1ABuulus dhala Silwaanus dhala Ṯimuṯẖawuus mo. Eya ḵaniisa gi Pan Tasaluniiki mo eya Arumgimis jin ta’da Babam bana mo dhali Tap̱a Yesus Ḵrisṯẖos mo be.
2A’the e um mo dhali moŋḵu’th is eya Arumgimis a’di jin ta’da Baba mo dhali Tap̱a Yesus Ḵrisṯẖos mo be.
3Am ḵara ba/ mina c̱i mo jin ’boruwa Arumgimis bwa i is mo isa yempa/ mo gom um mo iwaḵ mo, me’d jin gama a’di ki gam mo, haali/ moŋgam gwo is bum ’twaḵki’d ka enthus mo dhali mo/en bum ka ’deṯe/ ’deṯe/ mo gom mo/en jin ena um ka rem ’kup̱ mo a’di markunu is mo be.
4Wakan aman ki is bam dhuna ’ba/ ki ca mo gom um mo eya risa ḵaniisa ma Arumgimis mo gom sho’k bum jin ṯelkina um mo dhali moŋgam gwo is bum eya ris mom bum jin ’koshu um mo dhali e monṯo’c bwa jin ’kokina umi mo’dim ’kup̱ mo be.
5Mii yansan a’di mishu mo eya tente/ mo ki gwon dwall ma Arumgimis jin ta’da ḵar/e mo ki um minu ’taki dhu ki uni gun ha me’d mo gom Bampa/ ma Arumgimis mo gom a’di jin ’koshkina um is ka nyor mo be.
6Haali/ Arumgimis ka jiŋ gana/ karki a’di ki miiŋḵar/e mo mmoraḵ monṯo’c bwa ibway mo ki uni gwansan kun ṯo’cki um bwa mo be
7dhali mmoc̱i um mo ma si/is mo, um kun tashkunu ki bwan diṯin mo nyaḵki am mo me’d jin mina Tap̱a Yesus ’ceeyu mo ’peni momis mo nyaḵki iman’doyu gwom piti kun ’bitha’bi’th mo e o’d jin shwa’d ka le’dan mo,
8mmorica ri’c ap̱o/ uni gwansan kun ’koki misha Arumgimis mo dhali ap̱o/ uni gwansan kun ’koki ha gwom ’borga/ gi Tap̱a Yesus bana e mo mmomii mo.
9Uni mina isi ’kosh ka nyor mo gom gwon dwall jin toru gwo ’twa/a ’cesh mo gom mii ma ḵar/e mo, a’di jin ta mo jin minu ’ce’d sho’k ki sule/ ya ye ’ba/ mo dhali mo jin dheru bwa ki sule/ mo ’peni buŋ’kus gi Tapa mo dhali ’peni monycam piti gi mom’bi’th mo
10me’d jin mina a’di p̱u’du/ ka tee c̱aan mo ki a’di minu kar ki ca mo e kum piti kun dheleladhelel mo dhali a’di min ma ris ’kwani ’baar mo mer mo, uni kun gamki a’di gwo is mo, haali/ gwo jin ṯoru e um mo tani gamkunu is mo be.
11Itagi ’pemen yan mo isa yempa/ mo tani aman ’thokina mo gom um mo ka Arumgimis bana midi dhu um ki uni kun ha me’d mo ka yuḵ piti mo dhali thima ris ’kup̱ mii ’baar mo kun ’boron mo dhali mii kun piyin mo ’peni mo jin gamu gwo is mo ki mom’bi’th piti mo.
12Wakan ki gway gi Tap̱a Yesus bana mo minu kar ki ca mo e um mo dhali um e a’di mo isi me’d gwo ma ’the ma Arumgimis bana mo dhali Tap̱a Yesus Ḵrisṯẖos mo be.
