Taalie 23:2-29

²Xa kaamɛ na i ma, i naxa a gbegbe don.

³I naxa milɛ na donse fanyi ma, barima a nɔma i madaxude.

⁴I naxa i yɛtɛ ratagan naafuli fenfe ma. Kɔbiri xɔli naxa findi i xaxili waxɔnfe birin na.

⁵Xa i i ya ti bannaya ra, a lɔɛma i ma alɔ sɛgɛ naxan tema kuye ma ki naxɛ, a siga.

⁶I naxa mixi ɲaaxi xa taami don, i naxa mila a xa donse fanyi ma.

⁷Na mixi mɔɔli wama i madaxufe nɛ. A a falama i bɛ, «I dɛge, i min,» kɔnɔ marafanyi yo mu na a bɔɲɛ kui i bɛ.

⁸I fama nɛ na donse bɔxunde, i xa wɔyɛn fanyi findi wɔyɛn fufafu ra.

⁹I naxa masenyi ti xaxilitare bɛ, barima a yoma nɛ i xa wɔyɛn fanyi birin ma.

¹⁰I naxa naaninyi tɔnxuma fori tala. I naxa so kiridie xa xɛ ra,

¹¹barima e xunmafalama sɛnbɛ gbo, a e gbeɲɔxɔma nɛ.

¹²I bɔɲɛ rabi xaranyi bɛ, i i tuli mati marasi fanyi ra.

¹³I naxa tagan fonike matinxinde, xuru luxusinyi mu a faxama.

¹⁴Xa i a xuru luxusinyi ra, i bara a nii makanta.

¹⁵N ma di, xa lɔnni fanyi lu i bɔɲɛ kui, sɛɛwɛ bara lu n tan fan bɔɲɛ kui.

¹⁶N bɔɲɛ ɲɛlɛxinma nɛ i xa wɔyɛn tinxinxie ra.

¹⁷I naxa yunubitɔɛe tɔɔnɛ, i xa gaaxu Alatala nan ya ra,

¹⁸alako i xa xunnakeli sɔtɔ yare.

¹⁹N ma di, i tuli mati a fanyi ra, i xa xaxili sɔtɔ, i bɔɲɛ xa lu kira tinxinxi fari.

²⁰I naxa lu siisilae ya ma, xa na mu a ra naxee xa donse xɔli dangi a i.

²¹Na mixi mɔɔlie findima nɛ setaree ra, e xa tunnaxɔnɛya a niyama nɛ dunkobi gbansan nagoro e ma.

²²I i tuli mati i baba ra naxan i barixi, i naxa yo i nga ma a na fori.

²³Nɔndi, lɔnni, xaranyi, nun xaxili fanyi fen, i naxa mɛɛ e ra.

²⁴Tinxintɔɛ baba sɛɛwama nɛ, xaxilima baba ɲɛlɛxinma nɛ.

²⁵I xa fe birin naba alako i baba nun i nga xa sɛɛwa, i bari mixie xa lu ɲɛlɛxinyi kui.

²⁶N ma di, i i bɔɲɛ rabi n bɛ, i xa i ya ti n ɲɛrɛ ki misaali ra.

²⁷Langoe ginɛ findixi gantanyi nan na, ginɛ yɛnɛxi i rabirama nɛ.

²⁸Na ginɛ mɔɔli i yanfama nɛ alɔ muɲɛti, a a niyama nɛ xɛmɛ gbegbe xa findi yanfantee ra.

²⁹Nde tɔɔrɛ nun nimisɛ sɔtɔma? Nde luma gere nun kalamui ya ma? Nde bɔnbɔɛ fufafu sɔtɔma? Nde ya gbeelima nɛ soe?