1Tingàgu, flinge ge i tdògu ge, na nangam nlifet i kafngewegu ge.
2Toom fkah di nawam fngewegu ge du fye mlawil ge, na toom fangeye i klaloam i dad tdògu ge, salngad i kafgeyem i dadmatam.
3Toom fkah di fandamam, na di nawam i dad tdògu ge, du fye laam glifet dun.
4Knabasam i kfulung, salngad i kakabasam i flanekam, na knabasam i kaglabat, salngad i kakabasam i demem sgalak,
5du én kamlung ge di boyo i libun mlafà i yaanan, na gafadnan ge di kladal taluan.
6Satu duh meye agu di bintanà i gumnègu.
7Na teengu dee sawang lagi na kulang kfulungla, bay teengu satu di dale i landè kaglabatan.
8Magu kenen di dalan mdadong di gumnè i satu libun, na là mlo mdadong kenen di gumnean.
9Na i kagkah i duh, fan sdaf, na tafan kifu.
10Na snitong i libun i lagi ani, na kamlaweh kenen i klaweh i libun mkat lagi, na tafandaman kiboan moyo kenen.
11Labè kenen na landè kyaan, na dee gal gusalun, na laan gal mnè di gumnean.
12Slaan déén kenen di kilil i dalan, slaan déén di fadyan di gunundad to, fatanan du neyen ku simto bnoyon.
13Na di kiten i lagi ani, lkafan, na nalakan, na too meye di kenen na manan,
14“Duh ani tadnohògu i fakanggu, na nun utengu mdà di kadsùgu.
15Taman fanngabalta ge, na du teenta ge taman smitong agu.
16Na nlafingu i gumilègu i too fye baweh batak safut fdu di banwe Idyif.
17Na tankokgu fangbun i gumilègu i dnagit mira, alo, na sinamon.
18Taman magin ge deg du nimòta i knayèta i gaflehew gite kel mwal.
19Là déén yaangu di gumnè, du mawag gusalun.
20Neben sa bong filakan, taman laan mlal samfulê, lwe linggu fa.” Ani gman i libun mlafà i yaanan.
21Na tagboyon lagi ani fagu di kladal i dad gmanan.
22Taman fanlalan lalò i libun ani, salngad i baka dyol salu di gumatin, salngad i uhe mfawel di fawel,
23na nun tbak di fufungan, salngad i anuk di bnas mayeng ditù di fawel, laan gadè i gukelan kadang di fati.
24Dad ngàgu, flinge gamu i tdògu gamu, na mimen gamu i mangu ani.
25Nangyu faloh i nawayu magin di ayè i libun gambet ani, na nang gamu mlalò i kenen dalan.
26Du tadee lagi falmon, na i dad lagi tamati du mdà di kenen, làyu gse dun du toodee.
27Na ku salu gamu di gumnean, én sa gusaluyu di banwe i dadmati, na i dalanyu ani salu di fati.
