1Ka wati tjuṯangku ngura nyara ini Tjipalanguṟu ankula Saulanya nyangu ngura panya Kipiyala nyinanyangka tawunu walytjangka munuya palula wangkangu, “Kulila, Davidanya tjana kumpiṟa nyinanyi puḻingka ngura Akilala ngura ini Tjitjimanta itingka.”
2Ka Saulanya tjana wati warmaḻa 3,000-tjara ritiringkula anu ngura panya piḻṯikutu ini Tjipalakutu Davidanya ngurintjikitja.
3Munuya wirkaṟa ngura tjunu iwarangka itingka puḻi panya Akilala ngura ini Tjitjimanta itingka palu Davidanya kumpiṟa nyinangi ngura nyara piḻṯingka Tjipala.
4Ka Davidalu wati palumpa tjuṯa iyaṉu ankula nyakunytjaku, “Yaaltjingkaya wati panya Saulanya tjana ngura tjunkula nyinanyi?” Kaya ankula ma-nyakula pitjala Davidala tjakultjunu.
5Ka munga kultungka Davidanya wati tjuṯatjara anu ngura nyara palulakutu panya Saulanya tjana ngarinytjalakutu munuya nyangu Saulanya pula Apananya tjanala nguṟurpa ngarinyangka. Kaya palumpa pulampa tjaultji tjuṯa para-ngarira waṉaningi kunkunpa uwankara. (Apananya wati ini Nuupaku katja, munu paluṟu Saulaku tjaultji tjuṯaku mayatja.)
6Ka wati kutjara Davidala tjungu ngaṟangi Ayima-likanya (wati panya Iitakunu) munu Joabaku maḻanypa ini Apitjainya kuḻu. Ka Davidalu palula pulala wangkangu, “Wati ngananya ngayula tjungu pitjaku Saulaku ngurakutu?” Ka Apitjailu wangkangu, “Ngayuluṉa.”
7Ka munga nyara palula Davidanya pula Apitjainya panykalkatira Saulaku ngurangka wirkanu tjana kunkunpa puḻka ngarinyangka, munu pula Saulala itingka ngaṟangi kunkunta. Ka palula katangka itingka palumpa kuḻaṯa muṟutjunkunytja ngaṟangi, kaya Apananya tjana tjaultji tjuṯa kuḻu kunkunpa uwankara ngaringi.
8Ka Apitjailu Davidala tjaalymaṟa wangkangi, “Godalunta kuwari nyuntunya unganyi Saulanya panya nyuntumpa mirpaṉtju. Wanyu kaṉa kuḻaṯa nyanga palumpangka wakaṟa mantangka tjakatjuṟa wanti ka ilu.”
9Palu Davidalu tjaalymaṟa wangkangi, “Wiya iluntankuwiyangku wantima, panya Godalu palunya mayatja ngurkantanu kinga nyinanytjaku, ka kutjupangku pungkunytjaku wiya ngaṟanyi. Palu tjinguṟu kutjupangku palunya iluntankuku, ka Godalu aṉangu nyara palunya wiyalku.
10Palu ngula Godalu mulapa Saulanya wiyalku alatjiṯu. Tjinguṟu paluṟu wati tjiḻpiringkula kutju iluku munta tjinguṟu pikangka iluku.
11Panya Godalu palunya ngurkantanu mayatja kinga nyinanytjaku, kaṉa ngayulu Godalu ngurkantankunytjitja puṯu punganyi. Palu wanyuli kuḻaṯa munu piti nyanga minatjara kutju mantjiṟa kati, munuli ngura nyangatja wantikati!”
12Munu Davidalu kuḻaṯa munu mina panya Saulala katangka itingka ngarinytjanya mantjiṟa katingu munu pula anu. Uwa, Godalu Saulanya munu tjaultji kuḻu kunkuntjunu rawa ngarinytjaku, kaya nyakunytja wiyaṯu pula ngaṟala ankunyangka.
13Palulanguṟu pula ankula puḻi kutjupangka tjukutjuku patu ngaṟanyangka ma-tatinu.
14Munu puḻi katunguṟulta Davidanya mirangu Saulaku tjaultji tjuṯakutu munu tjanampa mayatja Apanala mirara wangkangi, “Apana! Kuliniṉin!” Ka Apananya ngapartji ma-mirangu, “Nganalun palatja mirara urulytjingaṉi nganampa kinga?”
15Ka Davidalu mirara ma-wangkangu, “Nyuntu panya kunyun tjaultji wiṟu mulapa Israelku munun palulanguṟu uti kinga nyuntumpa nyakula aṯunymanama kunkunpa ngariwiyangku, palu wati kutjara nyurala kunkunta ankula ngaṟangi mayatja panya nyuntumpa iluntankunytjikitja.
16Panya Mayatja Godalu Saulanya ngurkantanu Israelkunuku kinga nyinanytjaku. Ka nyura palunya aṯunymankuwiyangku wantirampa ilunytjaku ngaṟanyi. Nyawa kuḻaṯa munu piti minatja palumpa katangka itingka ngarinytja. Kuwari nyura nyanganyi? Pala wiya ngaṟanyi. Ngalili mantjiṟa katingu!”
17Ka Saulalu wankaringkula kuliṟa ngurkantanu Davidanya wangka, munu mirara ma-tjapinu, “Nyuntun palatja Davida, ngayuku panya katja?” Ka Davidalu wangkangu, “Uwa mayatja. Ngayuluṉa nyuntumpa panya waṟkaripainya.
18Nyaakuṉin wataparaṉi? Kutjupa kutjupaṉa nyuntumpa ngunti palyaṉu?
19“Mayatja, wanyuṉi wiṟungku kulila! Tjinguṟu Godalu nyuntunya ngayuku mirpaṉarinytjaku palyaṉi, kan tjinguṟu kuka tiliwakaṟa palunya ungkuku, katju ngayuku kalyparingkuku. Palu tjinguṟu aṉangu tjuṯangku nyuntunya ngayuku mirpaṉarinytjaku palyaṉi, kaṉa ngayulu mukuringanyi Godalu tjananya wiyantjaku, panya paluṟu tjanaṉiya ngura panya Godalu ngayunya ungkunytjitjanguṟu paiṉu kaṉa ngayulu wantikatira anu. Panya wangkanguṉiya ankula goda ngalypa-ngalypa tjuṯa waḻkuntjaku.
20Palu mayatja wiṟungkuṉi wantima ngura malikitjakutu parari wantir'iyantja wiyangku Mayatja Godalanguṟu patu ilunytjaku-tawara. Wanyuṉi kulila wiṟungku! Ngayuluṉa nyuntunya uuḻinkunytja wiya. Ngayulu puḻka wiya tjukutjuku tjiṯu puṟunypa. Nyaakuṉin puḻka-palku ngurini? Panya kutjupangku tjuḻpu kuḻunypa tjuṯaku puḻi katu ngurilpai, palu puṟunypaṉin ngurini.”
21Ka Saulanya kuliṟa kuṉṯaringu munu wangkangu, “Uwa mulapa, kurangkuṉa ngayulu ngunti palyaningi. Katja, wanyutju maḻaku pitja! Panya nyuntuṉin kuwari wankaṟunu iluntankuwiyangku, kaṉanta palulanguṟu nyuntunya ngapartji wantinyi nguḻuṟa aṟuntja wiyangku.”
22Ka Davidalu wangkangu, “Nyangatjanku kuḻaṯa panya! Wati kutjupa wituṟa ngalya-iyala mantjintjaku!
23Panya aṉangu kutjupangku Mayatja Godanya wangaṉarangku kulinnyangkampa palunya paluṟu pukuḻmankupai. Panya paluṟuṉi nyurampa ngurangka kuwari tjarpatjunu, palu pungkunytja wiyaṯuṉa nyuntunya, panya Mayatjalunta ngurkantanu kinga nyinanytjaku.
24Uwa, kuwari ngayulu nyuntunya iluntankunytja wiyangku wantingu. Palulanguṟuṉa ngayulu ngapartji Mayatja Godala tjapini ngayunya wankaṟu anga-kanyintjaku.”
25Ka Saulalu wangkangu, “Kaṉanku Mayatjala tjapini nyuntunya aṯunytju kanyintjaku munu kuṉpungku wiṟu tjuṯa palyantjaku.” Ka Davidanya ma-pakaṟa anu, ka Saulanya maḻaku ngura walytjakutu anu palumpa wati tjaultji tjuṯatjara.
