2 SAMUƐLI 23:1-17 - Luda yã takada kũ Bisã yão

2 SAMUƐLI 23:1-17

Click on verse(s) to share them!

¹Yã kpɛde kũ Dauda òon dí. Yɛsɛ nɛ́ Dauda yãn dí, gbɛ̃ kũ Luda a gbà gbãna yã'onaamɛ. Yakubu Luda a kà kína ũ, àkũmɛ Isarailanↄ lɛ̀dari mana ũ.

²Dikiri Nini yã dàmɛnɛ, a yã da ma lɛ́n.

³Isarailanↄ Luda yã ò, Isarailanↄ Gbɛ̀si pìmɛnɛ: Tó gbɛ̃ kí blè gbɛ̃nↄa a zɛ́a, tó à kí blè vĩnakɛna Ludanɛ gũn,

⁴àdigↄ̃ de lán ifãntɛ̃ bↄtɛna gupura bàmɛ, lán gudↄna gukɛ̃kↄ̃anaa bà, lán legũ kũ àdi tó sɛ̃̀ butɛ bà.

⁵Ma bedenↄn nna kũ Ludaoroo? A bàka nigↄ̃ kú kũmao ari gↄrↄ sĩnda pínki. À a yã gↄ̃̀gↄ̃ pínki, à sika vĩro. Ani bo kũ ma surabanaaoroo? Ani pↄ́ kũ má a ni vĩ kpáma pínkiroo?

⁶Gbɛ̃ pãnↄn de lán lɛ̀ɛ bàmɛ, òdi zↄ̃ ò zukũnamɛ, òdi kũ kyáuro.

⁷Gbɛ̃ kũ à ye à ↄ kɛa, séto àgↄ̃ gↄ̃kɛbↄ ke gò kũna, àdi tɛ́ naa gu kũ à kún.

⁸Dauda gↄ̃sa gbãnanↄ tↄ́n dí. Takemↄ gbɛ̃ Yasↄbeamumɛ zĩ̀kari tↄ́de gbɛ̃nↄn aakↄ̃nↄ gbɛ̃ zↄ̃kↄ̃ↄ ũ. Àkũ mɛ́ à sári sɛ̀ gbɛ̃nↄn wàa siikↄ̃nↄi à ń zↄ̃zↄ̃o ń pínki gↄrↄ dokↄ̃nↄ zĩ.

⁹Gbɛ̃ bire gbɛra Dodai nɛ́ Ɛlɛaza, Ahoa gbɛ̃ kú zĩ̀kari gbɛ̃nↄn aakↄ̃ pìnↄ tɛ́ dↄ. À kú kũ Daudao gↄrↄ kũ Isarailanↄ kàkara ò zĩ̀i kà kũ Filisitininↄ zaa Pasadamimu. Isarailanↄ bòru kpɛ kpa,

¹⁰àkũ mɛ́ à fùtɛ à Filisitininↄ dɛ̀dɛ ari a ↄ wã̀ à gↄ̃̀ fɛ̃nɛda pá kũna. Dikiri tò à zĩ̀i blè manamana zĩ birea. Zĩ̀kari kparanↄ ɛ̀ra ò sù ò a lè, ama pↄ́nↄ porona gɛ̀nↄa yãimɛ.

¹¹Gbɛ̃ dí gbɛra Age nɛ́ Sama gusĩsĩde gbɛ̃ kun. Kũ Filisitininↄ gã̀a kàkara gu kũ blá bú kún, Isarailanↄ bàa lɛ̀ńnɛ,

¹²àkũ mɛ́ à zɛ̀ à gì bú pì dagura. À bú pìi sìḿma à Filisitininↄ dɛ̀dɛ. Dikiri tò à zĩ̀i blè manamana.

¹³Pↄ́kɛ̃gↄrↄ wↄ́rↄgↄde gbɛ̃nↄn baraakurinↄ tɛ́, gbɛ̃nↄn aakↄ̃nↄ bò ò gɛ̀ɛ Dauda kĩnaa zaa Adulamu gbɛ̀wɛɛn. Filisitininↄ gã̀a bùra katɛna Rɛfaimu guvutɛn.

¹⁴Gↄrↄ birea Dauda kú sɛ̃̀ntɛpↄrↄtu, Filisitini gudãkpãrinↄ sↄ̃ ò kú Bɛtilihamu.

¹⁵Dauda tɛni a bɛ í ni dɛ à pì: Dí mɛ́ ani gɛ́ à Bɛtilihamu bĩnilɛ lↄ̀gↄ'i tↄ́mɛnɛɛ?

¹⁶Wↄ́rↄgↄde gbɛ̃nↄn aakↄ̃ pìnↄ mɛ́ ò gɛ̀ɛ ò gɛ̃̀ Filisitininↄ bùran, ò Bɛtilihamu bĩnilɛ lↄ̀gↄ'i tↄ̀ ò sùo Daudanɛ. Akũ adi we à mìro, à kↄ̀tɛ Dikiri arɛ sa'o'i ũ.

¹⁷À pì: Haba Dikiri, mani fↄ̃ mà í díkũ miro. Gbɛ̃ kũ ò gì ń wɛ̃̀ndiiinↄ arumɛ. Adi we à mìro. Wↄ́rↄgↄde gbɛ̃nↄn aakↄ̃ pìnↄ yãkɛnaan gwe.