Psalm 90:2-16

²Tam God maemae nonoana muriai da ola ma dobu uta kauei.

³Tam rava e ririwei da e vipokau, ma e ririwei, “Rava ona wanaviraimi”

⁴Tam awarim madeḡa 1,000 lamna me aupom tagogi, i tupo kaua me raviravi, eḡa ita manawa dadana.

⁵Rava ai lawana e vaivaitawanana laḡilaḡinei me rauboni damona. Taui me modu, ubaubanai e raraupairei,

⁶da e rarata ma e talatalai, wate aubigai e ḡiviḡivi.

⁷Nanare am meji tauai e lagulaguriai ma maranai e ḡaiḡaiawa tauai a rovorovo kaua.

⁸Ai ḡoʼapoapoe anatapui au naom u lavaei, ai ḡoʼapoapoe govagovaḡana, wate anatapuna e inainanai.

⁹Am meji ai lawana i vitupoi, ma ai madeḡa laḡilaḡina e kwakwa, a lavutu-tawanana.

¹⁰Madeḡa 70 i vereta da tana mae, mepa da tana virewapana lamna 80; Wate wei lamna nuabola ava ina vereta, eḡa tana mae-pora ma tana nae.

¹¹Eḡa aiai am ḡaiawa malana ita vai-kauei. Mepa da am ḡaiawa ata aramana-kauei, lamna tauai ata vivirana-kauem.

¹²Ma nanare, ma viararamaniai da ai lawana i tupo kaua, ma lamna aubaina awarim nuaulaula ana vaia.

¹³Oo Bada! Ma nememei awariai. Ma mae-tavirem, ma vinuabolelai, tauai am taunola.

¹⁴Ubaubanai marana patapatai am nuavaina maemaena ma verelai, da ana morelanai ana logoiai ma ai au mara anatapuna ana vinuaiai.

¹⁵Madeḡa biaḡa u kovoḡiai, nuaiai ma verelai da madeḡana biaḡa a vinuapoapoe ina kovoḡi.

¹⁶Tauai am taunola, am nola vivirewapanana ma viatataielai. Ma natunatuiai am boruma ma viatataiei.