Josua 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Iwe, lupwen chon Israel meinisin ra toola pekilan ewe chanpupu Jortan, ewe Samol mi Lapalap a üreni Josua,

²“Kopwe filätä engol me ruoman mwän me lein ekewe aramas, akaeman seni eu me eu ainang.

³Kopwe allük ngeniir pwe repwe angei engol me ruoföü fau seni lukalapen ewe chanpupu Jortan, seni chök ewe leni ia ekewe souasor ra ütä ie. Repwe uweerela pekila o iseniretiu lon ewe leni ia oupwe asösö ie lepwinei.”

⁴Mürin Josua a körato engol me ruoman mwän seni lein ekewe aramasen Israel, ätekewe i a filiretä, akaeman seni eu me eu ainang.

⁵Iwe, Josua a üreniir, “Oupwe akomwola mwen ewe pworofel än ewe Samol mi Lapalap ämi we Kot o tolong lukalapen ewe chanpupu Jortan. Iwe, eman me eman leimi epwe angei eföü fau o mwärei won afaran fän iten eu me eu ekewe ainangen Israel.

⁶Ekei fau repwe achema ngenikemi mine Kot a föri. Lupwen nöümi repwe aisinikemi lon kan fansoun mwach, ‘Met wewen ekei fau ngenikemi?’,

⁷mürin oupwe üreniir, ‘Lölön ewe chanpupu Jortan a kaüla, lupwen aia pwerela lon ewe chanpupu fän än ewe Samol mi Lapalap we pworofel.’ Iei mine ekei fau repwe föün achem ngeni ekewe aramasen Israel tori feilfeilachök.”

⁸Iwe, ekewe re Israel ra föri usun mine Josua a allük ngeniir. Ra angei engol me ruoföü fau seni lukalapen ewe chanpupu Jortan, eföü fän iten eu me eu ekewe ainangen Israel, usun ewe Samol mi Lapalap a üreni Josua. Iwe, ra uwala ekewe fau lon ewe leni ia ra asösö ie, o iseniretiu ikenan.

⁹Iwe, Josua a pwal senätä engol me ruoföü fau lukalapen ewe chanpupu Jortan lon ewe leni ia ekewe souasor mi mwärei ewe pworofel ra ütä ie. Iwe, ekewe fau ra nom ikenan tori ikenai.

¹⁰Nge ekewe souasor mi mwärei ewe pworofel ra ü lukalapen ewe chanpupu Jortan, tori ekewe aramas ra wes le föri mine ewe Samol mi Lapalap a allük ngeni Josua. Ekei kapas meinisin Moses a fen allük ngeni Josua. Iwe, ekewe aramas ra pwerela fän pacheu.

¹¹Iwe, lupwen ekewe aramas meinisin ra toola pekilan ewe chanpupu Jortan, än ewe Samol mi Lapalap we pworofel me ekewe souasor ra pwal pwerela pekila fän mesen ekewe aramas.

¹²Iwe, chon ekewe ainangen Rupen me Kat pwal esopun ewe ainangen Manasa ra pwerela pekila mwen ekewe aramasen Israel fän ar pisekin maun, usun Moses a amwirimwir ngeniir.

¹³Iwe, ina epwe ükükün faik ngeröü mi molotä fän ar pisekin maun, ra pwerela pekila tori ewe maasiesin Jeriko fän mesen ewe Samol mi Lapalap, pwe repwe maun.

¹⁴Lon ewe rän, ewe Samol mi Lapalap a atekiatä Josua me fän mesen chon Israel meinisin. Iwe, ra meniniti Josua lon ränin manauan meinisin, usun ar meniniti Moses.

¹⁵Iwe, ewe Samol mi Lapalap a üreni Josua,

¹⁶“Kopwe allük ngeni ekewe souasor mi mwärei ewe pworofel, pwe repwe towu me lon ewe chanpupu Jortan.”

¹⁷Iei mine Josua a allük ngeni ekewe souasor pwe repwe towu.

¹⁸Iwe, lupwen ekewe souasor mi mwärei än ewe Samol mi Lapalap we pworofel ra towu seni lukalapen ewe chanpupu Jortan o ipwetä won pwül mi pwasapwas, lölön ewe chanpupu a liwiniti lenian o urowu ünükün ekis meinisin usun mesemwan.

¹⁹Iwe, ekewe aramas ra towu me lon ewe chanpupu Jortan lon aengolun ränin ewe aeuin maram. Ra aüetä imwer lon Kilkal ötiuen kiännin Jeriko.

²⁰Nge Josua a senätä me lon Kilkal ekewe engol me ruoföü fau ra angei me lon ewe chanpupu Jortan.

²¹Iwe, a üreni ekewe aramasen Israel, “Are nöümi repwe aisinikemi lon kan fansoun mwach, ‘Met wewen ekei fau?’

²²mürin oupwe üreniir, ‘Chon Israel ra pwereto lon ewe chanpupu won pwül mi pwasapwas.’

²³Pun ewe Samol mi Lapalap ämi we Kot a apwasatä ewe chanpupu Jortan fän itemi, tori oua pwerela pekilan, usun mine a fen föri ngeni ewe Setipar, lupwen a apwasatä fän itach, tori sia pwerela pekilan.

²⁴Iei usun aramasen fanüfan meinisin repwe silei pwe ewe Samol mi Lapalap a fokun manaman. Nge ämi oupwe meniniti ewe Samol mi Lapalap ämi we Kot tori feilfeilachök.”