Soũↄ 109 - Bibeli Luayãtaalá

Soũↄ 109

Click on verse(s) to share them!

¹Davidi lɛ. Lua, ḿmɛ mi n táasilɛ, ńsu ǹyↄ̃ nílɛao.

²Asa gbɛ̃vãi bↄnkpɛdeↄ ì ma yaa, aaì lɛkↄↄlɛkamazi ń ɛɛo.

³Aaì liamazi ń yã́'ĩio, aaì sòlekɛmanↄ pↄewiwinɛsai.

⁴Aaì ma yeańzi fĩabomɛɛ ń yãdↄmao, mapi sↄ̃ miↄ wabikɛma.

⁵Aaì maa fĩabomɛɛ ń vãio, ma yeańzi sↄ̃ ń zaamaguo.

⁶Gbɛ̃vãi sóikɛ ń dↄaanawa, ǹ aà na gudɛnaɛ a ↄzĩ.

⁷To yã́kpalɛ bↄaànↄ vãi, to aà wabikɛa yã'iɛ̀.

⁸Aà wɛ̃ni su àↄ gbã̀ao, gbɛ̃pãle i zↄ̃lɛ aà gbɛu.

⁹Aà nɛ́ↄ gↄ̃ desai, aà na i gↄ̃ gyaa ũ.

¹⁰Aà nɛ́ↄ gↄ̃ lìaanaↄ ũ aaↄ baakɛ, aaↄ pↄ́ wɛɛlɛwɛɛlɛ pↄ́kↄlɛkĩi.

¹¹Aà fĩade aà pↄ́ↄ naaa píi, buipãleↄ aà zĩ ài siwà.

¹²Gbɛ̃e su gbɛ̃kɛkɛɛ̀o, wasu wɛ̃nadↄ̃ aà nɛ́ pↄ́ a tòↄnɛo.

¹³Aà buiↄ midɛ, an tↄ́ ga gbɛ̃́ pↄ́ lɛ́ fɛlɛↄ guu.

¹⁴Aà deziↄ vãikɛa yã́ dↄngu, Dii, ńsu ǹ aà da duuna kɛ̃wà bauo.

¹⁵An duuna aↄ dↄngu gↄↄpii, Dii, an yã́ i sã gbɛ̃́ↄgu dṹniau,

¹⁶kɛ́ ìli làasookɛ gbɛ̃kɛwao yã́i, ì ĩada taasideↄ ń wɛ̃nadeↄ ń gbɛ̃́ pↄ́ an kã́ gàↄwa e aa ga.

¹⁷A ye savãi'oa gbɛ̃́ɛi, to à wi aà musu. Sa maa oa gbɛ̃́ɛ lí kaaàguo, a kɛ báaa vĩ sↄ̃o.

¹⁸À lɛkɛanɛ́ ula dà, à gɛ̃̀ aà nↄ̀sɛu lán íwa, à tàalɛaàgu lán nísiwa.

¹⁹Àↄ fĩwà gↄↄpii zwãa ũɛ, iↄ dↄ aàpi asana ũ.

²⁰Dii fĩabo ma yãdↄmadeↄnɛ màa ń gbɛ̃́ pↄ́ aaì vãi o ma musuↄ.

²¹Dii Gbãapiide, ma wɛgwa n tↄ́ yã́i, ma bↄ n maa ń n gbɛ̃kɛo yã́i.

²²Asa taaside wɛ̃naden ma ũ, ma pↄ yà dúuduu.

²³Málɛ sãalɛ lán oosi uenawa, málɛ gɛ̃zɛa lán ĩ́ana kwasɛawa.

²⁴Lɛye tò ma gbá lɛ́ sɛ́ lↄo, ma fɛ̃fɛ̃ e ma gↄ̃ wákambaau ũ.

²⁵Ma gↄ̃nɛ́ pↄ́sↄ̃sↄ̃a ũ, aaì ma gwa aa mikɛ déũdeũ.

²⁶Dↄmalɛ Dii ma Lua, ma suaba n gbɛ̃kɛ yã́i,

²⁷aai dↄ̃ kɛ́ n ↄdàa, kɛ́ ḿmɛ ń kɛ̀mɛɛ, Dii.

²⁸Tó aa ma ka, ńyↄ̃ báaadamagu, tó aa fɛ̀lɛmanↄ, wí a ń kṹ, mapi n zↄ̀blena mí pↄnakɛ.

²⁹Tↄ́ ĩ́i a gↄ̃ ma yãdↄmadeↄnɛ ula ũ, aa wida ńzĩawa lán gomusuwa.

³⁰Má Dii sáaukpa ń lↄↄ gbãao, má aà táasilɛ balu guu.

³¹Asa ì zɛ ń wɛ̃nadeↄɛ, ì ń sí gbɛ̃́ pↄ́ lɛ́ yãdańlaↄwa.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!