1Nagra Poli'nagi Sailasi'ene Timotigata Tesalonaika mni'naza mono nagamota Anumza Nafatine, Ranti Jisasi Kraisinte tragotetma mni'nazamotarega, ama avona kre'neramunankino,
2Anumza Nafatimofone, Ranti Jisasi Kraisi Asunku'zamo'ene rimpa fruzamo'a tamagrane mesie.
3Nenfugata maka knama tamagriku'ma tagesa nentahita Anumzamofona susu hunentonazamo'a, e'i knare'zantfa hu'ne. Na'ankure tamagri tamentintimo'a rura huno nevigetma, magoke magokemotma ovesinte avesintema nehaza zamo'a hageno ra nehie.
4E'ina hu'negu, tamentinti nehutma, maka tamazeri havizama nehazafine, knazama tamizafima kazikazi hutmaneaza zankura, Anumzamofo mono nagamofo amu'nompina tamagri tamagenkema nezamasamita, tamagrikura akaginerone.
5E'i ana maka'zamo'a Anumzamo'a fatgo refko zama'a erifore nehiankino, e'inahukna tamatazama e'neriza zampi Anumzamo'a tamazeri retro nehina, Anumzamofo kumara erigahaze.
6Na'ankure Anumzamo fatgo zanke nehia Nekino, tamazeri havizama nehaza vahera, nona'a huno zmazeri haviza hugahie.
7Hianagi Ramo Jisasi'ma monafintima hanavenentake ankero vahe'anema, teve anefa'ane eama hanuno'a, Agra kanazampintira tamazeri o'za nehuno, tagri'enena knazantifintira eme tazeri o'za hugahie.
8Hanki Anumzamofo ke'za antahiza nosuza, Ranti Jisasi Kraisi knare musenke novaririza vahera, nona'a huno knazana eme zamigahie.
9Ama ana vahe'mo'za havi mizazami e'neriza, Ramofonteti'ene hanavenentake masa'afintira atre'za afete'are mni'ne'za, zamata erivava hugahaze.
10Anazama fore'ma haniana Ramoma ete esianknarera Agri vahe'ma mni'naza vahe'mo'zama ra agima nemisafina, tamagranena ana vahe amu'nompi maninetma, ra agi amigahaze. Na'ankure tagrama Agriku'ma huama hu'na kerera, tamagra tamentinti hu'naze.
11Anumzamo huhampri tamantenegeta tamagrikura nunamuna huneramantonankino, Anumzamo'a tamazeri knare hina, Agri vahe manigahaze. Tagra nunamuna huvava nehunankino, Anumzamofo hanavemo'a tamaza nehina, maka knare'zama hunaku'ma nehaza zana nehuta, tamamentinti hutma hugahunema nehazazana hugahaze.
12E'inahuma hanutma Ramofo Jisas Kraisi Agi erihentesga nehnageno, Anumzantine Ranti Jisas Kraisi'enena asunkuzama'areti tamagi erisaga hugahie.
