2. King 17:28-34

²⁸Iei mine eman lein ekewe souasor ra uwereto seni Samaria a liwinla o imweimw lon Petel. Iwe, a aiti ngeni ekewe aramas usun ar repwe fel ngeni ewe Samol mi Lapalap.

²⁹Nge iteiten eu me eu mwichen aramas a chök sopwela le föri en me an uluulun anü o iseniir lon ekewe lenien fel won ekewe leni tekia ekewe chon Samaria ra fen aüetä. Iwe, ekewe mwichen aramas ra föri ei lon en me an telinimw ia ra imweimw ie.

³⁰Ekewe aramasen Papilon ra föri uluulun ewe anü Sukot-penot, ekewe aramasen Kut ra föri uluulun ewe anü Nerkal, ekewe aramasen Hata ra föri uluulun ewe anü Asima,

³¹ekewe aramasen Awa ra föri uluulun ekewe anü Nipas me Tartak, nge ekewe chon Sefarwaim ra keni nöür semirit ngeni ar kewe anü Atramelek me Anamelek.

³²Ekei aramas ra fel ngeni ewe Samol mi Lapalap, nge ra pwal filätä me leir sokopaten aramas, pwe repwe föri angangen souasor lon ekewe lenien fel won ekewe leni tekia, repwe pwal asor fän iter ikenan.

³³Iei usun ra fel ngeni ewe Samol mi Lapalap, nge ra pwal fel ngeni püsin ar kewe kot lon örünien ekewe mwü, ewe ia ra feito me ie.

³⁴Iwe, tori ikenai ra chüen föri usun örünier me lom. Resap fel ngeni ewe Samol mi Lapalap, resap pwal aleasochis ngeni ekewe pwüüng me ekewe allük ewe Samol mi Lapalap a allük ngeni ekewe mwirimwirin Jakop, ätewe Kot a aita ngeni Israel.