2. Kraľengero 17:28-34

²⁸Avke ode geľa jekh rašaj, savo sas zailo andral e Samarija. Bešelas andro Betel a sikavelas len, sar majinen te lašarel le RAJES.

²⁹Ale dojekh narodos peske kerďa peskere devlen a ačhade len andre ola sentne thana, save angloda ačhade o manuša andral e Samarija. Dojekh narodos oda kerelas andro foros, kaj bešelas.

³⁰O manuša khatar o Babilon peske kerde le devles Sukkot-Benot, o manuša khatar o Kut le Nergal a o manuša khatar o Chamat le Ašimas.

³¹O Avvičana kerde le Nibchaz the le Tartak a o manuša andral o Sefarvajim obetinenas peskere čhaven sar labarďi obeta le devlenge Adrammelech the Anammelech.

³²A choc lašarenas le RAJES, kidle peske avri rašajen a ačhade len, hoj te služinen le modlenge pre ola thana. On ode obetinenas peskere devlenge.

³³Le RAJES lašarenas, ale služinenas the peskere devlenge pal o tradiciji ole narodengere, khatar sas odľigende andre odi phuv.

³⁴Dži adadžives oda keren avke, sar kerenas angloda. Le RAJES na lašaren avke, sar majinen, aňi pes na ľikeren pal oda, so hin pisimen andro zakonos, aňi pal o prikazaňja, save o RAJ diňa avri le čhavenge le Jakoboskere, saves diňa nav Izrael.