Yontu 90:2-16

²Nɑ pə́cɔ pə́ lɑkɩ ɑntulinyɑ nɑ pulɑsɩ tɔ, nyɑ́ kɛnɑ Ɩsɔ nɑ n kɑ́ wɛɛ ḿpʋɣʋ tɑm tɔɔ kɛ́.

³Nyɑ́ mələɣənɑnɑ yəlɑɑ kɛ ɑtɛ mʋsʋɣʋ tɑɑ, nɑ ń tɔŋ-wɛ sɩ: Ɩ́ məlɩ timpi ɩ́ kɑ lɩɩnɑɑ tɔ.

⁴Mpi tɔ, pɩɩsɩ iyɑɣɑ (1000) wɛ-ŋ kɛ́ ɩsɩɩ kʋyɑkʋ ŋku kʋ tɛɛwɑ nɑ kʋ kɑɑ tɑsɑ məlʋɣʋ tɔ, yɑɑ ɑhoo nnɑ ɑ tɛɛwɑ tɔ ɑ hɔɣɔlʋɣʋ.

⁵N kpiisiɣi yəlɑɑ kɛ́ ɩsɩɩ toosee wenɑ pə feŋuɣu tɑnɑŋ nɑ ɑ́ sɑɑlɩ yem ɩsɩɩ nyɩɩtʋ tɔ.

⁶Nyɩɩtʋ tʋɣɩ hɛtʋ kɛ tɑnɑŋ tɛɛ kɛ́ nɑ tə́ pɩɩ. Ɩlɛnɑ tɑɑnɑɣɑ tə́ lontili nɑ tə́ wʋlɩ.

⁷Nyɑ́ pɑ́ɑ́nɑ́ kpiisiɣi-tʋɣʋ nɑ nyɑ́ tɑɑ kpɑʋ nyɑɑsəɣɩ-tʋ.

⁸N ləsəɣɩ tɑ́ ɩsɑɣɑtʋ kɛ pɑtəmɑ tɑɑ kɛ́, nɑ ń sɩɩkɩ nyɑɑləm tɑɑ kɛ́ tɑ́ kʋŋmɛsətʋ.

⁹Nyɑ́ pɑ́ɑ́nɑ́ sɔsɔɔnɑ lɑkɩ kɛ́ nɑ tɑ́ kʋyɛɛŋ sɑɑləɣɩ yem, nɑ tɑ́ pɩɩsɩ nyɑɑ sɑləɣɩ yem ɩsɩɩ yʋlʋ nɔɣɔ.

¹⁰Tɑ́ weesuɣu pɩɩsɩ ntɛ́ nɩɩtosonnɑɑnʋwɑ. Ye mpɑ pɑ kəlɑ ɑlɑɑfəyɑ, ɩlɛ pɑ nyənsɩ yoosi nɩɩnɑɑsɑ. Amɑ kʋnyɔŋ nɑ wɑhɑlɑ tike kɛ yʋlʋ wɑɑkɩ pə tɑɑ. Weesuɣu tɛɛkɩ lɔlɔ kɛ́ nɑ tɑɑ kʋləɣɩ hʋntʋ nɑ tə́ kpətəɣənɑ səm.

¹¹Tɑcɑɑ, ɑwe nyəmnɑ nyɑ́ toŋ nɑ nyɑ́ pɑ́ɑ́nɑ́ pə tɔm? Nɔɣɔlʋ ɩɩ nyɑŋnɑ-ŋ sɩ ɩ́ nyɩ nyɑ́ pɑ́ɑ́nɑ́ tɔm kɛ teu.

¹²Hʋlɩ-tʋɣʋ tɑ́ kʋyɛɛŋ kɑlʋɣʋ. Wɑɑtʋ ɩnəɣɩ tɩɩ hii lɑɣɑtʋ.

¹³Hɑɩ, Tɑcɑɑ, hɛɛsɩ-tʋɣʋ pɑ́ɑ́nɑ́ mʋnɑʋ kɛ mpʋ. Nyənɩ nyɑ́ təmlɛ nyə́mɑ tɑ́, tɑ́ pətɔɔtəlɛ nɑ ń kɛ́ɛ́sə́nɑ́ tɑ́ tɔɔ.

¹⁴Lɑ-tʋɣʋ nyɑ́ kʋpɑntʋ sɔsɔɔntʋ kɛ tɑ́ tɑnɑŋ tɛɛ. Ɩlɛ tɩɩ cɑɣɑnɑ lɑŋhʋlʋmlɛ kɛ tɑ́ weesuɣu tənɑ.

¹⁵Pɩɩsɩ pɑɣɑlɛ tɑɑ kɛ́ n hɔmɑ tɑ́ ŋkpɑŋʋɣʋ. Ɩlɛ hɛɛsɩ tɑ́ lɑŋɑ kɛ pɩɩsɩ pɑɣɑlɛ ɩsɩɩ nsi sɩ tɑɑ tə nɑ wɑhɑlɑnɑɑ tɔ.

¹⁶Lɑ nyɑ́ yomɑɑ tɑɣɑ nyɑ́ təmlɛ, nɑ tɑ́ lʋlʋɣʋ nyə́mɑ nɑ nyɑ́ sɔsɔɔntʋ.