2 SAMUƐLI 23:1-17 - Luda yã takada kↄ̃n Bokobaru yão

2 SAMUƐLI 23:1-17

Click on verse(s) to share them!

¹Yã zãa kɛ̀ Dauda òn yɛ̀. Yɛsɛ nɛ́ Dauda yãn yɛ̀, gbɛ̃ kɛ̀ Luda à gbà gbãaa yã'onamɛ. Yakubu Luda à kà kí ũ, àmbe Isarailinↄ lɛ̀dari maaa ũ.

²Dii Nini yã dàmɛ, à yã da ma lɛ́n.

³Isarailinↄ Luda yã ò, Isarailinↄ Gbɛ̀si bèmɛ: Tó gbɛ̃ kí blè gbɛ̃nↄnɛ a zɛ́a, tó à kí blè vĩakɛna Ludanɛ guu,

⁴ègↄ̃ dɛ lán ↄfãntɛ̃ bↄɛna gupuraa bàmɛ, lán gudↄna gukɛ̃kↄ̃ana bà, lán lou kɛ̀ è tó sɛ̃̀ bↄɛ bà.

⁵Ma bɛdeenↄ nna kↄ̃n Ludaoroo? À bà égↄ̃ kúmao ai gurↄ píngi. À à yã gↄ̃̀gↄ̃ píngi, à seka vĩro. Eé ma mìsina yã kɛkɛ à pàparoo? Eé pↄ́ kɛ̀ má à nii vĩ kpáma píngiroo?

⁶Gbɛ̃ pãanↄↄ dɛ lán lɛ̀ bàmɛ, wè zↄ̃ wà zĩnnamɛ, è sí kũ kyáuro.

⁷Gbɛ̃ kɛ̀ yezi à ↄ páa, séto àgↄ̃ gↄ̃kɛbↄ ke gò kũna, è tɛ́ sↄ̃a guu kɛ̀ à kún.

⁸Dauda gↄ̃sagbãaanↄ tↄ́n yɛ̀. Takemↄ gbɛ̃ Yasↄbeamun zĩ̀kari tↄ́de gↄ̃ↄn aagↄ̃ↄnↄ gbɛ̃nsi ũ. Àmbe à sári sɛ̀ gↄ̃ↄn wàa siigↄ̃ↄnↄzi à ń zↄ̃zↄ̃o ń píngi gurↄ dↄ̃nkↄ̃ zĩ.

⁹Gbɛ̃ beee gbɛra Dodai nɛ́ Ɛlɛaza, Ahoa gbɛ̃ kú zĩ̀kari gↄ̃ↄn aagↄ̃ↄ pìnↄ tɛ́ dↄ. À kú kↄ̃n Daudao gurↄↄ kɛ̀ Isarailinↄ kàkↄ̃a aↄ̃ zĩ̀ kà kↄ̃n Filisitininↄ zaa Pasadamimu. Isarailinↄ bↄru kpɛɛ,

¹⁰àmbe à fɛ̀ɛ à Filisitininↄ dɛ̀dɛ ai à ↄↄ yã̀a à gbã̀gbã à gↄ̃̀ fɛ̃ɛda pá kũna. Dii tò à zĩ̀ blè maamaa zĩ beeea. Zĩ̀kari kpaaanↄ ɛ̀ara wà sù aↄ̃ à lè, mↄde pↄ́nↄ pitina gɛ̀nↄa yãnzimɛ.

¹¹Gbɛ̃ beee gbɛra Age nɛ́ Sama gusĩsĩde gbɛ̃. Kɛ̀ Filisitininↄ gãli kàkↄ̃a guu kɛ̀ blá bú kún, Isarailinↄ bàa lɛ̀ńnɛ,

¹²àmbe à zɛ̀ à gì bú pì dagura. À bú pì sìḿma à Filisitininↄ dɛ̀dɛ. Dii tò à zĩ̀ blè maamaa.

¹³Pↄ́kɛ̃gurↄ wↄ́rↄngↄde gↄ̃ↄn baaakurinↄ tɛ́, gↄ̃ↄn aagↄ̃ↄnↄ bↄ̀ wà gàa Dauda kiia zaa Adulamu gbɛ̀wɛɛn. Filisitininↄ gãli bùra kaɛna Rɛfaimu guzurɛn.

¹⁴Gurↄ beeea Dauda kú sɛ̃̀tɛ pↄ̀rↄtu, Filisitini gudãkparinↄ sↄ̃ↄ kú Bɛtɛlɛmu.

¹⁵Dauda e a bɛ í ni dɛɛ à bè: Dé bé eé gá à Bɛtɛlɛmu bĩilɛ lↄ̀gↄ'i tↄ́mɛɛ?

¹⁶Wↄ́rↄngↄde gↄ̃ↄn aagↄ̃ↄ pìnↄ bé wà gàa wà gɛ̃̀ Filisitininↄ bùran, aↄ̃ Bɛtɛlɛmu bĩilɛ lↄ̀gↄ'i tↄ̀ wà sùo Daudanɛ. Ben èe we à mìro, à kwɛ̀ɛ Dii aɛ sa'o'i ũ.

¹⁷À bè: O'o Dii, mɛ́ fↄ̃ mà í kɛ̀ miro. Gbɛ̃ kɛ̀ aↄ̃ gì ń wɛ̃̀ndizinↄ arumɛ. Èe we à mìro. Wↄ́rↄngↄde gↄ̃ↄn aagↄ̃ↄ pìnↄ yãkɛnan gwe.