1Ngode Datagaliwabe-o i̱na í̠naga mini yaraga halu bi larogo haleore howa ladai bibe.
2Agali ko bu karumebi ke̱ hagane bu karumebi i̱ handabe manga howa ke̱ halu i̱ mege bialu kagoni ndobe.
3Tigua i̱ mini lalu ke̱ howa bi koore lalu ka. Tigua irane mbira nayi howa bi ko ogoni lalu ka.
4I̱na nde ti gubalini ho howa Anduane Homogohondo tinaga bi lahalu kogoni. I̱na ani berogo bilowa tigua nde i̱ handabe manga haga ka.
5I̱na tihondo mana bayaleru bialu kogola tigua i̱hondo mana ko biadai biaga ka. I̱na tihondo gubalini ho kogola tigua i̱hondo gubalini nahe handabe manga haga ka.
6I̱ waitigi kagonaga bi larago mo tale bilonaga agali ko mbira dabo helabe. Ibuninaga waitigi kagome ibuni godini haru pu helelo helabe.
7Agali godi hale haga kagome agali godini pu kagola ko bini mbira ngane handalu garabaya helelo hameledo. Agali ogonime Ngode Datagaliwabehondo bi laradagobi ko dege bini lalu walia holebira.
8Ibu dindini lu nahe abale homelo hameledo. Biabe ibugua bialu haga ngaru agali mendealime bia aribia halu helo hameledo.
9Agali ogoninaga waneigini ti aba nahe helo ibu onebi wali dalo berelo hame ledogoni.
10Ibunaga waneiginiore tinaga anda mbira nahe yagibanoore howa ibaga hangu bialu ngi ngi laabo haga helo hamelo kogoni. Ti anda koha palu karia agali marume ibalu ti bo taliatagi helo hamelo kogoni.
11Waitigi agali ogoni ibu baba agali maru dano ho heneme ibunaga dindibi mbirale wiyadarubi ti karulai helo hameledo. Agali dindi taraha howa íbu hene karume ibunaga biabe bialu hayagonaga yolo ti mo nelo hameledo.
12Maru karume agali ogoni biamogo nabilo ibu waneigini helalu homeneru mbiralime dara howa biamogobi nabilo hamelo kogoni.
13Ibunaga waneigini aguanenerubi homai halu dabane mani holebirarume ibunaga mini embedaho wahelo hamelo kogoni.
14Anduane Homogohanda agali biagonaga mamali bamba henerume ko biyaru mitangi bu wiaabo halu ibu ai̱yahanda ko biyarubi domo wanahelo hameledo.
15Anduane Homogo ibugua urunime ko bibahende biyaru mitangi bu wiaabo halu marume ti hameigini heneru embeda ho wahelo hameledo.
16Agali o biago ibugua mendeali kago dara holene mitangi nabiaga hene. Ibugua yagibano hearubi mbirale nayi burupale hearubi hongo nahe genda yu hearubi ti mo tandaga halu bo wahaga hene.
17Bamba ibugua agali maru hearu mo ko helonaga ha haga hene. Áyu marume nde ibuni ha helo hameledo. Ibugua Ngode Datagaliwabehondo agali mende kago biamogo bibe lalu bi laholene mangaho haga hene. Ibuni nde maru karume turu howa biamogo nabilo hameledo.
18Horo bibahendengi ibugua aga karulo haabo hagadagua ibu mendeali kago ha holene mugube hene. Ibugua maruhondo ha haragome ibuni tinginiha iba ale anda pialu ibu kuniha weli ale anda pelo hameledo.
19Ha holene bi ogonime ibuni tingini aga biadambi haradagua bialu ibuni mandibu wu haradagua bilo hameledo.
20Anduane Homogo-o waitigime i̱hondo bi ko ogonibi laga kago tini ko helo pani ogonidagua nelo mibe.
21I̱naga Anduane Homogo Bibahende Haru Hame Ho Haga-o í̠na i̱ biamogo bulebero lalu lo wiridagua biamogo bibelo hamelo kogoni. Í̠naga gubalini holenemebi bayaleore bulenemebi i̱ pele ngialu haru dai bibelo hamelo kogoni.
22I̱ bu miniha genda tandagabi yu haabo kogome i̱ yagibano howa burupale kogoni.
23Alendo ni anda poragola ni munini biago abale ereba haralidagua i̱ abale pu wahole kogoni ndobe. I̱ore bame hinabibi ale bedoria puyabume pulo wahabehe kogoni ndobe.
24I̱ tomo nane kogome i̱naga ge duli hongo nahe kogoni. I̱ni obu wahalu i̱naga kuni bibahende pirilape hai ka.
25Wali agali i̱ de handararume i̱ hondo oba halu mege bialu ma tandalaga bialu kagoni ndobe.
26Anduane Homogo i̱naga Ngode Datagaliwabe-o i̱ biamogo bibe. Í̠na i̱hondo gubalini timbuni ho haabo haga kegome i̱ pele ngibe.
27I̱ waitigi bu karume i̱ pele ngiaga í̠ni kegonida manda bilo walia habe.
28Tigua i̱ Ngode Datagaliwabehanda mo ko helo laga bialu ha holebiragoyu í̠na i̱ biamogo biaabo haga kegoni. Agali i̱ mo tandaga haga karu tini mo tandaga habelo hamelo kogoni. Í̠naga biabe biahaga i̱ kogo i̱naga miniha dungulo holiya mo dungula habe.
29I̱ waitigi biaru ti taga pani timbuni nalu helo hameledo. Tigua aga lu biagimbubi karulagadagua ti taga harago wali agali karume hendelo í̠na taga holeneme ti karulagimbu bu helabelo hamelo kogoni.
30I̱na bi hongo howa ladaga halu Anduane Homogohondo turu howa ka̱i̱ timbuni lalu holebero. Wali agali dewali Anduane Homogo mitangi bialu lotu lole ngoai ho kagoria i̱na Anduane Homogonaga mini yaraga holebero.
31Ibugua wali agali yagibano karu biamogo biaga ka. Wali agali marume godi deni haru tagira puwa uruni ti bo waholene nga nalelobi ibugua ti handayaho halu tinaga lahaga ka.
