1Dɑfidin womu ɡe u wom kowobun wiruɡii kuɑ. U nɛɛ, Yinni Gusunɔ, wunɑ nɑ siɑrɑmɔ, ɑ ku nɔɔ mɑri.
2Wee tɔn kɔ̃sobu bɑ mɑn ɡɑri ɡerusimɔ mɑ bɑ mɑn weesu kuɑmmɛ.
3Bɑ kɑ mɑn ɡɑri mɔ̀ kɑ tusiru, mɑ bɑ kɑ mɑn sɑnnɑmɔ kɑm sɔɔ.
4Nɛ, nɑ bu kĩ, ɑdɑmɑ bɑ mɑn nɔɔ kuurimɔ. Mɑ nɑ kɑnɑru mɔ̀ be, nɛn yibɛrɛbɑn sɔ̃.
5Wee bɑ mɑn kɔ̃sɑ kɔsiemɔ ɡem ɑyerɔ. Mɑ bɑ mɑn tusɑ bɑɑ mɛ nɑ bu kĩru sɔ̃ɔsimɔ.
6A de tɔn kɔ̃so u nɛn yibɛrɛ kpɑrɑ, kpɑ wi u koo nùn tɑɑrɛ wɛ̃ u n wɑ̃ɑ win nɔm ɡeuɔ.
7Bɑ̀ n nùn siri kpɑ bu deemɑ u tore. Kpɑ bu win kɑnɑru ɡɑrisi durum.
8Win tɔ̃ru tu ku dɛnyɑ kpɑ ɡoo u nùn kɔsire ko win sɔmburu sɔɔ.
9Kpɑ win bibu bu ko ɡobekubɑ, kpɑ win kurɔ u ɡɔminiru sinɑ.
10Kpɑ win bibu bu ko yɑɑyɑɑre kowobu, bɑ n bɑrɑ mɔ̀. Kpɑ bu ben wuu deri ɡu ko bɑnsu, bu dɑ bɑ n dĩɑnu kɑsu mi n tomɑ.
11Bèn dibu u nɛni, bu nɑ bu win yɑ̃nu kpuro ɡurɑ. Kpɑ tɔn tukobu bu win dukiɑ ɡurɑ.
12Goo u ku rɑɑ nùn durom kuɑ. Goo u ku mɑɑ win bii ɡobekubɑn wɔnwɔndu ko.
13Bu win bibun bweseru ɡoowo, kpɑ win yĩsiru tu ɡbi.
14Gusunɔ u win bɑɑbɑbɑn torɑnu yɑɑyo, kpɑ u ku win mɛro nùn win durum suuru kuɑ.
15Yinni Gusunɔ u de u n win torɑ ni yɑɑye, kpɑ u win yĩsiru ɡo mɑm mɑm.
16Domi u ǹ wɔnwɔndu sɔ̃ɔsi. U sɑ̃ɑrobu kɑ wɔnwɔndobu nɔni sɔ̃ɔwɑwɑ sere u tɔnu ɡo wi u nuki sɑnkire.
17Bɔ̃riyɑ u kĩɑ. Ǹ n mɛn nɑ, yi nùn dio. U ǹ domɑru kĩɛ. Ǹ n mɛn nɑ, tu kɑ nùn tondo.
18Bɔ̃ri yi nùn wukirio nɡe yɑberu. Yi duurio win wɑsin sɔɔwɔ nɡe nim, kpɑ yi du win kukunu sɔɔ nɡe ɡum.
19Bɔ̃ri yi, yi nùn wukirio nɡe yɑ̃ɑ ni bɑ rɑ doke, kpɑ yi n nùn sɛ̃ke bɑɑdommɑ nɡe kpɑkɑ.
20Yeniwɑ Yinni Gusunɔ u koo de yu nɛn yibɛrɛbɑ kɑ be bɑ mɑn kɔ̃sɑ ɡerusimɔ deemɑ.
21Wunɛ Yinni Gusunɔ, ɑ nɑ ɑ mɑn sɑnnɑ wunɛn yĩsirun sɔ̃. A mɑn wɔro. Domi wunɛn tɔn ɡeeru tɑ kpɑ̃.
22Wee nɑ sɑ̃ɑ wɔnwɔndo, nɑ ǹ ɡɑ̃ɑnu mɔ, mɑ nɑ nuki sɑnkire.
23Wee nɑ doonɔ nɡe sɑɑru. Mɑ bɑ mɑn ɡire nɡe twee.
24Nɛn dũu winu dɑm dwiiyɑ nɔɔ bɔkurun sɔ̃. Mɑ nɑ wɑsire woorɑrun sɔ̃.
25Nɑ kuɑ wi u sekuru sɔɔwɑ ben mi. Mɑ bɑ mɑn mɛɛrɑ bɑ wii ɡimɑnu koosimɔ.
26Gusunɔ nɛn Yinni, ɑ mɑn somiɔ. A mɑn fɑɑbɑ koowo wunɛn tɔn ɡeerun sɔ̃,
27kpɑ bu ɡiɑ mɑ wunɑ ɑ nɔmu mɔ be sɔɔ. Wunɑ ɑ mɑɑ kpuro mɔ̀.
28Ye bɑ bɔ̃rusimɔ, yerɑ wunɛ kɑɑ domɑru kuɑ. Bɑ̀ n seewɑ, bɑ koo sekuru wɑ. Kpɑ nɛ, wunɛn sɔm kowo n nuku dobu ko.
29Nɛn yibɛrɛbɑ bɑ koo sekuru wɑ, kpɑ tu bu wukiri nɡe yɑbe bɑkɑru.
30Kon nɔɔɡiru suɑ n Yinni Gusunɔ siɑrɑ. Kon nùn siɑrɑ tɔn dɑbinun wuswɑɑɔ.
31Domi u rɑ n wɑ̃ɑ bwɛ̃ɛbwɛ̃ɛbun bɔkuɔ u kɑ bu fɑɑbɑ ko be bɑ bu tɑɑrɛ wɛ̃ɛmɔn nɔmɑn di.
