Zacarias 12

1

2

3

4

5

6

7

8

9

10

11

12

13

14

¹Iyan heini menge lalag te Nengazen mehitenged te Israel: “Iyan a Nengazen he mibaal te langit wey kelibutan, wey mibeǥey te untung diyà te etew.

²Edhimuwen ku is Jerusalem he iring te inumen he ebpekelangut te menge nasyun diyà te peliǥuy zin. Ne emun edsurungen dan en is Jerusalem, ne egkeragkes daan is duma he menge inged diyà te Juda.

³Dutun he andew edhimuwen ku is Jerusalem he iring te meveǥat he vatu. Ne is minsan hengkey he nasyun he ebitbit kayi ne egkesazir. Is langun he menge nasyun kayi te kelibutan edsevaha te kedsurung diyà te Jerusalem.

⁴Piru ebpelihendeken ku is langun he menge kudè dan wey edterenteduwen ku is menge pereuntud dan te kudà. Iyan a, is Nengazen, migkaǥi te ebentayan ku is menge etew te Juda, piru edlekapen ku is langun he menge kudà te menge nasyun.

⁵Ne egkaǥi is menge pengulu te Juda ziyà te gehinawa zan te, ‘Mezesen is menge etew te Jerusalem, su ǥeina te iyan Megbevayè dan is Nengazen he Mekeǥeǥehem.’

⁶“Dutun daan he andew edhimuwen ku is menge pengulu te Juda he iring te egkeregreg he vaǥa ziyà te rapug etawa vinagkes he seresag he mesiǥa. Edezeetan dan is menge nasyun diyà te peliǥuy zan. Ne kenè mulà egkemenu is menge etew ziyà te Jerusalem dutun te kandan he lugar.

⁷Ketau ku he ebpekehuna ebpekezaag is duma he menge inged diyà te Juda, su para kenà medlavew is dengeg te kevuwazan ni David wey menge meǥinged te Jerusalem te zengeg te zuma he menge inged diyà te Juda.

⁸Dutun he andew edlevanan te Nengazen is ebpemen-ubpà diyà te Jerusalem su para minsan is utew meluya kandan ne egkeiring ki David kezesen. Is menge kevuwazan ni David egkeiring te Megbevayà, iring te velinsuǥuen te Nengazen he ebpengulu kandan.

⁹Dutun he andew edezeetan ku is langun he menge nasyun he edsurung te Jerusalem.

¹⁰“Ebeǥayan ku is menge kevuwazan ni David wey is menge meǥinged diyà te Jerusalem te ǥehinawa he hihizuwen wey meinempuen. Edtengtengan e zan is midhimetayan dan, ne edsineǥew sikandan iring te ginikanan he midsineǥew tenged te kebpatey te vudtung he anak din etawa kinekekayan he anak din.

¹¹Dutun he andew utew subra is kedruǥur ziyà te Jerusalem, iring is sineǥawan dan te kedsineǥawi ki Hadad Rimon diyà te suǥud te Megido.

¹²Edruǥur is kada pemilya ziyà te nasyun he Israel: is kevuwazan ni David, ni Natan, ni Levi, ni Semei, wey is duma pa he menge pemilya. Edsineǥew sikandan he ebpesivayà is menge maama wey menge vahi.”