Miti Mânec 90:2-16

²Tiki jaŋe huhuckerâ mi fehapie, â sambâŋ mâreŋ mi bâfuac‐jofahuc goki Anutu jumeŋzi jurâ juraʒizokic.

³Goki mutec ŋic jaŋe rufeo risie raeŋgopieŋ, eha wâc muekic, “Ŋoŋe harierâ wareniŋ.”

⁴Jara wâŋ tauseŋ i gore maio jac ʒoaŋ tarajec irec sâc eekac, me ŋafe dâkâne sawa irec sâc.

⁵Go ŋic ofaŋ‐jopatec raeŋgopieŋ; juju‐jeŋic i guŋ manaeŋgopeneŋ iŋucne, me furicte hofâ qinʒiŋ wefuekac iŋucne tinac.

⁶Hofâ qinʒiŋ e furicte ɋârerâ haŋ baekac, hae owâeme ɋaŋarâ ururuckeekac.

⁷Gore kimbeŋzi hâcne ʒâtâmirec‐nâpoekac, aaricgezi hecnâpokume siroweeŋgopeneŋ.

⁸Go sâqocne‐nâŋec ʒâŋe maigao birickemeŋ, wiac soŋsoŋko embeŋ i tatamacko fua‐gareekac.

⁹Jei, ʒoaŋ gie bapa‐nâŋec kimbeŋgere erâ beraŋnea wise tâmireeŋgopieŋ; jara‐nâŋec i aŋ baeŋgopeneŋ irec sâc tinac jutaraeŋgopeneŋ.

¹⁰Juju‐nâŋecte dameŋ i jara 70 eekac, â riŋkoa sawa 80 bâfuaekac; maŋnao wiac fuaekac i neneŋ â ʒâic, erâ biac qosackeme ratâmireeŋgopeneŋ.

¹¹Mozi aaricgere tâpiri wânʒâŋ mana wosâeekac, â araŋ bagarehuc kimbeŋgere manasuekac?

¹²Irec ʒoaŋ gie bapa‐nâŋecte sâc qazu‐nâretec maŋɋârâŋhec enʒepeneŋ.

¹³O Wofuŋ, risie‐nârec; ʒâic wezimucko taraocmu? Kiŋaŋ qaqafâcge nâŋere buge sâqoreoc me.

¹⁴Furictea aki anonocgezi bâgunuc‐nâpoc, eme juju dameŋ‐nâŋec sâc ʒeri ehuc bubiaŋ mananʒepeneŋ.

¹⁵Bâʒâic‐nâpo warehuc jumeŋ, ʒoaŋ gie bapa irec sâc jaha bubiaŋ qanârehuc juzemec; â ʒârâ ʒâpâ honehuc jukicne jara irec sâc.

¹⁶Gie baekic i kiŋaŋŋicfâcge fua taniŋke‐jarezejec, â ɋâricfâc‐jeŋic jaŋe eri tatamacge honenʒepieŋ.