Diyesuwa 4

3

4

5

6

24

¹Ya lau ee–, Isalaela mahudoꞌidi sa ofi lau tefa, Yaubada Diyesuwa ya faliba, iyebo,

²Dodoga 12 u siꞌoꞌinadi sulu esega - esega yai, na u falibadi, uwen,

³Au lau Diyodan Hoꞌowana atipuna yai, somo yai tau antalasam sa obiꞌobiyo, be umeꞌehu esega - esega ami abidi, be ami bahe lawedi somo yai emi an abi pei palai yai, iꞌipa te.

⁴Be Diyesuwa dodoga te ya yoga gogonidi,

⁵be ya falibadi, iyebo, Au lau be, Guyau eda Yaubada ena Laugagayo Aba Husaꞌina au bwaꞌiyedi, be hoꞌowa atipuna yai umeꞌehu au baheidi, sulu esega - esega Isalaela ganahewada yai.

⁶Ite umeꞌehu te haba eda fafaꞌilala somo Yaubada ya ginauli. Fuya matada yai, yena nanatumiu sa fatiꞌo, “Umeꞌehu te, aniyona somo?”

⁷Haba ami falibadi, auwe, “Umeꞌehu te haba ya fafanuwa hitinida, fuyana Yaubada ena Laugagayo Aba Husaꞌina sa ilolo lawen tefa, Hoꞌowana mate ya tiwa. Ya famala eda fafaꞌilala, fuya hige ana siga.”

⁸Diyesuwa dodogadi wa ya fatalahadi, be ena liba sa lau watan. Umeꞌehu 12 sa abidi Diyodan atipuna yai, Isalaela sulu esega - esega sa bahe leuwedi, bena haba edi aba abi gwaꞌu yai sa toledi.

⁹Diyesuwa umeꞌehu te ya pei gogondi. Na umeꞌehu wa hola otadi.

¹⁰Na hola hige i pei gogondi, tau antalasam Diyodan atipuna yai sa obiꞌobiyo. Ya lau ee–, Yaubada Diyesuwa ya faliba be ginauli mahudoꞌina sa ginauli faꞌofidi, doha Mose haꞌa Diyesuwa ya faliba. Sa obiyo ee–, na dodoga mahudoꞌidi sa feula, be sa lau tefa.

¹¹Sa ofi lau tefa, habahim, tau antalasam Laugagayo Aba Husaꞌina sa mulitama, na dodoga sa kinokinodi.

¹²Na sulu faihona wa, Leubena, Gada, yo Manase tefana, hiyala dodogadi ma nonohadi, ma afa haidadi sa bwaꞌi, sa lau tefa, doha beyabeyana Mose haꞌa ya fatalahadi.

¹³Yaubada ena tau hiyala mahudoꞌidi 40,000 sa lau tefa Diyeliko Gonna yai, sa abi nonoha bena haba sa hiyala.

¹⁴Lahaina yai ni, Yaubada Diyesuwa hesana ya tole hitin, Isalaela matadi yai, na ena miyamiya fuyanidi yai sa faꞌatitiyen, doha Mose sa faꞌatitiyen.

¹⁵Yaubada ya libalau Diyesuwa lebena, iye,

¹⁶Laugagayo tau baheina u fatalahadi, be Diyodan yai ti gayo hitima.

¹⁷Be Diyesuwa, Yaubada ena liba ya lau watan.

¹⁸Tau antalasam sa gayo hiti dakodako yai, yo fede hoꞌowa ya didi. Yo fede, Diyesuwa hesana sa faꞌatitiyen, paꞌana noꞌo itete sa ita.

¹⁹Nawalahi Mati, lahaina 25 yai, Yaubada ena gigibwali ya famahata, Isalaela dodogadi lebedi yai, lahaina sa lau tefa, be Giligala yai palaidi sa peidi, Diyeliko tefa saisaina yai.

²⁰Be Diyesuwa umeꞌehu Diyodan yai sa abidi wa, amainiya ya pei gogondi.

²¹Be ya liba Isalaela lebedi yai, iyebom, Bobon asubena, yena ami hiti mulita sa fatiꞌo, tiyebom, “Umeꞌehu te, aniyona somo?”

²²Au falibadi, auwen, “Guyau eda Yaubada, hoꞌowa ena fuya fatedena yai, Isalaela sa lau tefa.

²³Yo hoꞌowa ya fatede, be gonowana te lau tefa, doha beyabeyana Gabogabo Balebalelemna ya fatede, eneheda.”

²⁴Haba dodoga mahudoꞌidi tanoꞌubu yai te, sa siba sidohana Yaubada ena gigibwali ya laꞌi, na haba hesana te fadebasae, fuya hige ana siga.