2 SAMMUYƐƐRI 19:18-37

¹⁸Kɛ nɛínɛ̀ Bɛnsɑmɛɛ kɔbɛ tɛkɔupíítɛ̀ (1000) nɛ̀ Sibɑɑ wèè do pĩ nSɑuri cĩ́ɛ̃̀tɛ̀ mutɔ̃mmú nɛ̀ o bí tɛpíítɛ̀ nɛ̀ ìnùmmù nɛ̀ o tɔ̃mbɛ̀ sipísìdɛ́ kɛ̀ bɛ̀ bo kɔtɛ mɛcɑ̃ɑ̃ nSuditɛ̃ɛ̃ kɛ́co okpɑ̀ɑ̀tì.

¹⁹Bɛ̀ sée ndìì mɔ̀nnì o cĩ́ɛ̃̀tɛ̀ kɔbɛ nɛ̀ kudɑbɛkù kɛ́dɔɔ̀ ò dɔ́mɛ̀. Okpɑ̀ɑ̀tì senti dìì mɔ̀nnì kɛ̀ Sebɑɑ birɛ Simɛii nínkóo o ììkɛ̀,

²⁰kóò nɑ̀kɛ́ kɛ dɔ̀: N yiɛ̀ nhokpɑ̀ɑ̀tì, ɑ bɑ́ n tɛ̃́nnɛ́ n yɛi. Bɑ́ɑ́ dentɛní ɑ kóo tɔ̃ntì do dɑ dɔ̀ɔ̀ mɛ̀ɛ̀ yɛi nhɑ iti dìì mɔ̀nnì Sedisɑdɛmmu, okpɑ̀ɑ̀tì bɑ́ ntì ɑ̃ ɑ miɛkɛ.

²¹Okpɑ̀ɑ̀tì n yɛ̃́mu kɛ dò n do dɑ cɑ̀ɑ̀rɛ̀, kɛ mɛ n niitɛ́nní yíe nyIsidɑyɛɛribɛ sɔmbɛ kɛ bo dɑ co.

²²Kɛ̀ Abikɑii Seduyɑ birɛ nɑ́kɛ́ okpɑ̀ɑ̀tì kɛ dɔ̀: Dɛɛ̀ bɑ́ nte kɛ̀ ti yóu ti bo kuɔmɛ̀ Simɛii wèè do buɔ̀ nkusĩ̀nkù okpɑ̀ɑ̀tì ti Yiɛ̀ nKuyie ntɑ̃ɑ̃tɛ́ wè.

²³Kɛ̀ Dɑfitii nɑ́kɛ́ Abikɑii nɛ̀ o tebitɛ Soɑbu kɛ dɔ̀: Di kpɛti tú bɑ dɛ miɛkɛ Seduyɑ bí díndi? Dɛ̀ dòmmɛ kɛ̀ di dɔ́ tí nɛnni, n yí dɔ́ n cɔú dìì yiè tikpɑ̀tì bɛ̀ɛ kuɔ Isidɑyɛɛribɛ kóo mɔù, we nyí yɛ̃́ yíe nkɛ dò mmíì tu Isidɑyɛɛribɛ kóo kpɑ̀ɑ̀tì?

²⁴Kòo kpɑ̀ɑ̀tìi nɑ́kɛ́ Simɛii kɛ dɔ̀: Bɛ̀ í yóó dɑ kuɔ, míì bɛ́i.

²⁵Dɛ kó dimɔ̀nnì kɛ̀ Sɑuri yɑɑ̀birɛ Mɛfibosɛti múnkɛɛ kɔtɛ kɛ bo co okpɑ̀ɑ̀tì, kɛ́túótɛ́ okpɑ̀ɑ̀tì ìtɛ́ dìì yiè Sedisɑdɛmmu kɛ́tuɔkɛnɛ̀ dɛ yiè, ò do í kuó o dɛɛ̀nfɛ̀, ò mɛ ndo í ɔ̀útɛ́ o nɑɑ̀cɛ̀i yoo o yɑ̀ɑ̀tì kòo kpɑ̀ɑ̀tì yɑ̀ɑ końnɛ̀nní kukɔ̃ǹnɑɑtí.

²⁶Ò tùɔ̀koo dìì mɔ̀nnì okpɑ̀ɑ̀tì borɛ̀ kòo ò bekɛ kɛ dɔ̀: Mɛfibosɛti dɛ sòò yĩ́mɛ kɑ̀ɑ í nni nɛinɛ̀?

²⁷Kòò dɔ̀: Okpɑ̀ɑ̀tì n kóo tɔ̃ntì weè sòò n soutɛ́, n sòò nɑ̀ɑ́mmu kɛ tú: N yí mɛ̀ nnɔmmɛ̀ mucèmmu yóu kɛ̀ m boú sɑ̃mmɑrímú kɛ́dekɛ kɛ́nɛinɛ̀ okpɑ̀ɑ̀tì.

²⁸Kòo kɔtoo kɛ́cɑkɛ n yètìrì ɑ borɛ̀, n yiɛ̀ nhokpɑ̀ɑ̀tì ɑ í cɑ̃́ɑ̃́nnɛ̀ Kuyie ntɔ̃nnì, dɔɔ̀ ɑ dɔ́mɛ̀.

²⁹N yɑ̀ɑ̀rì Sɑuri cĩ́ɛ̃̀tɛ̀ kɔbɛ bɛmɔu do dò nhɑ bɛ̀ kùɔ̀mu nɛ̀ mɛmmɛ kɑ̀ɑ n dɔ̀ɔ̀ mɛsɑ̀ɑ̀ nkɛ n wɛ̃nnɛ́nɛ̀ bɛ̀ɛ̀ dò nkɛ́nyo nhɑ borɛ̀. N tɛ̃́nkɛ bo dɑ bekɛ bɑ?

³⁰Kòo kpɑ̀ɑ̀tì dɔ̀: Dɛ̀ wenni ɑ nɑ̀kɛ́ kɛ̀ dɛ̀ sɑ̀nnɛ̀mu, n tɑ̃ɑ̃tɛ́mu kɛ tú fɔ̃́ nnɛ̀ Sibɑɑ díì yóó totɛ́ Sɑuri tenkɛ̀.

³¹Kɛ̀ Mɛfibosɛti dɔ̀: Sibɑɑ bo nɑ kɛ́túótɛ́ dɛmɔu. N yiɛ̀ nhɑ cɛ̃́nkɛ mɛ̀ nkonnímɛ̀ nɛ̀ kukɔ̃ǹnɑɑtí.

³²Kɑdɑɑdi tempɛ̃ Edokedimmu ɛì kou Bɑdisidɑii múnkɛ do cíemmu okpɑ̀ɑ̀tì kɛ́sée nSuditɛ̃ɛ̃ kɛ nɛ́ nɑ kɛ́kpɛ́ntɛ́.

³³Odɑkótì do nwe mɛsɑ̀ɑ̀ nkɛ mɔkɛ yɛbie nsipísìni, kɛ mɔkɛ o kpɛrɛ mɛdiɛ̀. Okpɑ̀ɑ̀tì do bo dìì mɔ̀nnì Mɑɑnɑimmu kòo nhò pĩ nkɛ̀ dɛ̀ wennimu.

³⁴Kòo kpɑ̀ɑ̀tìi ò nɑ̀kɛ́ kɛ dɔ̀: Á n nɛinɛ̀ kɛ̀ ti kò nSedisɑdɛmmu kɛ̀ nní ndɑkɛ ɑ kpɛ́í.

³⁵Kɛ̀ Bɑdisidɑii nɑ́kɛ́ okpɑ̀ɑ̀tì kɛ dɔ̀: M bie nkpɑɑ́ yɛ̀dɛ kɛ̀ m bo bennɛ́ kɛ dɑ nɛinɛ̀ Sedisɑdɛmmu?

³⁶Yɛbie nsipísìni kóo nìtì tɛ̃́nkɛ kpɑɑ́ yɛ̃́ dɛ̀ɛ̀ nɑɑti nɛ̀ dɛ̀ɛ̀ sɛɛɑ̀? M bo nɑ kɛ́nsɑ̃ntí tidiitì n yo ntì nɛ̀ mɛnɑɑ̀ n yɔ̃mmɑ̀ɑ̀? N tɛ̃́nkɛ í yo bɛdèmbɛ̀ bɛnitidɑɑbɛ̀ nɛ̀ bɛnitipòbɛ̀ kó mɛtɑmmɛ̀. Okpɑ̀ɑ̀tì m bɑ́ɑ́ bennɛ́ kɛ́yóu kɑ̀ɑ nni ntɔ.

³⁷A kóo tɔ̃ntì mí, n dɔ́ kɛ dɑ cíe nkɛ́sée nkukó nku, n yí mɑ̀nnɛ̀ ticuuti tii nketíkɛ.