1Dauda lɛ̀ɛ. Luda, mↄkↄ̃nn madì n táaki lɛ́, ǹsungↄ̃ yĩtɛnaro.
2Zaakũ gbɛ̃ vãni bonkpɛdenↄ dì ma yaka, òdi lɛ́ bo ò ɛ́kɛyã dima.
3Òdi likamai kũ zãnguyão, òdi fìti kɛ kũmao pↄ́ke wíwinnɛnaa sari.
4Òdi yenyĩ ɛramɛnɛ kũ yãdimmanaao, bee kũ madì adua kɛńnɛ.
5Òdi yã mana fĩna bomɛnɛ kũ a vãnio, yenyĩ sↄ̃, kũ zãnguo.
6Ǹ Setan sùu kɛa, ǹ a kpakũ kũ Ibilisio.
7Ǹ tó yãkpatɛ a nɛ, ǹ tó a aduakɛna yã inɛ.
8A wɛ̃̀ndi gↄ̃ kutu, gbɛ̃ pãnde gↄ̃ a gɛ̃nɛ ũ.
9Ǹ tó a nɛ́nↄ gↄ̃ de sari, a nanↄ gↄ̃ gyaanↄ ũ.
10A nɛ́nↄ gↄ̃ likarazↄ̃rinↄ ũ ògↄ̃ bara kɛ, ògↄ̃ ń kpakɛ ń bɛ zĩinↄ gũn.
11A fĩnade a pↄ́nↄ nakↄ̃a pínki, buri zĩ̀tↄnↄ a zĩ àre sía.
12Gbɛ̃ke sún gbɛ̃kɛ kɛnɛro, òsun wɛ̃nda dↄ̃ a nɛ́ kũ à tònↄnɛro.
13Ǹ tó a burinↄ láka, ń tↄ́ súngↄ̃ kú buri kũ oni futɛnↄ tɛ́ro.
14A dizinↄ vãnikɛna yã gↄ̃ dↄngu, Dikiri, ǹsun tó a da durunna kɛ̃a zikiro.
15Ń durunna gↄ̃ dↄngu, Dikiri, ń yã sã gbɛ̃nↄgu andunia gũn.
16Zaakũ adi dↄn à gbɛ̃kɛ kɛ gbɛ̃kenɛro, àdi wɛ́ tã takasidenↄa kũ wɛ̃ndadenↄ kũ pↄsiradenↄo ari gyãwãn.
17À ye sa vãni onnɛnaai, ǹ tó à wí a musu. Sa mana onnɛnaa dì kánɛro, ǹ tó arubarika kɛ kãao zã̀.
18À lɛ́kɛnnɛnaa dà lán uta bà, à a mɛ̀ɛ yàku lán í bà, à gɛ̃̀ a wánↄn lán nísi bà.
19Kanaa pì gↄ̃ daala lán uta bà, àgↄ̃ dↄ a pi lán asa bà.
20Dikiri fĩna bo ma yãdimmarinↄa lɛ kũ gbɛ̃ kũ òdi yã vãni o ma musunↄo.
21Dikiri Gbãnasĩndapinkide, ǹ ma wɛ̃nda gwa n tↄ́ yãi, ǹ ma bo n manakɛ kũ n gbɛ̃kɛo yãi.
22Zaakũ takaside wɛ̃ndademɛ ma ũ, ma pↄ yàka búgubugu.
23Matɛn gɛ̃tɛ lán ↄkↄsi uraa bà, má de lán kwa kũ ĩa tɛn sɛ́ bà.
24Lɛ́yĩnaa tò ma gbá dì sí sɛ́ doro, ma fɛ̃fɛ̃ ma gↄ̃ wàakuu.
25Ma gↄ̃ yáadↄnapↄ ũ ma yãdimmarinↄnɛ, òdi ma gwa ò mì gbãkɛ.
26Ǹ kpámai, Dikiri ma Luda, ǹ ma sura ba n gbɛ̃kɛ yãi,
27de ò dↄ̃ kũ n ↄ mɛ́ à kɛ̀, mↄkↄ̃n Dikiri, n kɛnaamɛ.
28Bee tó ò ma ka, ĩni arubarika damagu, tó ò fùtɛmai, wé'i ni ń kũ, makũ n zↄ̀bleri mani pↄnna kɛ.
29Tↄ́ vãni ni gↄ̃ ma yãdimmarinↄnɛ uta ũ, oni wé'i daḿma lán arukĩmbaa bà.
30Mani Dikiri sáabu kpá kũ kòto gbãnao, mani a táaki lɛ́ dasi kↄ̃kakaranaa gũn.
31Zaakũ àdi zɛ kũ wɛ̃ndadenↄ, àdi ń sí gbɛ̃ kũ òdi yã vútɛḿmanↄa.
