Text copied!
CopyCompare
Luda yã takada kↄ̃n Bokobaru yão - 2 SAMUƐLI

2 SAMUƐLI 3

Help us?
Click on verse(s) to share them!
1Zĩ̀ kɛ̀ Solu bɛdeenↄↄ kà kↄ̃n Dauda bɛdeenↄ gì kɛ̀. Dauda gbãaa e kaara, Solu bɛdeenↄ sↄ̃ gbãaa e lagoo.
2Nɛ́gↄ̃gbɛ̃ kɛ̀ Dauda ì Ɛblↄnunↄ tↄ́n yɛ̀. À káaku tↄ́n Aminↄ. À da tↄ́n Ainↄama, Yɛzɛrili gbɛ̃mɛ.
3À plaade tↄ́n Kiliabu. À da tↄ́n Abigaili, Nabala gyaanↄ Kamɛli gbɛ̃mɛ. À aagↄ̃de tↄ́n Abusalomu. À da tↄ́n Maaka, Gesuu kína Talamai nɛ́mɛ.
4À siigↄ̃de tↄ́n Adonia. À da tↄ́n Agi. À sↄↄrode tↄ́n Sefatia. À da tↄ́n Abitali.
5À swɛɛdode tↄ́n Itiriamu. À da tↄ́n Egela. Dauda nↄↄnↄ nɛ́ pìnↄ ì Ɛblↄnumɛ.
6Gurↄↄ kɛ̀ Solu bɛdeenↄↄ e zĩ̀ kaa kↄ̃n Dauda bɛdeenↄ, Abana e gbãa kũu Solu bɛdeenↄ guu.
7Solu nↄ yìgisai vĩ yã, à tↄ́n Rizipa, Aya nɛ́mɛ. Isibosɛ bè Abananɛ: N kɛ dia n daɛ kↄ̃n ma de nↄↄo?
8Abana pↄ fɛ̃̀ maamaa Isibosɛ yã pì yãnzi à bè: Gbɛ̃ɛ gɛ̀n ma ũ Yudanↄ kpaↄ́? Mɛ́ɛ gbɛ̃kɛɛ kɛɛ n de Solu bɛdeenↄnɛ kↄ̃n à dãaronↄ kↄ̃n à gbɛ̃nnanↄ ai kↄ̃n a gbã̀ao. Mɛ́ɛ n na Daudanɛ a ↄzĩro, ben nɛ́ɛ ma taari ee nↄgbɛ̃ pì yã musu saa?
9Tó mɛ́ɛ lɛ́ kɛ̀ Dii gbɛ̃̀ Daudanɛ kɛnɛro, Luda yã kɛmɛ pãsĩpãsĩ.
10Mɛ́ kpata sí Solu bɛdeenↄa mà tó Dauda gↄ̃ Isarailinↄ kↄ̃n Yudanↄ kína ũ sɛna zaa Dani ai à gá pɛ́o Bɛɛsɛbaa.
11Isibosɛ e sí à wè Abanala dↄro, kɛ̀ èe vĩa kɛɛnɛ yãnzi.
12Abana gbɛ̃nↄ zĩ̀ Daudaa kↄ̃n a tↄ́o à bènɛ: Dé bé à bùsu vĩi? Wà lɛdolɛ kɛ, mɛ́ dↄnlɛ lɛ Isarailinↄ bà e àgↄ̃ kúnyo ń píngi.
13Ben Dauda bè: À maa, mɛ́ lɛdolɛ kɛnyo, mↄde yã mɛ̀n doon mɛ́ɛ gbekaamma. Tó nɛ́ɛ mↄↄ ma gwa, tó nɛ́ɛ mↄ́mɛ kↄ̃n Solu nɛ́nↄgbɛ̃ Mikalaoro, ǹton tó wa wɛ́ɛ sikↄ̃lɛro.
14Dauda lɛ́kpãsã kɛ̀ Solu nɛ́ Isibosɛnɛ à bè: Ǹ ma naↄ̃ Mikala sukpamɛ. Ma anzure blè kↄ̃n Filisitininↄ gɛfↄↄo mɛ̀n basↄↄro.
15Ben Isibosɛ gbɛ̃nↄ zĩ̀, aↄ̃ nↄgbɛ̃ pì sì a zã Palatiɛli, Laisi nɛ́a.
16Ben à zã pì e gaao à tɛ́zi ai Bahurimu, èe ↄ́ↄ dↄↄ. Ben Abana ònɛ à ɛara à tá, ben à ɛ̀ara.
17Abana yã ò kↄ̃n Isaraili gbɛ̃nsinↄ à bè: Zaa zi ée wɛtɛɛ Dauda gↄ̃ dɛ a kína ũ.
18À à ká sa, zaakɛ Dii lɛ́ gbɛ̃̀nɛ à bè, é a gbɛ̃ Isarailinↄ bↄ Filisitininↄ kↄ̃n ń ibɛɛnↄ ↄzĩ ń píngi a zↄ̀bleri Dauda pì gãzĩmɛ.

19Abana yã pì dà Bɛyãmi boriinↄnɛ ń swãla dↄ. Ben à gàa Ɛblↄnu, lɛ à yã kɛ̀ à kɛ̀ Bɛyãmi boriinↄ kↄ̃n Isarailinↄnɛ pì o Daudanɛ.
20Kɛ̀ à kà Dauda kiia zaa Ɛblↄnu kↄ̃n gↄ̃ↄn baroo kɛ̀ aↄ̃ kúonↄ, ben Dauda pↄnna pↄ́blee kɛ̀ńnɛ.
21Ben Abana bè Daudanɛ: Ma dii kí, ǹ tó mà fɛɛ mà gá mà Isarailinↄ kakↄ̃annɛ ń píngi, lɛ aↄ̃ lɛdolɛ kɛnyo, nɛ́gↄ̃ dɛ bùsu kɛ̀ n pↄↄ yezi píngi kína ũ. Ben Dauda Abana gbàrɛ, à tá aafia.
22Zĩ beeea Yoabu kↄ̃n Dauda gbɛ̃nↄ sù kↄ̃n lɛ́ɛmmanao. Aↄ̃ pↄ́nↄ sì gbɛ̃nↄa maamaa aↄ̃ sùo. Abana kú kↄ̃n Daudao gwe dↄro, zaakɛ à à gbàrɛ, à tá aafia.
23Kɛ̀ Yoabu kↄ̃n zĩ̀kari kɛ̀ aↄ̃ kúonↄ kà, wà ònɛ Nɛrɛ nɛ́ Abana mↄ̀ kína gwa, ben à à gbàrɛ à tá aafia.
24Ben Yoabu gàa à kína lè à bè: Bↄ́ yãn ń kɛ̀ gwee? Kɛ̀ Abana mↄ̀ n kiia, bↄ́yãnzi ń tò à tàzi?
25Ń Nɛrɛ nɛ́ Abana dↄ̃roo? À mↄ̀ ↄ̃ndↄ̃ↄ kɛnzi, lɛ à e àgↄ̃ n gágurↄↄ kↄ̃n n sugurↄↄo dↄ̃ kↄ̃n n yãkɛnanↄ píngi.
26Kɛ̀ Yoabu bↄ̀ Dauda kiia, ben à gbɛ̃nↄ zĩ̀, aↄ̃ pɛ̀ɛ Abanazi. Aↄ̃ à lè Sira lↄ̀gↄ kiia, ben aↄ̃ↄe suuo, mↄde Dauda à yã dↄ̃ro.
27Kɛ̀ wà kà kↄ̃n Abanao Ɛblↄnu wɛ́tɛ bĩilɛa, ben Yoabu à sìsi lándↄ̃ à yezi à asiiyã onɛ bà, ben à à zↄ̃̀ a gbɛɛɛn, à à dɛ̀. À dãaro Asahɛli dɛna gɛ̃ɛn à bòa gwe.
28Beee gbɛra kɛ̀ Dauda mà, à bè: Mapi kↄ̃n ma kíkɛɛo, mɛ́gↄ̃ taari vĩ Diinɛ Nɛrɛ nɛ́ Abana dɛna yã musuro.
29Yã pì é wí Yoabu musumɛ kↄ̃n à de bɛdeenↄ ń píngi. Yoabu bɛdeenↄ égↄ̃ kuu kɛntudee ke kusu ke ɛrɛ ke gbɛ̃ kɛ̀ zĩ̀ à blè ke nↄadɛri sairo.
30Yoabu kↄ̃n Abisaio Abana dɛ̀, kɛ̀ àmbe à ń dãaro Asahɛli dɛ̀ zĩ̀lan zaa Gibiↄ̃ yãnzi.
31Ben Dauda bè Yoabunɛ kↄ̃n gbɛ̃ kɛ̀ aↄ̃ kúonↄ ń píngi: À a pↄ́kãsãanↄ gága à kɛ̃kɛ̃, à uta kãsãanↄ dada, àgↄ̃ tɛ́ aɛ kↄ̃n Abana gɛ̀o kↄ̃n ↄ́ↄ dↄↄo. Kí Dauda sↄ̃ↄ tɛ́ ń kpɛɛ.
32Ben wà à vĩ̀i Ɛblↄnu gwe. Kína sósobi ↄ́ↄ dↄ̀ gbãngbãn Abana miraa, ben baade píngi ↄ́ↄ dↄ̀ se.
33Ben kína sósobilɛ kɛ̀kii sì Abana yã musu à bè: Abana gana lán mìsaidee bà maan gweↄ́?
34Wèe n gã̀ yinnɛ n kpɛɛ kparo, wèe gata kpánnɛro, n ga lán gbɛ̃ kɛ̀ gɛ̃̀ zaakɛrinↄ ↄzĩ bà. Ben baade píngi ɛ̀ara wà ↄ́ↄ dↄ̀ dↄ.
35Baade píngi mↄ̀ wà ò Daudanɛ à pↄ́ ble ai guu gↄ̃ gá si, mↄde à ladà à bè: Tó ma burɛdi ke pↄ́ble ke dà ma lɛ́n ↄfãntɛ̃ gɛ̃na kpɛ́n sai, Luda yã kɛmɛ pãsĩpãsĩ.
36Baade píngi wɛ́ɛ tɛ̀ yã pìzi, ben à kɛ̀ńnɛ maa. Yã kɛ̀ kí e kɛɛ píngi è kɛ gbɛ̃nↄnɛ maamɛ.

37Zĩ beeea Dauda gbɛ̃nↄ kↄ̃n Isarailinↄ píngi dↄ̃̀ sa kɛ̀ kí lɛ́ kú Nɛrɛ nɛ́ Abana dɛna yãnlo.
38Ben à bè a gbɛ̃ pìnↄnɛ: Á dↄ̃ kɛ̀ Isaraili dↄn'aɛde bíta gà gbã̀aroo?
39Mamↄma sↄ̃, baa kɛ̀ Luda ma ka kí ũ, ma busa gbã̀a. Zeruya nɛ́ pìnↄ yãkɛna pãsĩ dɛ ma pↄ́la. Dii bé eé fĩa bo zaakɛrinɛ a zaa lɛ́n.