1¡Dios, dxue lá'ana' Lue'! Quebe xegá'anu' zrize
2lawe' da dxelenná benne' ca' dxelune̱' da cale̱la, ne benne' we̱n lazre' ca' chia' neda'. Dxelenné̱' chia' da naca da we̱n lazre'.
3Lu xel-la' dxelecuide chee̱' zaj naxéchaje̱' neda', ne dxelenné̱' chia'. Dxeledíl-lale̱ne̱' neda', ne quebe bi nuna' chee̱ benne' ca'.
4Lácala bzri'ida' benne' ca', na'a dxeledábague̱' neda', san neda' dxenaba' gaca da chawe' chee̱ benne' ca'.
5Lácala be̱na' neda' da chawe' chee̱ benne' ca', dxelune̱' chia' da cale̱la, ne lácala bzri'ida' le̱', dxelecuídene̱' neda'.
6Bzua tu benne' we̱n da zrinnaj chee̱ guchi'e̱ chee̱ benne' we̱n da cale̱la ca', ne be̱n sua tu benne' nnie̱' chee̱ benne' ca', benne' guzúe̱' ca naca da cale̱la belún benne' ca'.
7Gate na' zri'a chee̱', be̱n gaca bea na zaj nabague̱' zria. Ble'e da xelenabe̱' lau' ca tu dul-la da dxelune̱'.
8Bzache zra xelaca ban benne' ca', ne be̱n xelú'u xezica' benne' waláz chee̱'.
9Bca'ana zrí'ine̱' ca' bidau' we̱ze̱be, ne xelaca zru'ule̱' nu'ula tuze ca'.
10Be̱n xelaca zrí'ine̱' bi dxeledaze chee̱ xelenábabe' guna', ne be̱n xelezrélebe' xeta xelágube' zitu' naga zaj zua lízrebe' da zaj naxinnaj.
11Be̱n xelú'u da ca' zaj nape̱' lu na' bénne' ca' bulusane̱' le̱' dumí. Be̱n xelexúa benne' zitu' ca' da ca' zaj nune̱'.
12Be̱n quebe nu zrel-la benne' xexache lazre̱' le̱', ne quebe nu benne' zrel-la xexache lazre̱' bidau' we̱ze̱be chee̱' ca'.
13Be̱n xelebía xi' zri'ine zre sua benne' ca', ne québedxa nu cha' zri'ine zre sue̱', si' le̱' ca zaj nazi'i la benne' ca'.
14Bsa lazre' ca da cale̱la da belún xra xrtawe̱', Xran, ne quebe xusulu' dul-la da gulún xrne̱'e̱ ca'.
15Tu chí'izqueze bsa lazre' ca da cale̱la da zaj nune̱'. Québedxa cheajsá lazru' benne' ca'
16lawe' da quebe xeleajsá lazre̱' xelexache lazre̱' le sa' ljwezre̱' ca', san bulusaca zi'e̱ benne' baxache' ca', benne' dxelexázrjene̱', ne benne' dxexruj lazre' ca', na' belútie̱' bénne'du ca'.
17Beledánene̱' da dxugú'u na de', na' da caníze guca na chee̱'. Quebe gulaca lazre̱' xelenabe̱' gaca chawe' chee̱ bénneache, na' da chawe' bebiga na naga zaj zue̱'.
18De' da gulegú'e̱ bénneache guca na ca tu da gulacu cuine̱', na' guxú'u na le̱'e̱ ca nisa gulé'aje̱', ne guxú'u na zrita chee̱' ca da za.
19Tu chí'izqueze be̱n gaca na chee̱' ca xicha da dxelácue̱', ne gaca na ca tu xpádxue̱' dxuluchela le̱'e̱.
20Gaca da nigá da quizruj Xránadxu Dios benne' ca' dxelenné̱' cale̱la chia', ne da quízruje̱' benne' ca' dxelune̱' da cale̱la, ne dxelenné̱' cale̱la chee̱ bénne'du xu'a.
21Xrana' Dios, be̱n culuén chia' chee̱ xegá'ana' xrlátaje lau'. Bselá neda' lawe' da dxexache lázrele̱'u bénneache,
22ne lawe' da dxezaca zi'a, ne dxexázrjeda', ne dxeque zi' lázrdawa'.
23Dxedé chia' ca dxedé chee̱ tu zrul-la gate dxebía gubizra. Dxaca chia' ca dxaca chee̱ biche xuaj gate dxua be' le̱ba'.
24Dxelate zriba' lawe' da dxuna' gubasa, ne nazrítale̱'a lawe' da quebe bi dxawa'.
25Naca' ca tu da dxulucá'ana dítaje̱'. Dxelenné̱'e̱ neda', ne dxelún le̱' chia', dxulutá xíchaje̱'.
26Gúcale̱ neda', Xrana' Dios. Bselá neda' lawe' da dxexache lazru' bénneache.
27Be̱n xeleque be'ene̱' Lué'queze dxácale̱nu' neda'. Lué'queze, Xrana' Dios, ba nunu' da nigá.
28Dxelegu'e̱ neda' de', san be̱n Lue' gaca chawe' chia'. Guxasa, be̱n xelexedué'e benne' ca' dxeledábague̱' neda', san be̱n beda' neda'.
29Be̱n xelezrá' lu xel-la' stu' benne' ca' dxelenné̱' da cale̱la chia'. Be̱n xeleque zréajene̱' tu chí'izqueze.
30Du lazra' gúl-laqueza' da güe lá'anale̱'a Xránadxu Dios. Ládujla benne' zan ca' güe lá'ana' Le̱'.
31Le̱' zue̱' cuita xabe̱la chee̱ benne' xache' ca' chee̱ guselé̱' bénne'du zaj xu'e̱ lu na' benne' ca' dxuluchi'e̱ chee̱'.
