgoma jopa miziembiŋ hâcne.
27Wofuŋzi Josua mutâcnecnewec irec sâcko Israe ŋic jaŋe bulimakao â hae irec wiac gâcne i sawa jaŋacne biŋe eocte rombiŋ.
28Josua e Ai hae ʒoczi turuŋkeme ʒarâ sesucne fuawec i dameŋ ʒiŋuczia ŋekac jaha.
29Eme Josua e Ai haere ŋicwofuŋ qarâ jâc mocko ɋetickeme domaha hae owâewec. Ehame ʒoaŋ huzo eha Josuazi ŋic ejareme qâŋɋâŋ‐ticne jâckonec batararâ haesac motâcko sârockepie hume fainao qânâ he fembiŋ i dameŋ ʒiŋuczia ŋekac wâc.
30Eme Josuazi Ebali tikio Israe ŋic jaŋere Wofuŋ Anutu ere alata moc bawec.
31Wofuŋte kiŋaŋŋic Mosezi sâcmutâc dâŋko mu qâreŋ ewec irec sâcko bawec. Dâŋ kecʒiŋuc fowec: “Ŋiczi qânâ qa hefâuc mi ekicne furune rorâ banʒepieŋ,” alata iŋucne barâ Wofuŋte âsu biaŋ â wama bâzi rikembiŋ.
32Eme Mosezi sâcmutâc dâŋ qâreŋkewec i Josuazi Israe ŋic ŋokac jaŋere maio qânâ faio hâsine qâreŋkewec.
33Eme Israe ŋic sasawa, mafa â hae fâri, jaŋe soŋaŋ â micne â mumutara ŋicfâc‐jeŋic jaŋehec katapa ŋifec â ŋifec domahuc Lewire guruonec taha bapa Wofuŋte ʒâʒâfic katapa reŋkembiŋ jaŋe maic‐jopambiŋ. Ehuc guru moc jaŋe Geriʒim tikiopec â guru moc jaŋe ine Ebali tikiopec iŋuc domambiŋ. I Wofuŋte kiŋaŋŋic Mose mârâcko Israe ŋic ŋokac jambuŋ‐jopaniŋte mutâcne‐jarewec irec sâcko embiŋ.
34Eme Josuazi dâŋ sasawa sâcmutâcte papia qizecko qâreŋkekicne irec sâcko jambuŋ â sâwecdâŋ i wose‐fârewec.
35Mosezi dâŋ sasawa mutâcnewec i Josuazi Israe ŋic â ŋokac naru motec â mafazi jaŋehec jumbiŋ jaŋe ʒeŋgoma tumaŋnehapie wose‐jarewec hâcne.
