JOSUA 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Josuazi Rubeŋ guru, Gade guru â Manase guru dâkâne hefârec‐joparâ

²ʒiŋuc jazawec: “Wofuŋte kiŋaŋŋic Mosezi dâŋ ŋaza mutâc ewec i soŋaŋke‐hâmohuc noni dâŋ ŋaza mutâc epo i wâc reŋke‐fârembiŋ.

³Erâ dameŋ ʒora jâmbâŋ qomâfâc‐ŋeŋic jaŋehec hehetiric moc mi ehuc mâmâc jaha juwefueŋgopieŋ. Erâ wâc Wofuŋ Anutu‐ŋeŋicte mumutâc dâŋ sasawa i aimuŋ soŋaŋke‐fârembiŋ.

⁴Eme dameŋ ʒi ine Wofuŋ Anutu‐ŋeŋiczi mupaŋkewec irec sâcko qomâfâc‐ŋeŋic uruc jauŋ tahac‐jopawec. Irec ŋoŋe wâc Wofuŋte kiŋaŋŋic Mosezi Jordaŋ ŋifecnao hae mâreŋ ro rauc eniŋte ŋarewec fokac ira risieniŋ.

⁵Wofuŋte kiŋaŋŋic Mosezi sâcmutâc dâŋ sasawa mutâcne‐ŋarehuc Wofuŋ Anutu‐ŋeŋic maŋjauŋ ecnerâ ere hataoa juniŋte â sâcmutâc dâŋticne soŋaŋkehuc erao qohota sanaŋkerâ maŋ mamanasu‐ŋeŋiczi e kiŋaŋ qacnehuc juniŋte ŋaza mutâc ewec i aijakic jaha soŋaŋkehuc junʒepieŋ.”

⁶Josua e iŋuc jaza‐fârerâ jambuŋ‐jopahuc râec‐jopame hae‐jeŋic sâc risie rambiŋ.

⁷Manasere guru dâkâne moc jaŋe Mosezi Basaŋ mâreŋko mâreŋ ro rauc eniŋte jarewec. Â guru dâkâne moc jaŋe ine Josuazi qomâfâc‐jeŋic gâcne jaŋehec Jordaŋ ŋifec ʒoaŋ huhunaopec mâreŋ i jarewec. Josua e sorec‐jopame razo ehapie jambuŋ‐jopawec.

⁸Ehuc ʒiŋuc jazawec: “Ŋoŋe mafa sâkohec, lama bulimakao bocjaha jâmbâŋ, siliwa, gol, aeŋ bâbâroŋ, â aeŋ, erâ ŋaqi qoruc bocaha rombiŋ i barâ hae‐ŋeŋicko risienʒepieŋ; ehuc râsifâc‐ŋeŋic jaŋeraonec rokicne i qomâfâc‐ŋeŋic jaŋehec bâtâc banʒepieŋ.”

⁹Eme Rubeŋ â Gade guru erâ Manase guru dâkâne jaŋe Silo hae Kanaaŋ mâreŋko ŋewec irecnec Israe ŋic guru gâcne behec‐joparâ hae‐jeŋic sâc Gileade mâreŋ Wofuŋzi Mose mutâcnecneme jaŋe jaŋac ro rauc embiŋ ira raniŋte rambiŋ.

¹⁰Eme guru jahec â moc i jaŋe Jordaŋ ŋifecnao Kanaaŋ mâreŋ ŋondeŋ moc ʒâŋene Geliloti ira fisirâ alata sâko moc bambiŋ.

¹¹Eme Israe guru gâcne jaŋe biŋe ʒiŋuc mupie manambiŋ: “Manaŋgopieŋ, Rubeŋ â Gade guru erâ Manase guru dâkâne jaŋe Geliloti mâreŋko alata moc bambiŋ. Hae mâreŋ i Jordaŋ heririŋ Kanaaŋ mâreŋ qaŋeŋnao Israe guru sâko nâŋâcne mâreŋkopec fokac hâcne.”

¹²Israe guru sâko jaŋe iŋuc manarâ furu jaha râsi fisi‐jareniŋte Silo haeo tumaŋnembiŋ.

¹³Ehuc Israe ŋic jaŋe Gileade mâreŋko Rubeŋ â Gade guru erâ Manase guru dâkâne jaŋerao taha bapa Eleaʒare ŋokâ Pinehasi,

¹⁴â micne 10 Israe guru garikiŋ‐jeŋic sâc irecnec micne moc moc hâcne, jaŋe ehec mâmâc sorec‐jopambiŋ.

¹⁵Eme jaŋe Gileade mâreŋko Rubeŋ â Gade guru erâ Manase guru dâkâne jaŋerao fisirâ ʒiŋuc jazambiŋ:

¹⁶“Wofuŋte kikefuŋ ʒiŋuc mukac: ‘Ŋoŋe wemocte Israere Wofuŋ Anutu bunao bahuc bâbâsifuc ʒi bâfuambiŋ? Ŋoŋe alata ʒi bahuc Wofuŋte dâŋ sâcne mi reŋkembiŋ. Ŋoŋe iŋuc ehuc Anutu fecneŋgopieŋ hâcne.

¹⁷Peoro haeo bahac fuame Wofuŋziŋic ŋokac bâtiŋ‐jopawec i moc mi manasuŋgopieŋ me? Eme dameŋ ʒi bahac izi hâcne kidapec‐nâpoha juŋgopeneŋ. Eme izi sawa mi fozac me?

¹⁸Ŋoŋe Wofuŋ râpecke sanaŋkeniŋte muŋgopieŋ me? Ŋoŋe miŋecgac Wofuŋ dâŋticne mi reŋkeniŋmuo ine tomâcko biac Israe ŋic sasawa mana gâpâre‐nâreocmu.

¹⁹Ŋoŋe mâreŋ‐ŋeŋickoa jupie Wofuŋ araŋ babacnere sâc mi ekacko ine Wofuŋte mâreŋko e jahacne qoruc boze ŋekacko fânʒepieŋ. Ehuc ŋondeŋ‐nâŋecko mâreŋ ro rauc enʒepieŋ. Erâ Wofuŋ Anutu‐nâŋecte alatao ʒuhuckerâ alata moc bahuc Wofuŋ â nâŋe qâhuc‐nâpohuc wiac ebac ee ine mi enʒepieŋ.

²⁰Ŋoŋe Ʒera ŋokâ‐ticne Akaŋ erao mâsi fuawec irec manasunʒepieŋ. E wiac Wofuŋte meo râekicne irec mumutâc fuawec i qatarame Israe kikefuŋ sasawa jaŋerao bâbâtiŋ fuawec. Erâ Akaŋ e kiŋ bahac‐ticnere erâ buc mi hâmowec.’”

²¹Eme Rubeŋ â Gade guru â Manase guru dâkâne, jaŋe Israere guru, garikiŋ sâc jaŋere micne dâŋ ʒiŋuc bâtikie‐jarembiŋ:

²²“Wofuŋ e Anutu Fekicne Mocjaha. Wofuŋ e Anutu Fekicne Mocjaha. Fuŋne wemocte alata bambeŋ i eki manakac â ŋoŋe wâc miŋecgac mananʒepieŋ. Me Wofuŋte dâŋ qatarahuc hata âte sifuckembeŋko ine moc mi akic‐nâponʒepieŋ.

²³Nâŋe Wofuŋte dâŋ qatarahuc nâŋe nâŋâcne alata barâ ira hosâc âsu bâzi ririke, me jacgoŋ wiaczi taha banaŋte, me wamare taha banaŋte alata i bambeŋko ine Wofuŋ e jahac bâtiŋ‐nâpozejec.

²⁴Nâŋe ine ʒiŋucte alata i bambeŋ: Juku nacnere ŋoŋere ɋâricfâc jaŋe nâŋere ɋâricfâc ʒiŋuc moc jazanʒipiŋte: Ŋoŋe Israere Wofuŋ Anutu ehec ʒuʒuhuc‐ŋeŋic moc fokac me?

²⁵Wofuŋ e Jordaŋ opâzi nâŋe â Rubeŋ â Gade guru ŋoŋe manâŋec eocte râewec, ŋoŋe Wofuŋhec ʒuʒuhuc‐ŋeŋic moc mi fokac i iŋuc muhuc ŋoŋere ɋâricfâc jaŋe nâŋere ɋâricfâc bâuruŋ‐jopapie Wofuŋ araŋ babacne i nâŋerao omaezacte erâ alata ʒi bambeŋ.

²⁶I bâzi ririke me taha râe guruc eere mâcne,

²⁷guru jajahec nâŋâcne ma eocte bambeŋ. Erâ ŋic gaŋne gaŋne faicnao fua raniŋmu jaŋere wâc mâmâc ezejec. Wiac izi hâcne ʒiŋuc mutâcne‐jarezejec: Nâŋe Wofuŋ Anutu araŋ bacnehuc qowi bâzi ririke, taha bâzi erâ wama bâzi i bajueŋgopeneŋ wâc. Erâ juku nacnere ŋoŋere ɋâricfâc jaŋe nâŋere ɋâricfâc ʒiŋuc jazanʒipiŋte alata ʒi bakicne: ‘Ŋoŋe Wofuŋhec ʒuʒuhuc‐ŋeŋic moc fokac me?’

²⁸Irec nâŋe ʒiŋuc manasumbeŋ: Juku nacnere nâŋere me ɋâricfâc‐nâŋec jaŋerao dâŋ iŋucne moc mupie nâŋe ʒiŋuc jazanʒepeneŋ: Honeniŋ, ŋosafâc‐nâŋec jaŋe alata ʒi bambiŋ i Wofuŋte alata iŋucne. I qowi bâzi me taha bâzi ririkere mâcne, ŋoŋe â nâŋe ŋondeŋ‐nâŋecko mumutaniŋ‐nâŋec erâ ŋeocte bambiŋ.

²⁹Nâŋe Wofuŋte dâŋ mi qatara‐jâmbâŋkenʒepeneŋ, me alata moc barâ ira qowi bâzi ririke, me jacgoŋ â taha gâcne râe guruc i wâc mi mac enʒepeneŋ. Erâ wâc Wofuŋte qoruc bozere motâcnao alata ŋekac iŋucne moc mi ʒuhuckerâ banʒepeneŋ.”

³⁰Eme taha bapa Pinehasi â Israe guru, garikiŋ‐jeŋic sâc irec micne sasawa taha bapahec jumbiŋ jaŋe Rubeŋ â Gade guru â Manase guru dâkâne jaŋe dâŋ mumbiŋ i manapie sâckewec.

³¹Eme taha bapa Eleaʒare ŋokâ Pinehasi e Rubeŋ â Gade guru â Manase guru dâkâne ʒiŋuc jazawec: “Miŋecgac manaŋgopeneŋ: Wofuŋ e ŋondeŋ‐nâŋecko jukac. Wemocte, ŋoŋe wiac i ehuc Wofuŋ bunao mi bambiŋ. Eme ʒi Israe ŋic sasawa jaŋe Wofuŋte bâbâtiŋko fenʒipiŋte bâfiriec‐jopaŋgopieŋ hâcne.”

³²Eme taha bapa Eleaʒare ŋokâ Pinehasi â micne guru jaŋe Gileade mâreŋko Rubeŋ â Gade guru jaŋeraonec risierâ Kanaaŋ mâreŋko Israe ŋic jaŋerao rambiŋ. Ehuc ŋic ŋokac dâŋ binaŋ ejarembiŋ.

³³Eme Israe ŋic jaŋe dâŋ binaŋ‐jeŋic manapie sâckewec. Eme Anutu mucne bacnehuc Rubeŋ â Gade guru jaŋe mâreŋ ro rauc erâ jusanaŋkembiŋ i râsi ejarehuc bâsirowec‐jopaniŋte mumbiŋ i behembiŋ.

³⁴Eme Rubeŋ â Gade guru jaŋe alatare ʒâŋe Mumutaniŋ mumbiŋ. I ʒiŋucte manasuhuc: “Wiac izi manâŋec ehuc, Anutu e Wofuŋ jâmbâŋ jukac i mutaniŋkezejec.”