Sɑkɑri 12

1

2

3

4

5

6

7

8

9

10

11

12

13

14

¹Gɑri yi Yinni Gusunɔ u geruɑ Isirelibɑn sɔ̃ wee. Wi, wi u wɔllu kɑ tem mɔmɑ, mɑ u mɑɑ tɔnu hunde dokeɑ

²u nɛɛ, nɑ Yerusɑlɛmu kuɑ nge nɔrɑ ye yɑ nɛn mɔru yibɑ nge tɑm. Yɑ koo bwese ni nu kɑ ye sikerenɛ woo tiro kpɛ̃ɛ. Woo tiro ge, gɑ koo Yudɑbɑ kpuro nɛnɛ bɑ̀ n Yerusɑlɛmu tɑrusi.

³Tɔ̃ɔ te sɔɔ, kon ye gɔsiɑ nge kpee bɑkɑru. Be bɑ kĩ bu tu suɑ bɑ koo mɛɛrɑ wɑ. Hɑnduniɑn bwesenu kpuro nu koo mɛnnɑ nu tu wɔri.

⁴Yen tɔ̃ɔ te, Yinni Gusunɔ u nɛɛ, kon ben dumi woo tiro kpɛ̃ɛ kpɑ n yin mɑɑsɔbu nɔni swɑ̃ɑru kpɛ̃ɛ, kpɑ n bwese tukunun dumi wɔ̃koru kpɛ̃ɛ. Adɑmɑ kon Yudɑbɑ kɔ̃su.

⁵Yudɑn wirugibu bɑ koo nɛɛ, Yerusɑlɛmugibɑ bɑ sɑ̃ɑ ben dɑm nɛ, Gusunɔ ben Yinnin sɔ̃, nɛ wi nɑ wɔllu kɑ tem mɔ.

⁶Yen tɔ̃ɔ te sɔɔ, kon Yudɑbɑn wirugibu kowɑ nge dɔ̃ɔ boko dɑ̃ɑ sɔ̃ɔwɔ, ǹ kun mɛ nge wii bɔn tèn dɔ̃ɔ bɑ sɔkɑ dĩɑ bɔkunu sɔɔ. Bɑ koo bwese ni nu kɑ bu sikerenɛ kɑmiɑwɑ mɑm mɑm. Adɑmɑ Yerusɑlɛmugibu bɑ ko n sɔ̃wɑ ben temɔ.

⁷Nɛ, Yinni Gusunɔ kon Yudɑbɑn yɛnusu fɑɑbɑ ko, kpɑ Dɑfidin yɛnun bɛɛrɛ kɑ Yerusɑlɛmugibun bɛɛrɛ yu ku rɑɑ Yudɑ be bɑ tiegiɑ kerɑ.

⁸Yen tɔ̃ɔ te, kon Yerusɑlɛmugibu kɔ̃su. Be sɔɔ, wi u kun dɑɑ dɑm mɔ, u koo dɑm kowɑ nge Dɑfidi. Kpɑ Dɑfidin yɛnugibu bɑ n sɑ̃ɑ nge Gusunɔn gɔrɑdo wi u yɔ̃ ben wuswɑɑɔ.

⁹Yen tɔ̃ɔ te, kon kookɑri ko n bwese ni kpuro go ni nu Yerusɑlɛmu wɔrim wee.

¹⁰Kon de Dɑfidin yɛnugibu kɑ Yerusɑlɛmugibu bɑ n wɔnwɔndu mɔ kpɑ bɑ n dɑ kɑnɑru ko, kpɑ bu gɔsirɑmɑ nɛn mi, nɛ wi bɑ yɑɑsɑ sɔkɑ. Bɑ koo mɑn swĩisi nge wìn bii teereru tɑ gu. Bɑ koo swĩwɑ kɑ nuku sɑnkirɑ bɑkɑnu nge wìn bii gbiikoo u gu.

¹¹Yen tɔ̃ɔ te, nuku sɑnkirɑru tɑ ko n kpɑ̃ Yerusɑlɛmuɔ nge te bɑ kuɑ Hɑdɑdirimɔɔn sɔ̃ Mɛgidon wɔwɑɔ.

¹²Tem mɛ kpuro sɔɔ, bɑ ko n gɔɔ wooru sɔ̃wɑ yɛnu kɑ yɛnu. Dɑfidin yɛnugibu, kurɔbu kɑ durɔbu nɛnɛm. Nɑtɑnin yɛnugibu, kurɔbu kɑ durɔbu nɛnɛm.

¹³Lefin yɛnugibu, kurɔbu kɑ durɔbu nɛnɛm. Simɛin yɛnugibu, kurɔbu kɑ durɔbu nɛnɛm.

¹⁴Nge mɛyɑ yɛnu si su mɑɑ tien tɔmbu bɑ ko n gɔɔ wooru sɔ̃ nɛnnɛnkɑ, kurɔbu kɑ durɔbu nɛnɛm.