Yohɑɑnɩ 8:47-58

⁴⁷Wei ɩ kɛ́ Ɩsɔ nyǝŋ tɔ, pʋntʋ nɩɩkɩ Ɩsɔ Tɔm kɛ́. Amɑ mǝ tɑ́ kɛ́ Ɩsɔ yǝlɑɑ nɑpǝlɩ, nɑ pǝ tɔɔ ɩnǝɣɩ ɩɩ tɩɩ nɩɩkɩ.

⁴⁸Tǝnɑɣɑ Yutɑ nyǝ́mɑ cɔ-ɩ sɩ: Pǝ tɑɣɑ ɩsǝntɔ tɔɔ kɛ́ tɩɩ tɔmɑ sɩ n kɛ́ Sɑmɑlii tʋ, pǝ́cɔ́ n hii ɑlɔɣɑɑ?

⁴⁹Ḿpʋ́ɣʋ́ Yesu cɔ-wɛ sɩ: Mɑ tɑ hii ɑlɔɣɑɑ kɛ pɑɑ pǝcɔ. Amɑ mɑ Cɑɑ kɛ mɑ seeki. Nɑ mɛ, mɩɩ nyǝnǝɣɩ-m yem tǝkpɑtɑɑ.

⁵⁰Pǝ tɑɣɑ ɩsɩɩ mɑ́ pɛɛkǝɣǝnɑ mɑ mɑɣɑmɑɣɑ mɑ teeli kɛ mɑ tɩ. Nɔɣɔlʋ tʋɣʋnɑ-m teeli nɑ ɩ́ hɑɑkɩ-m tɑmpɑnɑ.

⁵¹Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, ye wei ɩ tɔkǝɣɩ mɑ tɔm, pʋntʋ kɑɑ sɩ.

⁵²Tǝnɑɣɑ Yutɑ nyǝ́mɑ tɔmɑ Yesu sɩ: Pǝnɛɣɛlɛ tǝ nyǝmɑ́ tǝkpɑtɑɑ sɩ n kɛ́ ɩlɔɣɔhilu. Apǝlɑhɑm sǝpɑ, nɑ Ɩsɔ kʋyɔɣɔtʋtʋ tɛlǝsǝlɑɑ nɑ́ɑ́ sɩ tɔtɔ, ɩlɛnɑ nɑ́ɑ́ tɔŋ sɩ, wei ɩ́ tɔkɑ nyɑ́ tɔm pʋntʋ kɑɑ sɩ?

⁵³Tɑ cɑɑ Apǝlɑhɑm nɑ́ sǝpɑ, ye mpʋ nyɑ́ hʋʋ sɩ n kǝlɑ ɩlɛɣɛlɛ? Ɩsɔ kʋyɔɣɔtʋtʋ tɛlǝsǝlɑɑ mɑɣɑmɑɣɑ nɑ́ sǝpɑ tɔtɔ. Ɩlɛ n nyǝnǝɣɩ nyɑ́ tǝɣɩ we?

⁵⁴Ḿpʋ́ɣʋ́ Yesu cɔwɑ sɩ: Ye mɑɑ tʋkɑɣɑnɑ mɑ tǝɣɩ teeli, ɩlɛ mɑ teeli ɩnɩ ɩ tɑɑ kɛ́ pʋlʋ se. Amɑ mɑ teeli tʋlʋ ntɛ́ mɑ Cɑɑ, wei mǝ tɔŋ sɩ ɩ kɛ́ mǝ Ɩsɔ tɔ.

⁵⁵Pǝyele ɩnǝɣɩ ɩ́ tɑ́ nyɩ. Amɑ mɑ́ nyǝmɑ-ɩ. Hɑlǝnɑ ye mɑ kpɛɛsɑɑ sɩ mɑ tɑ nyǝmɩ-ɩ, mɑ pǝsɑ pɔpɔtʋ kɛ teitei ɩsɩɩ mɛɣɛ. Amɑ mɑ nyǝmɑ-ɩ, nɑ mɑ tǝŋǝɣɩ ɩ kʋheelitu nɑ mɑ́ lɑkɩ.

⁵⁶Mǝ cɑɑ Apǝlɑhɑm lɑŋlɛ nɑɑ hʋlʋmɑ teu. Pǝ tɑɣɑ pʋlʋ tɔɔ, ɩ tɛɛlɑɣɑɑ sɩ ɩ kɑ́ nɑ́ mɑ kɔntɛ. Nɑ ɩ tɩɩ nɑ-tɛ, nɑ pǝ hɛɛsɩ ɩ lɑŋlɛ kɛ teu.

⁵⁷Tǝnɑɣɑ Yutɑ nyǝ́mɑ cɔ-ɩ sɩ: Nyɑ́ pɩɩsɩ nɑ́ tɑ tɩɩ tɑtɑ nɩɩlɛ nɑ nɑɑnʋwɑ nɑ ń tɔŋ sɩ n tɛmɑ Apǝlɑhɑm kɛ nɑʋ nɑ?

⁵⁸Ḿpʋ́ɣʋ́ Yesu cɔ Yutɑ nyǝ́mɑ sɩ: Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ tuu nɑ pǝ́cɔ́ pɑ́ lʋlɩ Apǝlɑhɑm tɔ, mɑ wɛɛ kɛ́.