Yáasiↄ 23:2-29

²Tó asiaden n ũ, fɛ̃na da n kòlowa.

³Ńsu to aà pↄ́ níside n wɛ́ bleo, asa blɛpiá kokoazuanɛɛ.

⁴Ńsu ĩada nzĩawa ↄ zↄ̃ↄ ea yã́io, ǹ nzĩa ↄ̃nↄ tó.

⁵Wì wɛ́lɛ ↄ̃awaɛ ↄ̃ ì gɛ̃zɛa, ì gã̀sĩa bↄ ì vua lán yãamusuwa.

⁶Ńsu bĩide blɛ bleo, ńsu to aà pↄ́ níside n wɛ́ bleo,

⁷asa ìↄ a ↄ̃a nao a nↄ̀sɛuɛ. Ì onɛ ǹ pↄble ǹ imi, ãma aà pↄ dↄmao.

⁸Ńyↄ̃ a miↄna pↄ́ ń blè pisiɛ, aà sáau pↄ́ ń kpà i kɛ pã.

⁹Ńsu yã'o sↄũ swã́uo, asa a sakanɛ n ↄ̃nↄyãuɛ.

¹⁰Ńsu kↄↄ baa vĩo, ńsu nɛtonɛↄ bú lɛ ǹ ka n pↄ́uo.

¹¹Asa an Zɛnnↄde gbãa, a bↄ n kpɛɛ, i yã́sińnↄ.

¹²Lɛdama da n sↄ̃u, swã́sɛ dↄ̃ayãi.

¹³Ńsu gí n nɛ́ totoio. Tó ń gbɛ̃̀ ń flão, a gao.

¹⁴Ǹ aà gbɛ̃ ń flão, ǹ aà bↄ ga lɛ́zĩ.

¹⁵Ma nɛ́, tó n nↄ̀sɛ paaa, ma pↄna a kɛ zài.

¹⁶Tó yã́zɛde lɛ́ bↄ n lɛ́u, ma nↄ̀sɛ a yáalↄ.

¹⁷Ńsu duunkɛnaↄ gwea nidɛo, ǹyↄ̃ Dii vĩa vĩ gↄↄpii.

¹⁸Asa ńyↄ̃ↄ zia vĩɛ, mɛ́ tãmaa a n nɛo.

¹⁹Ma nɛ́, ma yãma, ní ↄ̃nↄkũ, to n laai àↄ ku yã́zɛdekɛawa.

²⁰Ńsu yãalɛ ń wɛ̃dɛnaↄo, ńsu ǹyↄ̃ ku lɛ́'udeↄ guuo.

²¹Asa wɛ̃dɛna ń lɛ́'udeo ì gↄ̃ puaɛ, an mɛkɛmuuna ì ń da zwã̀nkasa yeauɛ.

²²Ǹ n de'ia yãma, tó n da zikũ̀, ńsu sakaaàguo.

²³Ǹyↄ̃ sĩana yá, ńsu zɛɛ̀o, ↄ̃nↄ ń yãdanɛo ń wɛzɛ̃o wɛɛlɛ.

²⁴Gbɛ̃maa mae pↄ ìↄ na maamaaɛ, ↄ̃nↄna de'ia mikpɛ ìↄ tɛ́vuɛ.

²⁵To n de ń n dao pↄ àↄ nama, to n da'ia yáalↄma.

²⁶Ma nɛ́, ǹ n nↄ̀sɛ wɛ̃mɛɛ, wɛ́tɛ ma yãkɛai.

²⁷Asa káaluaá ɛ̀ zòoloɛ, nↄɛ dↄ́ɛ'ĩideá tↄ̃ↄ kpaolonaɛ.

²⁸Ì gbɛ̃́ kpákpa lán kpã́iwɛliwɛwa, ì to gↄ̃ɛ daside gↄ̃ náaisaiɛ.

²⁹Dé wì waiyookɛɛ̀i? Dé wì ó'o kɛɛ̀i? Démɛ lɛkpaa vĩi? Démɛ zↄa vĩi? Démɛ ì kɛ'ĩa pãi? Dé wɛ́ mɛ́ tɛ̃ai?