2 Samuel 23:1-17

¹Depit nein Sehsi, iei ohl me Koht ketin kasapwilada, me Koht en Seikop ketin pilada en nanmwarki, oh me kin wiahda melkahka kan en Israel. Iet kaimwiseklahn mahsen kan me Depit mahsanih:

²Ngenen KAUN-O me ketin kalokalokaia ie; audepen sapwellime mahsen mi ni kilin eweiet.

³Koht en Israel ketin mahsenier; silepen Israel ketin mahsanihong ie: “Nanmwarki me kin kaunda ni pwung, me kin kaunda ni lemmwin Koht,

⁴kin rasehng marain en ketipin me kin dakada nimenseng ni eh kin sohte depwek, ketipin me kin kalinganahda dipwen nansapw akan mwurin keteu.”

⁵Iei duwen Koht eh pahn ketin kupwuramwahwih kadaudokei kan, pwehki eh ketin wiahiong ie inou poatopoat ehu, inou ehu me sohte pahn ohla, inou ehu me sohte pahn wekidekla. Iei met me I patohwan anahnehn, iei met me pahn wia lingan en ei powehdi; eri, Koht uhdahn pahn ketin kapwaiada.

⁶Ahpw aramas suwed kan pahn duwehte dihpw tekatek me kin lekdekla; sohte me kak doahke.

⁷Ke pahn doadoahngki mete de ketieu; re pahn rongala douluhl.

⁸Iet mwaren sapwellimen Depit sounpei ndand kan: keieu Sosep Passeped mehn Takemon, me wia kaunen “Me Silimeno”; e peiki nah ketieuwo ong ohl welipwiki oh kemeirailla nan mahwentehieu.

⁹Keriaun ndand rehn me silimeno iei Eleasar nein Dodo, kisehn peneineien Aho. Rahn ehu ih oh Depit pelianda mehn Pilisdia kan me pokonpene pwehn mahweniong mehn Israel kan. Mehn Israel ko pweiekla sang irail,

¹⁰ahpw ih e sokedi tengeteng oh mahweniong mehn Pilisdia ko lao peh ko kehkla ih sohla kak kadar nah kedlahso. KAUN-O ketin powehdi rahno ni roson lapalap. Mwurin mahweno, mehn Israel ko pwurala wasa me Eleasar mihmi ie oh kihsang tehtehn mahwen ko rehn me melahr ako.

¹¹Kesilimen en ohl ndand iei Samma, nein Akee mehn Arar. Mehn Pilisdia ko pokonpene Lihai, wasa me mwetuwel en wahntuhke ehu mie. Mehn Israel ko tangasang mehn Pilisdia ko,

¹²ahpw Samma sokedi tengeteng nan mwetuwelo, doandoare mwetuwelo, e ahpw kemehla mehn Pilisdia ko. KAUN-O ketin powehdi rahno ni roson lapalap.

¹³Kerenieng ahnsoun dolung wahnsahpw, me silimen sang “Me Siliakano” ahpw kohla Peden Paipen Adullam, wasa me Depit ketiket ie, nindokon mehn Pilisdia kei mihmi nan imwarail impwal ko nan Wahun Repaim.

¹⁴Ni ahnsowo Depit ketiket pohn dohl ehu me kelpene, oh mehn Pilisdia kei kin koukousoan Serusalem.

¹⁵Depit ketin loaleidda, e ahpw mahsanih, “Ia uwen ei men emen en wadohng ie nimei pihl sang ni pwarer me mi ni ewen kelen Pedleem!”

¹⁶Sounpei ndand silimeno ahpw pepei kolahng nan kahnimpwal en mehn Pilisdia ko, re idipada pihl sang ni pwarero oh patohwandohng Depit. Ahpw e sohte men konote; ahpw e wudekihla pwehn meirongkihong KAUN-O.

¹⁷E ahpw mahsanih, “Maing KAUN, I sohte pahn nim pihlet. Pwe ma I nim, e pahn rasehng me I niminim ntahn ohl silimenet me pangala ar mour nan keper laud.” Ih eri sohte konote pihlo. Ih mepwukat wiewia kapwuriamwei en sounpei silimeno.