YAASINƆ 13:1-20

¹Nɛ́ ↄ̃ndↄ̃dee è a de lɛ́damma ma, fabori è gí kpãkɛ̃nazi.

²Lɛ́gbɛ nnaa è gbɛ̃ ká pↄ́ maaaa, náanɛsaidee è ble a pãsĩ guumɛ.

³Gbɛ̃ kɛ̀ è a lɛ́ kũ è a wɛ̃̀ndi dãkpa, gbɛ̃ kɛ̀ à lɛ́ è kúroo è a zĩnda yaka.

⁴Mɛadee è pↄ́ kɛ̀ à yezi ero, aĩade sↄ̃ è nnaa ma.

⁵Gbɛ̃ maaa zà mↄnafikiyãn, gbɛ̃ zaaa è wí daḿma è ń kpɛ bↄ.

⁶Maakɛna è zɛ́maasɛri mì sí, zaakɛna è durunkɛri liɛ a kpɛɛgãnda.

⁷Gbɛ̃kenↄ è ń zĩnda diɛ auzikidee ũ, mↄde aↄ̃ègↄ̃ pↄ́ke vĩro. Gbɛ̃kenↄ è ń zĩnda diɛ takaasidee ũ, mↄde aↄ̃ègↄ̃ pↄ́ vĩ bíta.

⁸Auzikidee è a zĩnda bↄ kↄ̃n a auzikikɛɛo, takaasidee sↄ̃ è vĩadaanzina ero.

⁹Gbɛ̃ maaanↄ gupuraa ègↄ̃ puna, gbɛ̃ zaaanↄ fitia è gaḿma.

¹⁰Zĩndasɛna lezĩ è swèe da, lɛ́dammamana è tó wà ↄ̃ndↄ̃ kũ.

¹¹Ɔↄ zaaa è gá aɛro, ↄↄ kɛ̀ wà è ísimma guu sↄ̃ è kↄ̃.

¹²Tãmaa gìkɛna è ń nↄ̀sɛ yaka, pↄ́ kɛ̀ wà yezi ena è mↄ́ wɛ̃̀ndi dufuo.

¹³Gbɛ̃ kɛ̀ è yã daroo é yã e, gbɛ̃ kɛ̀ è yã ma é àre e.

¹⁴Ɔ̃ndↄ̃dee yãdannɛnan íbↄki wɛ̃̀ndidee ũ, è ń bↄ ga bàn.

¹⁵Wɛ́ɛzɛ̃ maaa è tó gbɛ̃ dakↄ̃rɛ gòmio, mↄde náanɛsaideenↄ zɛ́ ègↄ̃ pãsĩ.

¹⁶Làakarideenↄ è yã kɛ kↄ̃n dↄ̃nao, yↄ̃nkↄↄ è a faasaikɛɛ ↄdↄańnɛ.

¹⁷Zĩ̀ri zaaa è gɛ̃ yãn, ìba náanɛdee è su aafia.

¹⁸Gina totonazi è mↄ́ takaasio kↄ̃n wíyão, lɛ́dammamana è bɛ̀ɛ líńnɛ.

¹⁹Pↄ́nidɛna ena è ń pↄↄ kɛ nna, mↄde yↄ̃nkↄↄ ye kɛ̃na yã zaaaaziro.

²⁰Gbɛ̃ kɛ̀ tɛ́ ↄ̃ndↄ̃rinↄzi è ↄ̃ndↄ̃ kũ, gbɛ̃ kɛ̀ kakↄ̃ana kↄ̃n yↄ̃nkↄↄnↄ è yã e.