Ŋicwofuŋ II 17:28-34

²⁸Iŋuc mume Samaria mâreŋkonec taha bapa bacjopa rakicne jaŋeraonec moczi mocwâc risierâ Bete haeo juhuc Wofuŋ araŋ bacnehuc juniŋte qazu‐jarewec.

²⁹Ehame ŋic gurune gurune jaŋe hae‐jeŋic sâc jurahuc sifu nemuɋâŋ barâ Samaria ŋic jaŋe furu mâreŋ barambiŋ ira râec‐jopambiŋ.

³⁰Ehuc Babeŋic jaŋe Suko‐Beno nemu araŋ bacnembiŋ â Kutiŋic jaŋe Neregali nemu araŋ bacnembiŋ â Hamati ŋic jaŋe ine Asima nemu araŋ bacnembiŋ.

³¹Â Awiŋic jaŋe nemu jahec‐jeŋic Nibahaʒi â Taratac jahe araŋ bajactembiŋ â Sefarawaim ŋic jaŋe wâc iŋuc jaha nemu jahec‐jeŋic Adiramelec â Anamelec jahe araŋ bajactehuc naru motecfâc‐jeŋic joparâ bâzi rike‐jactembiŋ.

³²Jaŋe iŋuc ehuc Wofuŋ wâc araŋ bacnerâ guru‐jeŋickonec ŋic fuŋne fuŋne bâwosâec‐jopapie jaŋe furu mâreŋte taha bapa juhuc ŋic ŋokac jaŋere erâ furu mâreŋko taha bâzi rike jumbieŋ.

³³Iŋuc ehuc ŋifec Wofuŋ araŋ bacne jumbieŋ â ŋifec ine mâreŋfuŋ‐jeŋicte eebapa i bâjâpehuc nemufâc‐jeŋic kiŋaŋ qajare jumbieŋ jaha.

³⁴Erâ eebapa raŋɋane i ʒiŋuczia bajuŋgopieŋ jaha. Jaŋe Wofuŋ araŋ mi bacneeŋgopieŋ, ehuc Wofuŋzi dâŋsanaŋ â mumutâc erâ sâcmutâc dâŋ Jakobo, ʒâŋe‐ticne Israe muwec, ere ɋâricfâc jarewec i wâc mi reŋkeeŋgopieŋ.