2. King 14:12-28

¹²Iwe, chon Juta ra kuf ren chon Israel, pwe eman me eman a süla ngeni lenian.

¹³Jehoas ewe kingen Israel a liapeni Amasia ewe kingen Juta arun Pet-semes. Mürin, Jehoas a feila Jerusalem o ataetiu tittin ewe telinimw seni ewe Asamalapen Efraim tori ewe Asamalapen Lepwokuku ükükün wonopükü fiit.

¹⁴Iwe, Jehoas a angei ewe kolt me silifer meinisin, pwal ekewe sepi meinisin mi nom lon imwen ewe Samol mi Lapalap, a pwal angei ekewe pisek aüchea me lon imwen ewe king. A pwal uwala aramas o liwiniti Samaria.

¹⁵Nge lusun pworausen än Jehoas kewe föför meinisin, an pwora me an maun ngeni Amasia ewe kingen Juta a mak lon puken uruwon ekewe kingen Israel.

¹⁶Jehoas a mäla, nge ra peiaseni lon Samaria ren ekewe kingen Israel. Nge Jeropoam nöün we mwän a siwili lon wisan wisen king.

¹⁷Iwe, Amasia ewe kingen Juta a manau lon ükükün engol me limu ier mürin än Jehoas ewe kingen Israel mäla.

¹⁸Nge lusun pworausen än Amasia kewe föför meinisin a mak lon puken uruwon ekewe kingen Juta.

¹⁹Iwe, ekewe chon oputa Amasia ra rawangauei me lon Jerusalem, nge Amasia a süla Lakis. Nge ra attapwa tori Lakis o niela me ikenan.

²⁰Mürin ra uwala inisin won oris lon Jerusalem o peiaseni ren an kewe lewo lon ewe telinimwen Tafit.

²¹Iwe, ekewe aramasen Juta meinisin ra seikätä Ussia, pwe epwe siwili Amasia saman we lon wisan wisen king. Ussia a ierini engol me wonu, lupwen a seikitä.

²²Mürin än saman mäla, Ussia a liapenisefäli ewe telinimw Elat o aüsefälietä.

²³Iwe, lon engol me limuen ierin mwün Amasia nöün Joas we ewe kingen Juta, Jeropoam nöün Jehoas we a tolong lon wisan wisen king o nemeni Israel. A nom lon Samaria o nemenem lon ükükün faik me eu ier.

²⁴Jeropoam a föri mine a ngau me fän mesen ewe Samol mi Lapalap. Esap likitala ekewe tipis meinisin ewe king Jeropoam nöün Nepat we a föri, lupwen a emweni chon Israel ngeni tipis.

²⁵Jeropoam a angeesefäli ekewe kinikinin fanü chon Israel ra fanüeni me lom seni ewe al mi ale ngeni Hamat a nom efeng tori ewe Setin Mäla a nom ör, usun ewe Samol mi Lapalap ewe Koten Israel a kapas ngeni nöün we chon angang Sona nöün Amitai we mwän, ewe soufos seni Kat-hefer.

²⁶Iwe, ewe Samol mi Lapalap a küna pwe chon Israel meinisin seni ekewe amanau tori ekewe chon ngas ra nom lon riaföü watte, esap wor eman mi alisiir.

²⁷Nge sap tipen ewe Samol mi Lapalap pwe epwe arosala chon Israel seni won fanüfan. Iei mine a amanaueer ren Jeropoam nöün Jehoas we mwän.

²⁸Nge lusun pworausen än Jeropoam föför meinisin, an pwora me an maun, pwal usun an aliwinisefäli Tamaskus me Hamat ngeni Israel, a mak lon puken uruwon ekewe kingen Israel.