1कुम्सो पपाइक्ब कली दाऊद आ कुम्सो। “परमप्रभु, गो इन कली ठेयब सेल्नुङ। गे सिक्सी पा मबाक्कीन।
2मारदे हना इन अरेशो मटीब नु जोल पाइबपुकीमी आं पर्बम जोल पा लोव़ पाइनीम।
3मेकोपुकीमी आं कली काइ मदाक्थु, लोव़ पा, आं कली जिचा तोशा मोशा ग्राम्नीम।
4मेकोपुकीमी आं दाक्शो आ पा ङा, आं कली दोस गेनीम। मो हना यो गो मेको आन पर्बम पुंइनुङ।
5मोपा मेकोपुकीमी आं रिम्शो पाइश्शो आ पा ङा मरिम्शो पाइनीम। आं दाक्शो आ पा ङा आं कली काइ मदाक्नीम।
6मेकोपुकीमी मेको कली दोस गेचा कली परमप्रभु आ अरेशो मटीब का वोतीन। मेको कली दोस गेचा कली मेको आ ग्युरा गे राप्चा माल्ब। मत्ती ५:४३,४४; लूका २३:३४
7मिनु मेको आ निसाफ दुम्मेनु, मेको दोस ताइब दुम्ल। मिनु मेको आ परमप्रभु कली पुंइतीक लोव़ पाप दुम्ल।
8मेको आ ब्रोंइतीके नाक्त इच्का ला दुम्ल। मिनु मेको आ गेय अर्कोम पवल। प्रेरित १:२०
9मेको आ तमी तौ रोम रोइक्च दुम्मल। मिनु मेको आ मीश वोंइश बेक्शो मीश दुम्ल।
10मिनु आ तमी तौ हिरशा पुंइशा जाइब दुम्मल। मेको आन ब्रेश्शो खिं रे यो खेरचा पुंइसीमल।
11मेको कली जेर गेबमी मेको आ मारेइ मारेइ नेक्गल। अरु मुरुमी मेको आ चेम्शो नेल्ल रोइक्तमेक्ल।
12सुइमी मेको कली शिशी मकोंइदमेक्ल। आ तमी तौ आन कली यो शिशी मपामेक्ल।
13मेको आ खिं ङा मुर नेल्ल क्याम्सीमल। मिनु आ तमी तौ आन पालाम मेको आन नें क्याम्सेक्ल। इजीकीएल १८:२०-२३
14मिनु परमप्रभु यावेमी मेको आ किकी पिपी आन पशो पाप मिम्चा माल्ब। मेको आ ममा आ पशो पाप मक्याम्सेक्ल। प्रस्थान २०:५
15मेको आन पाप गेना हना यो परमप्रभु यावे आ ङोंइती लील। मिनु सुइमी मेको आन कली रागीम ममिम्तमेक्ल।
16मारदे हना मेकोमी काइ शिशी मपव। तन्न प्रुङग, श्येत जाइब नु थुं लुक्च लशो मुर आन कली साइक्चा कली खेदा पाप्तु।
17मेकोमी सराप चीले पचा दाक्ताक्व। मिनु मेको सराप चीले रल। मेकोमी आसीक गेचा मदाक्त। मोपतीके आसीक मेको रे ङोन बाक्ल।
18मेकोमी सराप चीले वा फेक्सीशो खोदेंशो पा फेक्साक्व। सराप आ रांम ब्वाक्कु खोदेंशो पा बाक्ल। तेल खोदेंशो पा मेको आ रुशेम ब्रील। गन्ती ५:२४
19मेकोमी सराप चीले आ वा खोदेंशो पा फेक्सेक्ल। मिनु किप्शुर खोदेंशो पा नाक्त किंत किंत किम्सेक्ल।
20परमप्रभु यावेमी आं कली दोस गेब नु आ पर्बम मरिम्शो लोव़ पाइब कली मोदेंशो सजाइ गेवल।
21तन्न परमप्रभु यावे, परमप्रभु, गे इन नें आ पर्बम आं कली वारच पाइय्यीनी। मारदे हना इन गेना हना यो दाक्तीके ठेयब बाक्ब।
22गो प्रुङग नु श्येत जाइब दुम्ती। मिनु आं थुं खाइश्शो बाक्ब।
23गो नां लाक्शो ना ङा वांकु खोदेंशो पा जाम्शो बाक्नुङ। थुर थुर पाइश्शो सल्हा खोदेंशो बाक्नुङ।
24गो माइजा बाक्ङानु, आं खोइली योक्शो बाक्ब। मिनु गेयशो बाक्नुङ।
25आं कली दोस गेबपुकी आ कली तशा गाइक्नीम। मिनु आन पिया हिम्नीम।
26परमप्रभु यावे, आं परमप्रभु, वारच पाइय्यीनी। इन गेना हना यो दाक्तीकेमी आं कली प्रोंइयीनी।
27मेकोपुकीमी ‘परमप्रभु यावेम आं कली वारच पाइब’ दे तुइक्तमेक्ल।
28मेकोपुकीमी सराप चीले पामेक्ल। तन्न गे आसीक गेने। मेकोपुकी बोक्मानु, मुने दोक्मल। तन्न इन गेय पाइब ग्येरसीब। लूका ६:२७-२८
29आं कली दोस गेब आन कुल मुनेम सुम्सीमल। मिनु आन मुने दोक्तीके फेक्तीके वा खोदेंशो पा फेक्सीमल।
30गो परमप्रभु यावे कली ‘गे थम रिम्शो पाइब बाक्नीनी’ देंनुङ। शुश मुर आन दातेमी गो मेको कली ठेयब सेल्नुङ” देंती।
31मारदे हना मेको श्येत जाइब आन कली साइक्ब आन गुइ रे प्रोंइशा वारच पाइब बाक्ब।
