2 Samuel 23:1-17

¹David go tama a Jesse, go taane a God dela ne haga gila aga. Mee ne hili go di God o Jacob belee hai di king, gei ne dili nia daahili gi Israel. Deenei di hagaodi o nia helekai muliagina a David ala ne hai:

²Di Hagataalunga o Dimaadua dela e haga helehelekai au. Nia hagahonu o ana helekai aanei i di gili ogu malau ngudu.

³Di God o Israel gu helekai, di Madaloohi o Israel gu helekai mai gi di au boloo, “Di king dela e dagi i di tonu, dela e dagi gei e hagalaamua a God,

⁴mee e hai gadoo be di maahina o di laa dela ma gaa hobo luada i di laangi dela e dei ono gololangi ai. Mee e hai be di laa dela e haga madamada nia geinga o lodo henua i muli di uwa.”

⁵Deenei di hai a God dela gaa hila mai ai gi ogu hagadili, idimaa, Mee gu hai mai dana hagababa hagalee mooho, di hagababa dela e hagalee huli. Ma go di mee deenei dela e hiihai ginai au. Deenei di mee dela gaa hai dogu aali. Malaa, God la koia ga haga gila aga di maa.

⁶Gei ogo digau huaidu le e hai be nia geinga duduia ala e kili gi daha, e deemee di bili ginai tangada gi ono lima.

⁷Tangada dela e bili gi nia maa e hai hegau gi di baalanga be di amu daalo, nia maa gaa wwele hagatau.

⁸Aanei nia ingoo o digau dauwa a David maaloo: Togo dahi go Josheb Basshebeth tangada o Tachemon, tagi ni “Digau Dogodolu”. Mee ne heebagi gi dana daalo gi nia daane e walu lau (800), ga daaligi digaula gii mmade i tauwa hua e dahi.

⁹Togo lua i “Digau Dogodolu” maaloo go Eliaser tama a Dodo, tangada i di madahaanau o Ahohi. Di laangi e dahi, gei mee ginaua mo David gu heebagi gi digau Philistia ala ne dagadagabuli belee heebagi gi digau Israel. Digau Israel guu llele gi daha,

¹⁰gei mee e duu hua igolo, ga heebagi gi digau Philistia, gaa dae loo gi dono lima gu mau dangihi gi dana hulumanu dauwa gu deemee di diiagi. Dimaadua gu aali i di laangi deelaa i nia mahi aamua. I muli hua teebagi deelaa, gei digau Israel ga loomoi gi muli gi di gowaa dela nogo iei Eliaser, ga hagabudu mai nia goloo dauwa o digau ala ne mmade.

¹¹Togodolu o “Digau Dogodolu” maaloo go Shammah, tama ni Agee tangada o Harar. Digau Philistia gu dagabuli i Lehi, di gowaa dela iai di hadagee golee laagau, gei digau Israel guu llele gi daha mo digau Philistia,

¹²gei Shammah guu duu hua igolo gi mau dangihi i dono lohongo, e abaaba di gowaa deelaa, gei mee gu daaligi digau Philistia aalaa. Dimaadua gu aali i di laangi deelaa i nia mahi aamua.

¹³Hoohoo gi di madagoaa e daamada e hadi ai taugai, digau dogodolu mai i “Digau Dogo Motolu” gaa hula gi di gowaa di bongoo hadugalaa Adullam, di gowaa dela e noho ai a David, gei di buini dauwa o Philistia nogo noho i nadau hale laa i di gowaa mehanga gonduu i Rephaim.

¹⁴Di madagoaa deelaa, gei David e noho i hongo tama gonduu gu abaaba, gei digau Philistia guu noho i Bethlehem.

¹⁵David gu hidihidi huoloo, ga helekai, “Au gu hiihai huoloo bolo tangada gii hana gi gaamai hunu wai e inu iei au, mai i di monowai dela i di ngudu di bontai di abaaba o Bethlehem!”

¹⁶Digau dauwa maaloo dogodolu aalaa gaa hula laa lodo di waahale laa o digau Philistia, ga udu mai nadau wai i di monowai deelaa, ga gaamai gi David, gei David digi inu nia maa, gaa dui hua gi lala bolo e hai tigidaumaha ang gi Dimaadua.

¹⁷Gei mee ga helekai, “Meenei Dimaadua, au e deemee di inu nia wai aanei! Maa nei bolo au ga inu nia maa, gei au e ala be au ne inu nia dodo o digau dogodolu aanei ala ne de hagahuodia nadau mouli i lodo di hagalliga di haingadaa!” Malaa, gei mee digi inu nia wai aalaa. Aanei nia hai haga goboina huoloo ala ne hai go “Digau Dogodolu” maaloo aanei.