1Tingàgu, ku makang ge na ge mayad uteng i demem to,
2neyem ken mfawel ge di kfakangam.
3Tingàgu, ku tadéén ge di falel i demem to, ani nimoam, du fye galwà ge di kfakangam. Salu ge ditù di kenen na fdanaam i ktom, na toom fni di kenen ku began ge falwà di kfakangam di kenen.
4Nang ge kudang balù ftud silang ku tagalwà ge.
5Falwaam i ktom di fawel, gambet i kfulung i anuk falwà i kton difawel, ku demen uhe, falwaan i kton du mila i to dmulak.
6I to là mayè mimò, fye ku fafulung kenen faldam salngad i dad gulam, du too ale mimò.
7Landè ulula mebe dale,
8bay balù landè ulula, too ale musek i knaanla di bang i nungumwèla, du tagàla di bang klandèla.
9Kabay ge, i là mayè mimò, tan i klom kudang? Na kilen i kukatam?
10Tmimel i to là mayè mimò manan, “E ftud agu na kudang agu fa làmlo.” Ani gman i to là mayè mimò.
11Kabay klon kudang makto kel di kenen klandean, salngad kakel i to tmaku mebe tek.
12I to sasè landè gukmamu, balù nè gusalun gal tmulen kéng.
13Én gukmamun i dad matan, dad blian, na dad kmalan, falyakan du fye nun gafgawan.
14Na too fnò sasè di nawan, du toon fandam i kiboan mimò sasè, na balù nè gusalun, mebe kenen i ksamuk.
15Na du ani nimoan, makto kel i too sasè gaslokan, na landè gugalwaan.
16Nun nam too knang nawa Dwata, fitu kadì i knang nawan, na ani dunan,
17i kafdatah, i ktulen kéng, i kbanò dad to landè salà,
18i gal faldam kibò mimò sasè, i mlal mimò sasè,
19i kdalam di salà, i mebe kasnang nawa i dad to sgalak.
20Tingàgu, toom lalò i kafngewe maam, na nangam nlifet i tdò yéam.
21Toom busek ani di fandamam, na toom busek di lam i nawam, du fye laam glifet kel di atuan.
22I kafngewela i malak ge di dalan gumagum, na kamlung ge di kifu, na mngewe ge di mduh.
23Du i kafngewe ani, salngad i saloam tmuyal i dalanam, na i kngakla, tamdò ge i kiboam mebe i ktom.
24I kafngewela, kamlung ge di boyo i libun mkat lagi, na gafadnan ge di kladal talù yaan i demem to.
25Nang ku én kibalam i kafye bawehan, too ge fgeye i ktabugan ge fagu di keyen di ge.
26I libun mkat lagi, là mabtas i bayadam kenen, bay klafà i yaan, too bong i bayadam du gamgebe ge di gumalmom.
27Tan i fandamam, fakay ku lamkaf ge lifoh na là sakuf i klaweham?
28Na fakay ku mdà ge di minit bala, na là myu i bliam?
29Salngad gukelam ku nlafaam i yaanam, du balù simto mimò ani, là fakay ku là maflayam.
30Là mnang dad to i satu to tmaku i knaan, ku mdà di kbitilan.
31Kabay knean, ku makfè kenen fuléan di to mangfun fitu dulêkalbongan, kel di kti i kdee nfunan.
32Kabay mahal i satu to mlafà i yaanan, landè sa kaglabatan, na toon falmo i kton.
33Na i dengegan too malmo, na too kenen fatduk, na i bong kyaan là lana kel di atuan,
34du yaan i libun ani, too malbut du mingà nawan, na landè gusen i kbalasan.
35Là magwè i kalbutan balù tan i kalbong bayadam na blém kenen, laan dnawat dun.
