2 BƐKPÀÀTÌBƐ̀ 14:12-28

¹²Kɛ̀ Isidɑyɛɛribɛɛ nɑ Sudɑɑ kɔbɛ, kɛ bɛ̀ɛ cíɛ́tɛ́ kɛ́kũṹ mbɛ cɛ̃́ĩ.

¹³Kɛ̀ Isidɑyɛɛribɛɛ pĩ́ nSoɑsi birɛ Amɑsiɑ Aɑsiɑ yɑɑ̀birɛ Sudɑɑ kɔbɛ kóo kpɑ̀ɑ̀tì. Bɛ̀ do ò pĩ mBɛti-Semɛsi nwe kóò kònnɛ̀ o ciɛ Sedisɑdɛmmu, kɛ́pɔntɛ Sedisɑdɛmmu ɛì kó kuduotí, ku okùmɛ̀ bo ntùɔ̀kɛ mɛ́tìrì sikɔusìdɛ́ (200), kɛ́túótɛ́ Efɑdɑimmu kó dibòrì kɛ́ntɔ kɛ́tuɔ̀kɛnɛ̀ kuduotí kéntímɛ̀ kó dibòrì.

¹⁴Kɛ̀ bɛ̀ɛ túótɛ́ ti Yiɛ̀ nKuyie ncĩ́ɛ̃̀tɛ̀ kó mɛsɔɔ mmɛmɔu nɛ̀ timɑ́tì pɛ́ítì nɛ̀ tinɛntì tìì kó dimɑ̀ɑ̀ bo tɛ miɛkɛ nɛ̀ dɛ̀ɛ̀ bo tɛkpɑ̀ɑ̀tìcĩ́ɛ̃̀tɛ̀, kɛ́túótɛ́nɛ̀ bɛ̀ pĩ̀ḿmú bɛ̀ mudoò miɛkɛ kɛ́wɛ̃tɛ kɛ́kònnɛ̀ Sɑmmɑrii.

¹⁵Soɑsi kó mɛdɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀, nɛ̀ dikɔ̃m̀bùɔ̀ ò do mɔkɛ dì nɛ̀ ò dokɛ́nɛ̀ mɛ̀ɛ̀ botí Amɑsiɑ Sudɑɑ kɔbɛ kóo kpɑ̀ɑ̀tì, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

¹⁶Kòo kú kɛ̀ bɛ̀ɛ ò kũnnɛ́ Sɑmmɑrii Isidɑyɛɛribɛ kpɑ̀ɑ̀tìbɛ̀ fɔ̃ti. Kòo birɛ Sedoboɑmmuu sɔɔtɛ́ o kpɑ̀tì.

¹⁷Isidɑyɛɛribɛ kóo kpɑ̀ɑ̀tì Yoɑkɑsi birɛ Soɑsi ku dìì mɔ̀nnì kɛ́deè kɛ̀ Sudɑɑ kɔbɛ kóo kpɑ̀ɑ̀tì Soɑsi birɛ Amɑsiɑ nkpɑɑ́ fòùmu kɛ dɔ̀ yɛbie ntɛpíítɛ̀ nɛ̀ yɛ̀nùmmù.

¹⁸Amɑsiɑ dɔɔ̀rìmɛ̀ sɔmmɛ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

¹⁹Kɛ̀ bɛ̀ɛ dɑkɛ kɛ bo ò bɔ nkóò pi Sedisɑdɛmmu, kòo cokɛ́ kɛ́kɔtɛ Dɑkiisi kɛ̀ bɛ̀ɛ tɔ̃nko bɛnìtìbɛ̀ kɛ̀ bɛ̀ɛ kɛ̀ nhò kùɔ.

²⁰Kɛ̀ bɛ̀ɛ ò tùótɛ́nnɛ̀ sisɛ̃ĩ́ kɛ́konnɛ̀nní Sedisɑdɛmmu, kóò kũnnɛ́ o yɛmbɛ̀ fɔ̃ti Dɑfiti ɛì miɛkɛ.

²¹Kɛ̀ Sudɑɑ kɔbɛɛ túótɛ́ Asɑdiɑ kɛ́duɔ́ nkòo sɔɔtɛ́ o cicɛ kpɑ̀tì, dɛ̀ do sɔ̃́ nhò mɔ̀kɛ yɛbie ntɛpíítɛ̀ nɛ̀ yɛ̀kuɔ̀ ndi.

²²Weè do wɛ̃̀tɛ kɛ́mɑɑ́ Edɑti ɛì kɛ́ dì tɛ̃̀ńnɛ́ Sudɑɑ kɔbɛ o cicɛ kṹṹ nkó difɔ̃nkúò.

²³Sudɑɑ kɔbɛ kóo kpɑ̀ɑ̀tì Soɑsi birɛ Amɑsiɑ kpɑ̀tì benni tɛpíítɛ̀ nɛ̀ dinummurì ndi Soɑsi birɛ Sedoboɑmmu nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie nsipísìnɑ̀ɑ̀ nɛ̀ dìmɑ́ɑ̀ kɛ bo Sɑmmɑrii,

²⁴kɛ́dɔɔ̀ ti Yiɛ̀ nKuyie nyí dɔ́ dɛ̀, ò í nyóu mɛyɛi nNɛbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ.

²⁵Weè do wɛ̃̀tɛ kɛ́cɔutɛ́ Isidɑyɛɛribɛ tenkɛ̀ kɛ́túótɛ́ Amɑti kɛ́ntɔ kɛ́tuɔkɛnɛ̀ Adɑbɑ. Kɛ́ndònnɛ̀ ti Yiɛ̀ nKuyie nyIsidɑyɛɛribɛ tũ nkù do tì nɑ̀kɛ́mɛ̀ nɛ̀ ku pɑ̃ɑ̃nɑ́ɑǹtì nɑ́ɑǹtò Amitɑii birɛ Sonɑɑsi Kɑti-Efɛɛ ɛì kou nùù miɛkɛ.

²⁶Ti Yiɛ̀ nKuyie ndo yɑ̀ Isidɑyɛɛribɛ yo mmɛ̀ɛ̀ sémmɛ̀ dɛummɛ̀ mmɛ. Onìtì tɛ̃́nkɛ do í kpɑɑ́ bɑ́ omɑ́ɑ̀ Isidɑyɛɛribɛ tenkɛ̀ wèè bo bɛ̀ teennɛ̀.

²⁷Ti Yiɛ̀ nKuyie ndo í dɔ́ Isidɑyɛɛribɛ bo kúmɛ̀ kɛ́deè kɛ̀ bɛ yètìrìi kpɑ́nnɛ́ kɛtenkɛ̀ ĩ́nkɛ̀, dɛɛ̀ do te kɛ̀ kùu duɔ́ nkɛ̀ Soɑsi birɛ Sedoboɑmmuu bɛ̀ dɛɛtɛ́.

²⁸Sedoboɑmmu dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀, nɛ̀ dikɔ̃m̀bùɔ̀ ò do mɔkɛ dì nɛ̀ ò dokɛ́ mɛ̀ɛ̀ botí kɛ wɛ̃̀tɛ kɛ fìètɛ Dɑmɑɑsi nɛ̀ Amɑti ɛkɛ̀ kɛ yɛ̀ tɛ̃̀ńnɛ́ Isidɑyɛɛribɛ, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.