1Ẽkĩa Pablo. Silvano ikaino Timoteo ikaino nõ mato kirika kenexõ fomai. Efe yora mĩshtichi, mã Epa Nios Ifofaano pexe rasi Tesalónica anoxõ, mãfi nõko Epa Nios fe rafekõiakĩ nõko Ifo Jesucristo feri mã askakõia.
2Nãskakẽ Epa Nios feta nõko Ifo Jesucristo mato noikĩ mato sharakõifanõ, askatari mato imasharakõinõ mãto õiti mẽranoax mã anã fekaxtenõma.
3Efe yora mĩshtichi, mã taefakĩ mã Nios chanĩmara fani. Nãskakẽ iskaratĩa mã chanĩmara fakĩ finakõia. Askatari mã rama Nios Ifofaax mã nõinãsharakõini. Nãskakẽ iskaratĩa mã nõinãifinakõi. Nãskakẽ nõ matoõxõ Nios kĩfikĩ iskafa fafafãini: “Aicho Epa Niosi, mefe yorafãfe Tesalónica anoafãfe mia Ifokõi faafoki,” ixõ ẽ mato kĩfixõfafãini.
4Nãskakẽ Niospa mekaõnoa nõ ato yoifofãsafakĩ nã Nios Ifofaafo fe nõ ato fe ichanãitĩa nõ matoõnoa ato yoimis iskafakĩ: “Nã Nios Ifofafo Tesalónica anoafo ãto kaifo fetsafãfe ato omiskõimamisfo. Nãskakẽ afara chakafãfe ato afeskarafafiaino a shinãtamaroko Jesús Ifokõi fakaxõ tenekõimisfo,” ixõ nõ matoõnoa ato yoixomis.
5Nãskakẽ mã Jesucristoõnoax omiskõifixõ mã tãpitiro Niospa isharakõixõ mato yoikĩ iskafaino: “Nafo isharakõiafo,” mato faino mã afe ipaxatiro. Nãskax mã mã omiskõifiax chipo mã afe isharapakenaka.
6Niospa mẽstekõi fisti shinãmis, a mato omiskõimamisfo kopikiri chipo Niospa ato omiskõimaxii.
7Nãskakẽ nõko Ifãfe mato tenemasharaxii mã anã omiskõinõma a noko akai keskafakĩ mã nõko Ifo fotoxõ. Akka nõko Ifo nai mẽranoax fotoi oa chii xoisai itikikeraxii ãfe ãjiri finakõiafo fe oi.
8Akka nõko Ifo oxii a Nios Ifofamisfoma ato omiskõimaniyoi, askatari ãfe meka sharaõnoari nikamisfomano ato omiskõimaxii.
9Nãfo omiskõipakenakafo, anãkai nĩpanakafoma. Nõko Ifokai õipakenakafoma, askatari ãfe shara yafi ãfe kerex shara õipakenakafoma.
10Akka nõko Ifo oaino, nã penata a Ifofamisfãfe aõnoa yoisharaxikani. Nãskafaifono nã Nios Ifofamisfãfe õiketsaxikani, akka mã mã nikamis nõ mato yoiaito.
11Nãskakẽ nõ matoõxõ Nios kĩfikĩ iskafa fafafãini: “Epa Niosi, mĩ ato imapaiyai keskafakĩ ato imasharafe mia Ifofakaxõ fetsafo sharafapaikani kiki mĩ kerex shara ato inãfe,” ixõ ẽ matoõxõ Epa Nios kĩfimis.
12Nãnori nõ mato Epa Nios kĩfixomis, fetsafãfe mato õikakĩ nõko Ifo Jesúsnoa yoisharanõfo iskafakakĩ: “Jesús afama mĩshti fatiro, nãskaxõ afe yorafo a keskara sharakõi ato ima,” ixõ aõnoa yoisharanõfo. Nãskakẽ Epa Nios feta nõko Ifo Jesucristo mato noiyanã a keskara sharakõi mato imatiro.
