1Na ani dad mabtas fngewe Solomon i tingà Dabid, na harì di banwe Israél.
2Sulatan i kdee ani, du tdoan i dad to, du fye gmadè ale i glut kfulung mdà di Dwata, na dnilèla i fyetdò, na glabatla i dad gal gman too mngalam gumtatekan,
3du fye dnawatla na lalòla i gadèla fye, du fye matlu i nimòla di demela to,
4du fye i dad to kulang i kfulung faldam là ale gasyat, na gmadè na fulung i dad lamnok mebe i ktola di fye,
5gafatnù di gnadè i dad to fulung faldam, na malak i dad to nun kaglabat,
6du fye glabatla i dad gal gman too mngalam gumtatekan, na i dad fléd gal gman i dad to nun gnadè.
7Silang ge mbaling to nun gnadè, ku funa nun klikoam di Dwata. I dad to là fulung faldam knangla kfulung, na là ale mayè ku nuntamdò dale.
8Tingàgu, toom lalò i kafngeweta ge, na nangam nlifet i tdò yéam.
9Du ku laloam i tdòmi ge, matnù i kafye ldamam, salngad ku lamsak ge i dad fye baweh kas, na matnù i kafyebaweham.
10Tingàgu, nang ge magin dad to gamsalà di klakla ge, ku manla, “Flal ge, magin ge gami, meye ito to bnanoito, balù dad to landè salà meye ito dalan kiboito mlayam dale.
12Di kiteito i dad to ani kadang mto ale fa, bay di kafngeito mlayam dale mati ale.
13Na teenito kadang dee bung knun, na too fnò i gumneito kadang i tnakuito.
14Na, magin ge gami, na i kdee tnakuito kadang sansalelito.” Ani gman i dad to gamsalà.
15Kabay tingàgu, nang ge magin dad to gambet ani, fawag ge di dale,
16du too ale mlal mimò sasè, na mlal ale manò.
17Neyem, ku nite i dad anuk i kimoam fawel, fulung ale fawag,
18bay dad to gambet én mahal, du là ale fulung fawag di sasè nimò, bay baling dale taban i fawel nimòla na gafalmo dale.
19Taman i dad to mwè i knun demela to, fagu di klabè, nun kalmola.
20I kfulung faldam flingen di satu to gal tamlo, na tamlo kenen di dalan di gunun dad to, na di fadyan, du kayeanku lingela i tdoan.
21Falbongan i taluan di gufusuk banwe, na balù nè gustifun dad to,
22na manan, “Gamu dad kulang kfulung faldam, kan ku fadlug gamu di làyu kfulung? Gamu dad madoy, kilen i katlagyu madoy? Gamu dad là fulung faldam, tan i kloyu mnang i glut kfulung?
23Ku flinge gamu i kngakgu gamu, nun fye fngewegu gamu mdà di fandamgu, na fgadègu gamu i kfulunggu faldam.
24Kabay du knagolyu agu di katlogu gamu, na landè flinge deg di kalakgu,
25na fbayàyu i kafngewegu gamu, na làyu dnawat i kngakgu gamu,
26taman di kakel i bong kaflayamyu nulégu gamu, na di kakel i bong klikòyu nadoygu gamu.
27Na di kakel i too sè klikòyu, na too sè kaflayamyu, na too sè ksamuk mlibut di gamu, tloyu agu. Kabay di katloyu deg, là agu tmimel gamu, fanngabalyu agu, bay làyu agu teen.
29Du là gamu mayè gmadè i kaglut, na là gamu mayè mimen Dwata,
30na tooyu knang i kafngewegu gamu, na làyu dnawat i kngakgu gamu,
31taman du én kayèyu lalò gamu knayè, là fakay ku là mulê di gamu bunge di ksasè nimòyu.
32Du i dad to kulang kfulung, mlal ale mati, du là ale mayè fulungfaldam, na i dad là fulung faldam, du làla knabas i kfulung, gamdawat alekadang i kalmola.
33Kabay balù simto flinge di deg manak i knean, na galwà kenen kakel i sasè na landè gamlikòkenen.” Ani gman kfulung faldam.
