Ɩsǝtǝlɑsɩ 5

1

2

3

4

5

6

7

8

9

10

¹Ḿpʋ́ɣʋ́ kʋyɑkʋ nɑkʋlɩ Ɩsɔ kʋyɔɣɔtʋtʋ tɛlǝsʋlʋ Asee nɑ Ɩtoo pǝyɑlʋ Ɩsɔ kʋyɔɣɔtʋtʋ tɛlǝsʋlʋ Sɑkɑlɩ pɑ polɑɑ nɑ pɑ́ yɔɣɔtǝnɑ Yutɑ nɑ Yosɑlɛm nyǝ́mɑ nɑ Ɩsɛɣɛlɩ Ɩsɔ nɔɣɔ.

²Ɩlɛnɑ Selɑtǝyɛlɩ pǝyɑlʋ Solopɑpɛɛlɩ nɑ Yosɑtɑkɩ pǝyɑlʋ Yesuwɑ pɑ́ niki Ɩsɔ tǝsɛɛlɛ ŋmɑʋ kɛ Yosɑlɛm, nɑ Ɩsɔ kʋyɔɣɔtʋtʋ tɛlǝsǝlɑɑ sǝnɑ-wɛ.

³Tǝnɑɣɑlɛ Ɩfǝlɑtɩ pɔɣɔ hɔɣɔlʋɣʋ kʋfǝnɛɛ Tɑtǝnɑyi, nɑ Setɑ-Posǝnɑyi, nɑ pɑ tɑɑpɑlɑɑ pɑ polɑɑ nɑ pɑ́ pɔɔsɩ Yutɑ nyǝ́mɑ sɩ: Awe hɑ-mɛɣɛ mpɑɑʋ sɩ ɩ́ ŋmɑ́ Ɩsɔ tǝsɛɛlɛ nɑ koloosi?

⁴Pǝ wɛɛ sɩ ɩ́ heeli-tʋɣʋ mpɑ mpɑ pɑ ŋmɑɑkɩ ɩsǝntɔ tɔ pɑ hǝlɑ.

⁵Amɑ Ɩsɔ wɛ Yutɑ nyʋɣʋ nyǝ́mɑ wɑɑlɩ, ɩlɛ pɑ tɑ pǝsɩ pɑ́ sǝŋsɩ pɑ tǝmlɛ, hɑlǝnɑ pɑ́ heeli wulɑʋ Tɑliyusi kɛ pǝ tɔm nɑ ɩ́ cɔ-wɛ.

⁶Tɑkǝlɑɣɑ ŋkɑ Ɩfǝlɑtɩ tɛtʋ kʋfǝnɛɛ Tɑtǝnɑyi nɑ Setɑ-Posǝnɑyi nɑ ɩ tɑɑpɑlɑɑ hɔɣɔlʋɣʋ nyɔɔŋ nyǝ́mɑ pɑ ŋmɑɑ wulɑʋ sɔsɔ Tɑliyusi tɔɣɔlɛ

⁷sɩ: Tɑcɑɑ wulɑʋ sɔsɔ Tɑliyusi, tǝ sɛɛ-ŋ, nyɑnɑ tɛtʋ.

⁸Tǝ polɑ Yutɑ kɛ Ɩsɔ tǝsɛɛlɛ tǝŋmɑlɛ nɑ tǝ́ mɑɣɑnɑ pɑ tɔŋnɑ-tɛɣɛ ŋmɑʋ nɑ pɛɛ kʋsɑɑkɛɛ. Pɑ kɑmɑ kpeŋkpelɑsɩ kɛ koloosi tɑɑ. Pɑ tǝmlɛ tewɑɣɑ, nɑ tǝ tɔŋnɑ lɑpʋ kɛ lɔŋlɔŋ.

⁹Ḿpʋ́ɣʋ́ tǝ nɑwɑ nyʋɣʋ nyǝ́mɑ nɑ tǝ́ pɔɔsɩ-wɛɣɛ wei ɩ hɑ-wɛɣɛ nɔɣɔ sɩ pɑ́ ŋmɑ Ɩsɔ tǝsɛɛlɛ nɑ pǝ koloosi tɔ.

¹⁰Hɑlɩ tǝ pɔɔsɑ-wɛɣɛ mpɑ pɑ kɛ́ tǝmlɛ nyʋɣʋ nyǝ́mɑ tɔ pɑ hǝlɑ sɩ tǝ ŋmɑɑkɩ nɑ tǝ́ kɔnɑ-ŋ.

¹¹Ɩlɛnɑ pɑ́ cɔ-tʋ sɩ: Tǝ kɛ́ ɩsɔtɑɑ nɑ ɑtɛ pǝ Ɩsɔ tǝmlɛ nyǝ́mɑ kɛ́. Tǝ kʋsǝɣɩ Ɩsɔ tǝsɛɛlɛ nte Ɩsɛɣɛlɩ wulɑʋ sɔsɔ nɔɣɔlʋ ɩ kɑ ŋmɑwɑ lɔŋtɑɑ tɔɣɔ.

¹²Amɑ tɑ́ cɑɑnɑɑ kʋsɑ ɩsɔtɑɑ Ɩsɔ pɑ́ɑ́nɑ́ nɑ ɩ́lɛ́ ɩ tʋ-tʋɣʋ Pɑpiloni wulɑʋ Nepukɑnɛsɑɑ niŋ tɑɑ nɑ ɩ́ wɑkǝlɩ Ɩsɔ tǝsɛɛlɛ ńtɛ́, nɑ ɩ́ kuu yǝlɑɑ nɑ ɩ́ tɛɛnɑ ɩ tɛ.

¹³Pǝ wɑɑlɩ kɛ́ wulɑʋ Silusi nɑ́ hɑ nɔɣɔ kɛ ɩ́lɛ́ ɩ kɑwulɑɣɑ pǝnɑɣɑ kɑncɑɑlɑɣɑ nyǝŋkɑ tɑɑ sɩ tǝ́ tɑɣɑnɩ-tɛɣɛ ŋmɑʋ.

¹⁴Nepukɑnɛsɑɑ nɑ́ kuu Ɩsɔ tǝsɛɛlɛ ńtɛ́ tǝ tɑɑ wʋlɑ nɑ nyǝɣǝtʋ kʋpɑntʋ nɑ pǝ wontu kɛ́, nɑ ɩ́ ponɑ Pɑpiloni nɑ ɩ́ sɩɩ ɩ tʋɣʋ kutuluɣu tɑɑ. Amɑ wulɑʋ sɔsɔ Silusi nɑ́ kpɑɣɑ-tɩ nɑ ɩ́ cɛlɑ Sesepɑsɑɑ wei ɩ kpɑwɑ Yutɑ kʋfǝnɛɛ tɔ.

¹⁵Nɑ ɩ́ heeli-ɩ sɩ: Ɩ́ polo ɩ́ ŋmɑ Ɩsɔ tǝsɛɛlɛ ntɛɣɛ tǝ lonte kʋpǝntɛ tɑɑ. Ɩlɛnɑ pɑ́ sɩɩ wontu ntǝɣɩ pǝ tɑɑ.

¹⁶Mpʋ pǝ lɑpǝnɑ nɑ Sesepɑsɑɑ polo Yosɑlɛm nɑ ɩ́ tɑɑlɩ Ɩsɔ tǝsɛɛlɛ kite. Pǝ kpɑɣɑʋ wɑɑtʋ ɩnɩ tɔ pɑ tǝmlɛ tɔŋnɑ pote kɛ́. Amɑ pǝ tɑ tɛntɑ.

¹⁷Pǝnɛntɛ tɑ cɑɑ, yele nɑ pɑ́ pɛɛkɩ Pɑpiloni kɑwulɑɣɑ tɑkǝlɑsɩ tɑɑ nɑ tǝ́ nɑ́ sɩ Silusi hɑ nɔɣɔ kɛ tɑmpɑnɑ sɩ pɑ́ ŋmɑ Yosɑlɛm Ɩsɔ tǝsɛɛlɛ ńtɛ́ yɑɑ ɩsǝnɑ. Ye n tɛmɑ mpʋ, ɩlɛ n heeli-tʋɣʋ nti n mɑɣɑsɑɑ tɔ.