Iosua 4

1

2

3

4

5

6

7

8

9

10

11

12

13

14

15

17

18

19

20

21

22

23

24

¹Tatao gamagaridi Ioridano eai se gaeoavasieao, Guiau i ribalau Iosua arinai, i ene.

²Tatao saudoudoi‐labui u hetorodi hari bogao tau esega, hari bogao tau esega.

³U lauhesomdi, u ene, Ioridano duaduarina eai kohena va edi aba totoro, veu saudoudoi‐labui au abidi, au bahedi, iboni emi aba eno au toredi.

⁴Iosua tatao‐saudoudoi‐labui va i eogaidi, isi Isaraela nanatunaeao aridi eai i hetorodi va, hari bogao tau esega, hari bogao tau esega.

⁵Iosua ie ribalau aridi eai, i ene, Guiau emi Eaubada ena ake matana eai au gaeoavasi, esau, esau ena veu dobaiarona eai i laei, doha Isaraela nanatunaeao adi bogao ta hasiridi:

⁶Emi heiheinoi teina, maraitom‐asubena nanatumiueao se oimuri si ene, Teina veu aisana?

⁷Abo au heuioidi, au ene, Guiau ena ribahesunuma akena se heavasi Ioridano eai, goila i didilautom, teina veu ta Isaraela nanatunaeao edi aba nuanuatuina i lau e, nige nosina.

⁸Isaraela nanatunaeao Iosua ena riba se lauvataidi, Ioridano duaduarina eai veu saudoudoi‐labui se abidi, doha Guiau Iosua i heriba, adi bogao saudoudoi‐labui se hegonoahidi, se laedi edi aba eno eai, nei eai se toredi.

⁹Iosua veu saudoudoi‐labui Ioridano duaduarina eai i tarinidi, kohena va ribahesunuma akena taubahebahei edi abo totoro va arinai se otahai, i laoma, i laoma e, huia ta.

¹⁰Kohena ake taubahei Ioridano duaduarina eai se totoro i lau e, ginauri gamagaridi Guiau Iosua i lauhesom va tatao i heribaheohi, eo Mose hinage Iosua i lauhesom va i heribaheohidi: abo tatao se gaeoavasiheulai.

¹¹Tatao gamagaridi se gaeoavasiohieao abo Guiau ena ake se laei, eo kohena tataodi se gaeoavasi hinage tatao matadi eai.

¹²Reubena nanatunaeao, eo Gada nanatunaeao, eo Manasa boganaeao tupona, Isaraela nanatunaeao matadi eai se gaeoavasi, doha Mose i heribadi.

¹³Tatao tausani tatao‐labui Guiau matana eai se gaeoavasi, se lau Ieriko gonuna eai.

¹⁴Nei asubenana ne Guiau Iosua i hedebasae Isaraela gamagaridi matadi eai, ia se heasisiei, doha Mose se heasisiei ena mauri asubena gamagaridi eai.

¹⁵Guiau i ribalau Iosua arinai, i ene,

¹⁶Kohena, ribahesunuma akena taubahebahei u lauhesomdi, isi Ioridano eai se gaeosaema.

¹⁷Arinai Iosua kohena i lauhesomdi, i ene, Ioridano eai au gaeosaema.

¹⁸Kohena, Guiau ena ribahesunuma akena taubahebahei, Ioridano duaduarina eai se gaeosaema se totoro tano pitapitarina eai, Ioridano goilana edi dobila abo se lauvatai, laopaana se heboriri doha bagubaguna va.

¹⁹Navarai heesegana eai, asubena hesaudoudoina eai, tatao Ioridano eai se gaeosaema Giligali eai se mia, Ieriko tupo aruabo eai.

²⁰Veu va saudoudoi‐labui Ioridano eai se abidi va, Iosua Giligali eai i tarinidi.

²¹I ribalau Isaraela nanatunaeao aridi eai i ene, Maraitom‐asubena nanatumiueao tamadi se oimuridi si ene, Teina veu aisadi?

²²Nanatumiueao abo au heribadi au ene, Teina Ioridano eai Isaraela tano pitapitarina eai se gaeoavasi.

²³Paana Guiau emi Eaubada, matamiu eai Ioridano goiladi i hegumadi, i lau e, au gaeoavasi, doha hinage Guiau emi Eaubada ena laulau matamai eai Gabogabo Buiabuia i hepitari i lau e, ai gaeoavasi:

²⁴Bena tatao gamagaridi tanoubu eai ta Guiau nimana abo se nuatui, si ene i didiga, omi hinage bena Guiau emi Eaubada au matausiei nige nosina.