Text copied!
CopyCompare
Buk Baibel long tokples Motu - IONA

IONA 3

Help us?
Click on verse(s) to share them!
1Bena Iehova ena hereva na Iona enai ma e kau, nega iharuana, eto,
2A tore isi, hanua badana Nineve baola, lau ese baina henimu herevana ba gwaurai henia.
3Taunabunai, Iona e tore isi, Nineve ela, Iehova ena hereva heḡereḡerena. Hari Nineve na hauna bada-hereana, ena lababa na dina toi laolaona na heto.
4Iona ese hanua lalonai e raka vareai matama, dina ta laolaona heḡereḡerena ela. Bena e haroro, eto, Dina hari-ahui bae ore, bena Nineve baine heḡiḡi dobi.
5Bena Nineve taudia ese Dirava e abiabiraia; idia na e anivaga e gwauraia bona puse dabuadia e hahedokilai, badana ela bona maraḡina.
6Nineve pavapavana ese harina e kamonai, bena ia na ena terono amo e tore isi, ena hahedoki e dokia oho, puse dabuana e hahedokilaia, bena rahurahu ai e helai diho.
7Bena ena hahedua herevana e gwauraia hedinarai bona e siaia lao, Nineve tanona idoinai, eto, Hanua pavapavana bona ena lohia taudia edia haheḡani binai: Taunimanima eiava ubu-ubu ḡauna, boromakau serina eiava mamoe serina, ese ḡau ta basie ania; basie aniani bona ranu basie inu;
8a taunimanima bona ubu-ubu ḡauna ese puse dabuadia bae hahedokilai, bena bae tai lolo-lolo, Dirava bae tai henia; oibe, iboudiai ese edia kara dika amo bae raka oho bona imadia edia daḡedaḡe karadia amo danu.
9Daika dibana, reana Dirava na baine helalo kerehai, bona ena badu-ḡaraḡara amo baine raka oho, bena ita na basita mase.
10Dirava ese edia kara e itaia, edia dala dikana amo ede e raka oho toma; bena Dirava ese baine hadikalaidia eto karana amo e helalo kerehai; bena se karaia.