1Saulo ena mauri lagani be 30 neganai ia ese Israela ia gunalaia hamatamaia. Ia be lagani ibounai 42 Israela ia gunalaia.
2Saulo ese Israela tatau 3000 ia abia hidi. 2000 be Saulo danu Mikimasa bona Betele ena ororo dekenai idia noho, bona 1000 be iena natuna tau Ionatana danu idia noho, Gibea dekenai, Beniamina tano dekenai. Israela taudia oredia be Saulo ese ia siaia lao, ta ta edia ruma edia ruma dekenai idia noho.
3Ionatana, mai ena tuari taudia danu ese Pilistia edia gabu aukana, Geba, idia tuari henia, bona Ionatana ia kwalimu. Pilistia taudia ibounai unai sivarai idia kamonai neganai, idia badu Israela dekenai. Vadaeni Saulo ese kibi ia hiriria Israela tano ibounai dekenai. Ia gwau, “Heberu taudia ibounai, hereva do umui kamonai.”
4Vadaeni Israela taudia ibounai ese sivarai idia kamonai, Saulo ese Pilistia tuari taudia ia halusia Geba dekenai, bona Pilistia taudia ese Israela taudia idia badu henia noho. Unai neganai Saulo ese Israela taudia ia boiria hebou Gilegala dekenai.
5Pilistia taudia be Israela taudia tuari henia totona idia haboua. Idia edia kariota be 3000, bona edia hosi guia taudia be 6000. To edia tuari taudia be momo herea, kone mirina bamona. Idia raka mai, Mikimasa dekenai idia kamepa, Bete Avene ena dina daekau kahana dekenai.
6Israela taudia idia itaia, dika bada herea be kahirakahira ia ginidae idia dekenai. Unai dainai nadi matudia dekenai, bona uda lalonai, bona nadi badadia murinai, bona guria gabudia, bona ranu guri lalonai idia hunia.
7Haida danu be Ioridane Sinavai idia raka hanaia, Gado bona Gileada tano dekenai idia lao. Saulo be Gilegala dekenai ia naria noho, bona iena tuari taudia unuseni be gari dekenai idia heudeheude.
8Saulo be dina 7 ia naria, Samuela ese ia gwauraia dinadia, to Samuela be Gilegala dekenai ia do ginidae lasi. Vadaeni Saulo ena tuari taudia ese ia dekena amo idia raka siri hamatamaia.
9Unai dainai idia dekenai Saulo ia gwau, “Idia gabua bouboudia bona maino karaia bouboudia be lau dekenai do umui abia mai.” Vadaeni ia ese gabua boubouna ia karaia.
10Boubou ia gabua ore noho neganai, Samuela be ia ginidae. Saulo be Samuela dekenai ia raka lao, ia danu do idia hedavari, bona Samuela dekenai do ia hanamoa totona.
11To Samuela ia gwau, “Oi be dahaka oi karaia?” Saulo ia haere, ia gwau, “Lau itaia, egu taudia be idia raka siri noho, bona oi ese oi gwauraia guna dinana dekenai oi ginidae lasi. Pilistia taudia danu Mikimasa dekenai idia haboua vadaeni.
12Vadaeni lau gwau, ‘Pilistia taudia be Gilegala dekenai lau do idia tuari henia, to lau ese Dirava ena hanamoa lau do tahua lasi.’ Vadaeni lau laloa momo dainai, gabua boubouna lau karaia.”
13Samuela ese Saulo ia hamaoroa, ia gwau, “Oi be kara kavakava oi karaia vadaeni. Lohiabada, oiemu Dirava ena oda hereva, oi dekenai ia henia gauna, be oi kamonai henia lasi. Bema Lohiabada ena oda oi kamonai henia neganai, ia ese oiemu basileia Israela dekenai do ia haginia ela bona hanaihanai.
14To harihari oiemu basileia do ia noho daudau lasi. Lohiabada dekenai oi kamonai henia lasi dainai, ia ese ia ura henia tauna ta do ia davaria, bona unai tau be iena bese taudia edia gunalaia tauna do ia halaoa.”
15Samuela ese Gilegala ia rakatania, Gibea, Beniamina tano dekenai ia lao. Vadaeni Saulo ese ia dekenai idia noho taudia ia duahia, idia be ibounai tatau 600.
16Saulo bona iena natuna Ionatana bona idia dekenai idia noho taudia be Geba dekenai idia noho, Beniamina tano dekenai. To Pilistia taudia be Mikimasa dekenai idia noho.
17Vadaeni Pilistia edia kamepa dekena amo tuari orea toi idia raka lao. Orea ta be Opera dalana dekenai idia raka, Sualo tano dekenai idia lao.
18Orea iharuana be Bete Horono kahana dekenai idia lao. Ma orea ihatoina be tano hetoana dalana dekena amo idia raka lao. Unai dala dekena amo edia matana idia negea neganai, Seboimi Koura bona taunimanma idia noho lasi tano idia itaia.
19Unai neganai Israela tanona ibounai dekenai, tau ta be auri gaukaralaia dalana ia diba lasi. Badina be Pilistia taudia be idia gwau, “Heberu taudia be edia tuari kaia bona io do idia karaia garina.”
20Unai dainai Israela taudia ibounai be Pilistia taudia dekenai idia lao, edia tano makohia auri gaudia, edia ira, o edia rei utua kaia gaudia do idia segea totona.
21Pilistia segea taudia edia gaukara davana be inai bamona: Moni maragidia rua tano makohia auridia segea totona, bona moni maragina ta be ira bona kodoa gaudia edia matana segea totona.
22Unai dainai, tuari dinana dekenai Saulo bona Ionatana edia tuari taudia be mai edia tuari kaia lasi, bona mai edia io lasi. Saulo bona Ionatana sibona be mai idia edia tuari kaia bona io.
23Vadaeni Pilistia taudia edia tuari orea ta be Mikimasa hanua ia vareai dalana koua totona idia naria noho, ororo rua edia huanai.
