Sɑmuɛli II 23:1-17

¹Dɑfidi, Isɑin bii, wi Gusunɔ Yɑkɔbun Yinni u ɡɔsɑ u wɔlle suɑ, win womusɑ Isirelibɑ bɑ rɑ n kĩ bu nɔ. Win ɡɑri dɑ̃ɑki wee. U nɛɛ,

²Gusunɔn Hunde u ɡɑri kuɑ sɑɑ nɛn nɔɔn di. Win ɡɑriyɑ yi wɑ̃ɑ nɛn yɑrɑ sɔɔ.

³Gusunɔ, Isirelibɑn Yinni wi u rɑ bu kɔ̃su, u mɑn sɔ̃ɔwɑ u nɛɛ, sunɔ wi u tɔmbu kpɑrɑmɔ ɡem swɑɑ sɔɔ, mɑ win tii u Gusunɔ nɑsie,

⁴u sɑ̃ɑwɑ nɡe sɔ̃ɔ yɑnɑn yɑm bururɑm ɡuru wiru sɑri. Sɔ̃ɔ yɑnɑ yerɑ yɑ rɑ de yɑkɑ bekusu su bɑlli, ɡurɑ yɑ̀ n nɑ yɑ kpɑ.

⁵Nɡe mɛyɑ nɛn bweseru tɑ sɑ̃ɑ Gusunɔn wuswɑɑɔ. Domi u kɑ mɑn ɑrukɑwɑni bɔkuɑ ye yɑ ǹ nɔru mɔ. U ye kpuron kpunɑɑ yi. Goo kun mɑɑ kpɛ̃ u ye kɔsi. Sɑɑ kpuro u rɑ mɑn nɑsɑrɑ wɛ̃. Ye nɑ kĩ kpuro u rɑ mɑn kuewɑ.

⁶Adɑmɑ be bɑ Gusunɔ ɡɛmɑ bɑ sɑ̃ɑwɑ nɡe sɑ̃ki yi bɑ rɑ bure bu kɔ̃. Bɑ ku rɑ yi bɑbe kɑ nɔm dirɑ.

⁷Wi u kĩ u yi bɑbɑ, sisu kɑ yɑɑsɑn burɑ u koo kɑ yi sɔ̃re, kpɑ u yi dɔ̃ɔ mɛni yɑm tem mi sɔɔ.

⁸Dɑfidin tɑbu durɔbun yĩsɑ wee. Ben itɑ bɑ yĩsiru yɑrɑ. Yosɛbu Bɑsebɛti, Tɑkemɔniɡii, u sɑ̃ɑwɑ ben turo. Wiyɑ u tɔmbu nɛnɛ (800) ɡo kɑ yɑɑsɑ nɔn teerun tɑbu sɔɔ.

⁹Yirusen yĩsirɑ Eleɑsɑɑ, Dodon bii, Akosin sikɑdobu. Sɑnɑm mɛ Filisitibɑ bɑ yɑrɑ bu kɑ Isirelibɑ tɑbu ko, wi kɑ Dɑfidiwɑ bɑ yɔ̃rɑ bɑ bu mɑrɑ. N deemɑ sɑɑ ye, Isirelibɑ bɑ wɑ̃ɑ ɡuunɔ.

¹⁰Yen dɔmɑ te, Eleɑsɑɑ wi, u Filisitibɑ ɡowɑ sere win nɔmɑ mɔnyɑ u kpɑnɑ u tɑkobi yɔ̃su. Mɑ Yinni Gusunɔ u nùn nɑsɑrɑ bɑkɑ wɛ̃. Yen biru Isirelibɑ bɑ nɑ bɑ nùn deemɑ bu kɑ Filisiti ben yɑ̃nu ɡurɑ.

¹¹Ben itɑsen yĩsirɑ Sɑmɑ, Aɡen bii, Hɑrɑriɡii. Sɑɑ ye sɔɔ, Filisitibɑ bɑ mɑɑ mɛnnɑ Lekiɔ bu kɑ Isirelibɑ tɑbu wɔri. N deemɑ ɡberu ɡɑrɑ wɑ̃ɑ mi, tè sɔɔ bɑ dɑ̃si duurɑ. Ye Isirelibɑ bɑ duki mɔ̀ Filisiti ben sɔ̃,

¹²yerɑ Sɑmɑ u yɔ̃rɑ mi, u kɑ tu yinɑ. Mɑ u kɑ Filisitibɑ tɑbu kuɑ u bu ɡo. Gusunɔ u nùn nɑsɑrɑ bɑkɑ wɛ̃ dɔmɑ te.

¹³Gɛ̃ɛbun sɑɑ sɔɔ, Dɑfidin tɑbu sinɑmbu tɛnɑ sɔɔ ben itɑ bɑ dɑ bɑ nùn deemɑ Adulɑmun kpee wɔruɔ sɑnɑm mɛ Filisitibɑn tɑbu kowobun wuuru ɡɑru tɑ nɑ tɑ ten sɑnsɑni ɡirɑ Refɑbɑn wɔwɑɔ.

¹⁴Sɑɑ ye sɔɔ, Dɑfidi u wɑ̃ɑ kpee wɔru ɡe sɔɔ. Mɑ Filisitibɑn sɑnsɑni yɑ mɑɑ ɡire Bɛtelehɛmuɔ.

¹⁵Mɑ Dɑfidi u Bɛtelehɛmun bɛkɛ kuɑ u nɛɛ, wɑrɑ u koo kɑ mɑn Bɛtelehɛmun ɡbɑ̃rɑ kɔnnɔn dɔkɔn nim nɑɑwɑ n nɔ.

¹⁶Yerɑ win tɑbu durɔbu itɑ be, bɑ dɑ bɑ Filisitibɑn sɑnsɑni ye wɔri kɑ dɑm bɑ Dɑfidi nim mɛ tɑkɑmɑ. Adɑmɑ u ǹ mu nɔrɑ. U kɑ mu yɑ̃kuru kuɑwɑ, u Yinni Gusunɔ yɑriɑ.

¹⁷U nɛɛ, Gusunɔ u mɑn ɡbɑrɑ bu nɛɛ, nɛnɑ nɑ nim mɛ nɔrɑ. Domi mɛn sɔ̃nɑ tɔn beni bɑ ben wɑ̃ɑru kɑri bɔrie. Nim mɛ, mu sɑ̃ɑwɑ nɡe ben yɛm mɛ mu koo rɑɑ yɑri. Yen sɔ̃nɑ u yinɑ u mu nɔ. Yenibɑ kpurowɑ Dɑfidin tɑbu durɔbu itɑ be, bɑ kuɑ.