SAKARII 12

1

2

3

4

5

6

7

8

9

10

11

12

13

14

¹Ntɛ Kuyie nnɑ̀kɛ́ tì Isidɑyɛɛribɛ, Kuyie nkùù pitɛ́ tiwɛtì kɛ fìí nkɛtenkɛ̀ kó yɛsɑ̃ǹkɛ̀, kɛ ɑ̃nnɛ́ onìtì di wɛ̃nnì, kuù bɛ́i nkɛ tú:

²Mí nKuyie m bo dɔɔ̀ Sedisɑdɛmmu fɛbòòfɛ̀ kóò píɛ m miɛkɛ kó mɛnɑɑ̀, nyɛbotɛ̀ yɛ̀ɛ̀ ò fitɛ́, kɛ̀ yɛ̀ɛ yɑ̃̀ kɛ́muɔ́ nkɛ̀ yɛ ììkɛ̀ɛ fitɛ́. Dɛɛ̀ múnkɛ yóó tuɔkɛní Sudɑɑ kɔbɛ bɛ dootitɔbɛ̀ bo bɛ̀ do dìì mɔ̀nnì kɛ́pi Sedisɑdɛmmu.

³Dɛ yiè m bo dɔú nSedisɑdɛmmu yɛbotɛ̀ ììkɛ̀ kòo ndo nkutɑ̃́ɑ̃́rí bɛ̀ɛ̀ bo ndɔ́ kóò còtɛ bɛ̀ bo kɔutɛ bɛmɑ́ɑ̀, yɛbotɛ̀ yɛmɔu bo wɛ̃nnɛ́ kóò do.

⁴Dɛ yiè m bo duɔ́ nkɛ̀ sisɛ̃ĩ́ĩ́ wɑ́ɑ́tɛ́, kɛ̀ kufɔ̃wɑɑ́ nhɑutɛ́ si dèèbɛ̀, m bo yɛ̃ĩkùnnɛ ibotí tɛì kó sisɛ̃ĩ́, n nɔ̀nfɛ̀ mɛ mbɑ́ɑ́ ṹṹ nSudɑɑ kɔbɛ ĩ́nkɛ̀.

⁵Dɛ mɔ̀nnì Sudɑɑ botí kó bɛkótíbɛ̀ bo nnɑ́ɑ́ mbɛ yɛ̀mmɛ̀ miɛkɛ kɛ tú: Sedisɑdɛmmu kɔbɛ kó muwɛ̃rímú bonní bɛ Yiɛ̀ nKuyie Mpɑkɛdɑɑ borɛ̀ ndɛ.

⁶Dɛ mɔ̀nnì m bo duɔ́ nkɛ̀ Sudɑɑ kpɑ̀ɑ̀tìbɛ̀ kuɔ yɛhɛkɛ̀ yɛ̀ɛ̀ bɛ̀ fitɛ́ kubɑkù cɑ̃̀nku nɛ̀ kuyoú yɛ kɔbɛ, muhɑ̃ɑ̃́ nhɔ̃ɔ̃ cɔ́útɛ́ mɛ̀ɛ̀ botí timútì nɛ̀ idɛí. Kɛ̀ Sedisɑdɛmmu nkpɑɑ́ bo o kɑrì kɛ̀ bɛnìtìbɛ̀ ò ɑ̃.

⁷Mí nKuyie n yóó ketɛ́ kɛ́dɛɛtɛ́ Sudɑɑ kó yɛfɛ kɔbɛ mbɛ, kɛ̀ dɛ̀ɛ yie nkɛ̀ Dɑfiti kɔbɛ nɛ̀ bɛ̀ɛ̀ bo Sedisɑdɛmmu kɛ̀ bɛ yɛ̀mmɛ̀ bɑ́ ndò mbɛ̀ bɛ̀ pɛ̃ɛ̃tɛ́.

⁸Dɛ yiè mí nKuyie n yó nkɑ̃nkɛ́mu Sedisɑdɛmmu kɔbɛ, dɛ yiè wèè tu ocĩ̀rì bɛ miɛkɛ weè yó ndònnɛ̀ Dɑfiti do dòmmɛ̀ kɛ̀ bɛ̀ nwúó nho yɑɑ̀bí kɛ̀ dɛ̀ dò nKuyie, nkɛ dò nKuyie ntɔ̃nnì.

⁹Dɛ yiè m bo ítɛ́ kɛ́cómmú kɛ́kuɔ ibotí ìì bo kɔtɛní kɛ́ndɔ́ kɛ́do Sedisɑdɛmmu mudoò.

¹⁰Dɛ yiè m bo ɑ̃nnɛ́ Dɑfiti kɔbɛ nɛ̀ Sedisɑdɛmmu kɔbɛ mɛyɛ̀mmɛ̀ bɛ̀ bo n kuɔ́nnɛ̀ mɛ̀ kɛ́ m bɑntɛ́ kɛ́wɛ̃ɛ̃tɛní m bíɛ́kɛ̀. Dɛ mɔ̀nnì kɛ́kɔmmú bɛ̀ kũ̀ṹ wè kɛ dùùtɛ o kpɛ́í, wèè birɛ bo dɛmɑ́ɑ̀ dɛ̀ ɔ̃ɔ̃ kú kòò nkuɔ̀mmɛ̀, Mpo ɔ̃ɔ̃ kú kɛ̀ bɛ̀ nkuɔ̀mmɛ̀.

¹¹Dɛ yiè yɛkúdɑbùò mbo dɑ́tínnɛ́ Sedisɑdɛmmu dibɔɔ̀ Adɑtidimɔɔ ɔ̃ɔ̃ kú kɛ̀ bɛ̀ nkuɔ̀mmɛ̀ Mɛkidoo biriku miɛkɛ.

¹²Dihɛì miɛkɛ bɛ̀ bo nkuɔ̀ bɛ nɑɑ̀mùntì bɛ nɑɑ̀mùntì, kɛ̀ Dɑfiti kó tɛcĩ́ɛ̃̀tɛ̀ kɔbɛ ncɑ̃̀ɑ̃́ nkɛ̀ bɛ pobɛ̀ cɑ̃̀ɑ̃́ nkɛ̀ Nɑtɑ̃ɑ̃ kó tɛcĩ́ɛ̃̀tɛ̀ kɔbɛ ncɑ̃̀ɑ̃́ nkɛ̀ bɛ pobɛ̀ cɑ̃̀ɑ̃́.

¹³Kɛ̀ Defii kó tɛcĩ́ɛ̃̀tɛ̀ kɔbɛ ncɑ̃̀ɑ̃́ nkɛ̀ bɛ pobɛ̀ cɑ̃̀ɑ̃́ kɛ̀ Simɛii cĩ́ɛ̃̀tɛ̀ kɔbɛ ncɑ̃̀ɑ̃́ nkɛ̀ bɛ pobɛ̀ cɑ̃̀ɑ̃́.

¹⁴Tinɑɑ̀mùntì sɔnti tìì kpɑɑ́ kɛ̀ tì cɑ̃̀ɑ̃́ ncɑ̃̀ɑ̃́ nkɛ̀ ti pobɛ̀ cɑ̃̀ɑ̃́.