Psam 90:2-16

²Tam rorowainagha na God waghata bi muriye da koya kuyaberadi da muriye na kubura kuyabera.

³Wawaya kwawonedi bo, “Koveramagha konidobodobo magha!” Na kwawamiridi da saveramagha sidobodobo, mema sipiikana.

⁴Mata kamomve, na bodu 1,000 na ware gabudara tanagha naboni, toudi ware raghani tupona nubabasu kamone.

⁵Wawaya yadi yawa kwabori yaininagha ware raghanina mimeu yakovina naboni. Touda ware rei didibare yagogo yageena naboni.

⁶Didibare na reina matayina da yagogo yapora bi ravidiye na yivivi da yarabobo.

⁷Noko naboni da yam nuwapughu ghamana yiberomii. Raghanina nuwanuwam yapughu toumii biiyadi, na parapa kanagharena kirakiiyem.

⁸Bi yama bera berodi tupadi kwakitakita bi kiimatipo da yama berona kayikowoyidi, bi gegha da tupadi kwakitadi.

⁹Raghanina yawayawiimii kamakamake na nuwanuwam yapughu toumii biiyadi, da yama yawa kwabori yaiyainedi, mayimayiyina raghanina wawaya yiyawiigurina naboni.

¹⁰Toumii kamake da bodu 70 naboni bi meboda wawaya viya maragasidi na samake da bodu 80 naboni, bi gegha da nuwapoya peyaridi kabanana, na raghani yanagho yaininagha da karabobo.

¹¹Getana iiyabo parapa iyakakovi da yam nuwapughu maragasina metagha; meboda yam nuwapughu kayakowa yapori, na parapa kayakumararayem.

¹²Kiyevevemii da yama yawa makena gabudarina yana guri kanakovi, da toumii noghota miisena tam gwabimma kanakabi.

¹³Yawe God kuveramagha da kuninuwanuwaghanemii! Genuwanuwam inapughumake toumii biiyadina!

¹⁴Yam nuwamonikama didibara patepatena kibonuvimii, da yama make yawana kamone nuwamiimiiseye kanatawora.

¹⁵Bodu peyaridi nuwapoya kuveremii kiiravine, na kata raghani gurina nuwamiise kuveremii! Yama kabikwarakwara kabitavetaveyana, bi bodu miisedi kuveremii!

¹⁶Toumii yam wiitamariyana, yam bagibagi yana maragata kiyevevemii. Yam badobado da maragata metagha na natunatumii kiyevevedi!