Swĩi 1

1

2

3

4

5

¹Yerusɑlɛmu yè sɔɔ tɔmbɑ rɑɑ dɑbi, wee yɑ wɑ̃ɑ ye tɔnɑ, yɑ kuɑ nge gɔmini. Yɑ rɑɑ yĩsiru yɑrɑ bwesenun suunu sɔɔ. Wee tɛ̃ bɑ ye yoru diisiɑmɔ.

²Yɑ wuri mɔ̀ wɔ̃ku giriru mɑ yen nɔni yĩresu kokumɔ. Be bɑ rɑɑ sɑ̃ɑ yen kĩnɑsibu, ben goo sɑri wi u ye nukuru yɛmiɑsiɑmɔ. Be kpuro bɑ kuɑwɑ nɑɑnɛ sɑribɑ, mɑ bɑ kuɑ yen yibɛrɛbɑ.

³Bɑ Yudɑbɑ gurɑ bɑ kɑ doonɑ tem tukumɔ. Mɛyɑ, bɑ bu dɑm dɔremɔ bɑ yoru diisiɑmɔ. Bɑ ku rɑ n wɛ̃rɑbu mɔ. Ben yibɛrɛbɑ bɑ bu wɔri subɑru sɔɔ bɑ deemɑ bɑ wɑ̃ɑ nɔni swɑ̃ɑru gɑru sɔɔ.

⁴Yerusɑlɛmu yɑ wɑ̃ɑ nuku sɑnkirɑnu sɔɔ, domi bɑ ku rɑ mɑɑ yen swɛɛ sĩ bu tɔ̃ɔ bɑkɑru nɑ. Goo kun mɑɑ wɑ̃ɑ yen gbɑ̃rɑ kɔnnɔwɔ. Yen yɑ̃ku kowobu bɑ weeweenu mɔ̀. Yen wɔndiɑbɑn nuki sɑnkirɑ. Yen tii yɑ wɑ̃ɑ nuku sɑnkirɑ bɑkɑru sɔɔ.

⁵Yen yibɛrɛbɑ bɑ ye tɑbu di, mɑ bɑ wɑ̃ɑ bɔri yɛndu sɔɔ. Yinni Gusunɔwɑ u ye nuku sɑnkirɑ ni kpɛ̃ɛ yen torɑ dɑbinun sɔ̃. Wee yibɛrɛbɑ bɑ yen bibu kpɑrɑ bɑ kɑ dɑ bɑ yoru diisiɑmɔ.

⁶Yerusɑlɛmun bɛɛrɛ yɑ kpɑ. Mɑ yen wirugibu bɑ kɑ gini weenɛ yi yi ǹ yɑkɑsu wɑ yi di. Yi ǹ mɑɑ dɑm mɔ mɑ yi duki mɔ̀ tɑɑson wuswɑɑn di.

⁷Sɑɑ yeni sɔɔ, Yerusɑlɛmu yɑ wɑ̃ɑ yɑ̃ɑru sɔɔ, yen tɔmbɑ yɑɑyɑɑre mɔ̀. Yerɑ yɑ yɑɑyɑ gɑ̃ɑ gee ni yɑ rɑɑ mɔ yellu. Sɑnɑm mɛ yen yibɛrɛbɑ bɑ ye kɑmiɑ, yɑ goo biɑ u nɑ u ye somi, mɑ n yibɛrɛ be dore, bɑ ye yɑɑkoru koosimɔ.

⁸Yerusɑlɛmu yɑ torɑ too. Yen sɔ̃nɑ bɑ ye tusɑ. Be bɑ rɑɑ ye doke, bɑ̀ n yen bɑnsu wɑ bɑ rɑ ye gɛmwɑ. Wee, yen tii, yɑ weeweenu mɔ̀, yɑ wɑ̃ɑ sekuru sɔɔ.

⁹Wee, yen durum yĩreru tɑ wɑ̃ɑ yen yɑberɔ. Adɑmɑ yɑ ǹ dɑɑ yen kpeeru bwisikɑ. Yɑ wɔrumɑ subɑru sɔɔ goo kun ye nukuru yɛmiɑsie. Mɑ yɑ nɔɔgiru suɑ yɑ nɛɛ, Yinni Gusunɔ, ɑ nɛn nɔni swɑ̃ɑru mɛɛrio. A mɛɛrio nge mɛ yibɛrɛ u tii sue.

¹⁰Wee, bɑ nɛn gɑ̃ɑ gee ni nɑ mɔ gurɑ. Wee, bwese tuku ni ɑ yinɑ nu n wɑ̃ɑ kɑ wunɛn tɔmbu sɑnnu, nu duɑ wunɛn sɑ̃ɑ yerɔ.

¹¹Wee, Yerusɑlɛmugibu kpuro bɑ wɑsire bɑ dĩɑnu kɑsu ni bɑ koo di. Mɑ bɑ kɑ ben gɑ̃ɑ geenu dĩɑ ni kɔsinɑ bu wɑ bɑ n kɑ wɑ̃ɑ. Yerusɑlɛmu yɑ nɛɛ, Yinni Gusunɔ, ɑ mɛɛrio nge mɛ nɑ wɔnwɔndu soore.

¹²Bɛɛyɑ nɑ kɑ yɑ̃, bɛɛ be i sɑrɔ mini kpuro. I mɛɛrio nɔni swɑ̃ɑru gɑru tɑ̀ n mɑɑ nɛgii teni kere, te Yinni Gusunɔ u mɑn kpɛ̃ɛ win mɔrun sɑɑ sɔɔ.

¹³Sɑɑ wɔllun di n sɑ̃ɑre u dɔ̃ɔ suremɑ nɛn wɑsi sɔɔ, mɑ u mɑn di. U nɛn nɑɑsu yinɑ bɛriɑ. Mɑ u mɑn surɑ gbɑru gbɑrɑ u mɑn kpɛ̃ɛ nuku sɑnkirɑnu sɔɔ sere kɑ bɑɑdommɑɔ.

¹⁴U nɛn torɑnu kpuro mɛnnɑ nge wɛ̃ɛ yi bɑ tɑrɑ. Mɑ u nu gbinisi nɛn wĩirɔ. U nɛn dɑm buɑ. Mɑ u mɑn yibɛrɛ nɔmu bɛriɑ mi nɑ ǹ kpɛ̃ n kɑ tii yinɑ.

¹⁵Yinni Gusunɔ u nɛn tɑbu kowobu sururɑ. U tɑbu durɔbu mɛnnɑ bu kɑ nɛn ɑluwɑɑsibɑ kɑm koosiɑ. U nɛ, Yerusɑlɛmu tɑɑkɑ nge mɛ bɑ rɑ resɛm tɑɑku.

¹⁶Yen sɔ̃nɑ nɑ wurɑ mɔ̀, nɑ nɔni yĩresu kokumɔ. Wi u koo mɑn nukuru yɛmiɑsiɑ u mɑn wɑ̃ɑru wesiɑ, u mɑn deri. Nɛn bibɑ nuki sɑnkire, domi yibɛrɛ u mɑn kɑmiɑ.

¹⁷Nɑ nɔmɑ yiiyɑ nɑ kɑnɑru kuɑ. Adɑmɑ goo kun nɛ u mɑn nukuru yɛmiɑsiɑ. Yinni Gusunɔ u derɑ be bɑ kɑ nɛn tɔmbu Isirelibɑ sikerenɛ bɑ kuɑ nɛn yibɛrɛbɑ, mɑ bɑ mɑn gɑrisi disi.

¹⁸Yinni Gusunɔ u gem mɔ ye u kɑ kuɑ mɛ. Domi nɑ ǹ win gere mɛm nɔɔwɛ. Bɛɛ bwesenu kpuro, i swɑɑ dɑkio i nɔ, kpɑ i nɛn nuku sɑnkirɑnu wɑ. Nɛn wɔndiɑbɑ kɑ nɛn ɑluwɑɑsibɑ bɑ yoru dɑ tem tukumɔ.

¹⁹Nɑ nɛn kĩnɑsibu somiru kɑnɑ, ɑdɑmɑ bɑ mɑn bɔrɔ kɔ̃ɔru kuɑ. Nɛn yɑ̃ku kowobu kɑ wuun guro gurobu bɑ gu nɛn swɛɛ sɔɔ sɑnɑm mɛ bɑ dĩɑnu kɑsu ni bɑ koo di bɑ n kɑ wɑ̃ɑ.

²⁰Yinni Gusunɔ, ɑ nɛn nɔni swɑ̃ɑru mɛɛrio, nɛn bwɛ̃rɑ kun kpĩ. Nɑ nuki sɑnkire too, domi nɑ ǹ nun mɛm nɔɔwɛ. Tɔɔwɔ tɑbu sun dimɔ. Mɑ wuun sɔɔwɔ gɔɔ wɑ̃ɑ.

²¹Bɑ nɛn weeweenu nuɑ. Adɑmɑ goo kun mɑn nukuru yɛmiɑsie. Yibɛrɛbɑn nukurɑ dorɑ, yèn sɔ̃ ɑ mɑn kuɑ mɛ. Ǹ n mɛn nɑ, ɑ de tɔ̃ɔ te, tu nɑ te ɑ geruɑ mi, kpɑ bu ko nge nɛ.

²²A ben nuku kɔ̃suru mɛɛrio, kpɑ ɑ bu kuɑ nge mɛ ɑ mɑn kuɑ nɛn durum kpɑ̃ɑrun sɔ̃. A mɛɛrio nge mɛ nɑ weeweenu mɔ̀, nɛn nuki sɑnkire.