2 Hadì 17:28-34

²⁸Umbe, sevaha zuen te vihag he menge memumuhat is midlikù diyà te Samaria ne ziyà med-ubpà te Betel, ne mibpenurù din is menge etew ke ebmenmenuwen is ked-ezapa te Nengazen.

²⁹Piru heini is nekedseselekawà he grupu te menge etew, mibpedayun dan he ebaal te kandan he menge ed-ezapan. Diyà te kada inged he ed-ubpaan dan, impelastar zan is kandan he menge ed-ezapen diyà te menge simbahan he ziyà te metikang he menge lugar he mibeelan te menge tig-Samaria.

³⁰Is ebpuun diyà te Babilonia, mid-azap dan is kandan he ed-ezapen he si Sucot Benot. Is ebpuun diyà te Cut, mid-azap dan is kandan he ed-ezapen he si Nergal. Ne is ebpuun diyà te Hamat, mibaal te ed-ezapen dan he si Ashima.

³¹Is ebpuun diyà te Ava, mid-azap dan is kandan he ed-ezapen he si Nibhaz wey Tartak. Ne is ebpuun diyà te Sefarvaim, mid-azap dan is kandan he ed-ezapen he si Adramilec wey si Anamelec; idtavun dan ganì is menge anak dan su ibpemuhat dan kayi he menge ed-ezapen.

³²Ed-azap sikandan te Nengazen, piru iyan sikandan mibpilì te menge memumuhat he menge zuma zan mismu he ebpekepengulu kandan te kebpemuhat diyà te menge simbahan diyà te metikang he menge lugar.

³³Ed-azap sikandan te Nengazen piru ed-azap daan sikandan te keugelingen dan he menge ed-ezapen sumalà te neleyaman te menge etew ziyà te menge nasyun he ebpuunan dan.

³⁴Taman en guntaan he menge andew is kebeeli zan kayi. Kenà tutuu is ked-ezapa zan te Nengazen, ne wazà sikandan medtuman te menge suǥù, menge sulunuzen, menge penurù, wey menge kesuǥuan he imbeǥey te Nengazen te menge kevuwazan ni Jacob, he migngezanan din te Israel.